Pacientët e Klinikës së Onkologjisë sot zhvilluan protestë para Ministrisë së Shëndetësisë, duke kërkuar zgjidhje për mungesën e vazhdueshme të terapisë në Klinikën e Onkologjisë.

Nga Shoqatat që merren me problemet me të cilat përballen pacientët me kancer, u bë apel mediave, partive politike dhe qytetarëve që të ndalojnë përdorimin e pacientëve onkologjikë për përplasje të politikës ditore.

 Ata theksuan se problemet me të cilat përballen pacientët nuk janë përgjegjësi e një qeverie apo e një ministri të vetëm, por një problem afatgjatë i gjithë shtetit.

ANA MARJANOVIQ – Shoqata “Hema-Onko”

“Nëse problemi nuk tejkalohet dhe për një muaj kemi sërish këtë problem, ngecje prej 5, një javë apo 10 ditë dhe nëse nuk tregohet saktësisht se tek cili furnizues është problemi, do të dalim para të gjithë institucioneve. Nuk ekzistojnë studime klinike ku thuhet se ne mund ta anulojmë terapinë për 10 ditë. Ky shtet për 5 vite të kaluara na mban në pasiguri, pa marrë parasysh se cili ka qenë Ministër dhe kush ka qenë në pushtet. Nuk kërkojmë privilegje por terapi në kohë dhe në vazhdimësi”

Advertisement

Lidhur me vonesën e disa terapive, Ministria e Shëndetësisë njoftoi se një pjesë e dërgesave tashmë është realizuar, për disa ilaçe janë arritur marrëveshje të reja, derisa për të tjerët kërkohen zgjidhje të përkohshme deri në normalizimin e plotë të furnizimit.

Përfaqësuesit e pacientëve onkologjikë paralajmëruan se, nëse nuk fillohet me zbatimin e një parandalimi më të mirë dhe programeve cilësore të depistimit (screening), buxheti për Onkologjinë do të duhet të rritet vazhdimisht, pasi po rriten si çmimet e barnave, ashtu edhe numri i pacientëve.

Një ditë më parë, nga Klinika njoftuan se për një pjesë të vogël të preparateve nga lista pozitive e Fondit për Sigurim Shëndetësor është evidentuar një vonesë afatshkurtër në furnizim, të cilën e lidhin me disa faktorë, si: rritja e konsumit, numri më i madh i pacientëve, periudha ndërmjet dy procedurave të prokurimit publik dhe mungesa e pjesshme e barnave te distributorët.

Muaji i gjashtë dhe i fundit për hetimin ndaj ish‑zëvendëskryeministrit Artan Grubi nga BDI përfundon më 22 gusht, kur ai do të lirohet edhe nga arresti shtëpiak, nëse prokurori nuk ngre akuzë kundër tij.

Prokurori i Prokurorisë Themelore Publike Shkup, i cili pas 14 muajsh arratisje të Grubit e mbajti vetëm gjysmë dite në paraburgim dhe menjëherë ia zbuti masën në arrest shtëpiak, ka afat ligjor prej 17 ditësh për ta përfunduar hetimin. Në të kundërtën, Grubi është i lirë.

“Nëse nuk ka akuzë, arresti shtëpiak i të dyshuarit për të cilin pyesni hiqet dhe Gjykata Themelore Penale Shkup, me detyrë zyrtare, cakton masë për sigurimin e pranisë. Më së shpeshti kjo është marrja e dokumentit të udhëtimit”, thonë për Sakamdakazam.mk nga Gjykata Penale.
Artan Grubi, para se të dorëzohej në pikën kufitare Bllacë më 23 shkurt 2026, ishte i arratisur në Kosovë, ku nuk nevojitet pasaportë — kufiri kalon me letërnjoftim.

Ai dyshohet për përvetësim prej 8,2 milionë euro në Lotarinë Shtetërore. Pas disa orësh të kaluara në paraburgim, deklaroi se nuk ishte ndier i sigurt në Shutkë, ndaj prokurori, operativë të Agjencisë për Siguri Kombëtare (ASK) dhe të Ministrisë së Punëve të Brendshme (MPB), si dhe gjyqtari i procedurës paraprake, menjëherë e nxorën nga burgu me propozim për masë arrest shtëpiak.

Më 24 nëntor 2025, atëherë prokurori i shtetit, Ljupço Kocevski, deklaroi se provat për Grubin janë mbledhur dhe se pritej vetëm ekstradimi i tij nga Kosova. Heshtja për këtë lëndë mbetet e paqartë. Edhe dje Prokuroria na u përgjigj se nuk ka asgjë të re për hetimin që mund t’i komunikohet opinionit.

Advertisement

Përveç Grubit, i dyshuar në këtë rast është edhe Prparim Bajrami, kryetar i Bordit Drejtues dhe drejtor i përgjithshëm i Lotarisë Shtetërore. Edhe ai është në arratisje.

Katër të tjerë janë të dyshuar në cilësinë e kryetarëve dhe anëtarëve të komisioneve për dy thirrje të veçanta publike, dhe për ta ekziston dyshimi se kanë keqpërdorur autorizimet dhe detyrat e veçanta duke zhvilluar thirrje publike për transferimin e të drejtës për organizimin e lojërave elektronike dhe online të fatit, megjithëse kanë ditur se një procedurë e tillë nuk duhej të zbatohej në rastet konkrete. përcjell Zhurnal.mk .

Komuna e Tetovës ka larguar dy automjetet merimangë pasi që sipas kryetarit të Komunës së Tetovës, Bilall Kasami, shërbimi i merimangës nuk ka qenë funksional për shkak të mungesës së policëve rrugorë të cilët gjatë verës kanë qenë të mbingarkuar me ngjarjet dhe komunikacionit. Kasami zgjidhjen e sheh duke lënë në funksion vetëm një merimangë, deri në momentin kur bllokimi i veturave të parkuara gabimisht do të menaxhohet nga një operator privat që do të angazhohet nga komuna.

„Për momentin nuk ka në funksionim. Do të kthehet në funksion vetëm merimanga, automjeti merimangë që është në pronësi të Ndërmarrjes së Parkingut. Kurse të tjerave u janë ndërprerë kontratat dhe tani më do të vazhdojmë me bazë rregullative për rregullimin edhe të merimangave, edhe të bllokuesve. Në këtë rast, jo që nuk ka bashkëpunim me policinë, por realisht policia nuk ka kapacitet që në çdo pjesë të qytetit të ndërhyjë për largimin e veturave të parkuara pa leje. Këtë e dini që ne kemi tentuar, edhe ka ardhur në asistencë vetë Ministri i Punëve të Brendshme. Kemi kthyer në rrugë inspektorë, përkohësisht duke shpallur gjendje të jashtëzakonshme që të ndërhyjnë, por është konstatuar që edhe ajo nuk ka qenë zgjidhje që ka zgjidhur problemin.“

Mirëpo, nga SPB Tetovë thonë se katër policë rrugorë kanë qenë të angazhuar në dy ndërrime për t’i shërbyer merimangës. Të njëjtit kanë qenë jashtë këtij shërbimi vetëm gjatë kohës kur ka pasur delegacione në rajonin që mbulon ky sektor.

FATMIR REXHEPI – Zëdhënës i SPB Tetovë:„Deri tani është praktikuar që të angazhohen katër policë, pra në dy ndërrime, për arsye se ka dy merimanga në dispozicion. Por ka raste kur ndonjëra nga merimangat është jashtë funksionit dhe nuk mund të funksionojë, kështu që kolegët angazhohen në detyrime të tjera deri në vënien në funksion të merimangave.“

Komuna e Tetovës deri më tani kishte marrë me qira dy automjete merimangë nga kompani private, ndërsa më parë të njëjtat i shfrytëzonte me përqindje. Sidoqoftë, sipas kreut të komunës, asnjëra nga këto variante nuk ka pasur efikasitet për të rregulluar kaosin e komunikacionit në qytet. Kasami premton se do të rregullohet edhe kjo qështje që të funksionojë ashtu siç duhet dhe se do të gjejnë zgjidhje afatgjate.

Advertisement