Kryeministri Hristijan Mickoski nga seanca e pyetjeve parlamentare i bëri thirrje prokurorit të ri publik, Nenad Saveski, që t’i nxjerrë të gjitha lëndët që gjatë viteve të fundit janë mbajtur në sirtar dhe të bëjë analizë për të parë nëse ka dyshime të bazuara për krim të organizuar. Ai pret përgjigje edhe për lëndë nga koha e Prokurorisë Speciale Publike, duke përmendur sërish rastin me “Bonuset e PSP-së”.

“Nga raportet e Entit Shtetëror të Revizionit mund të konkludojmë se në ato institucione është kryer krim, pse kjo nuk është hetuar nuk e di, por shpresoj që prokurori i ri publik do të bëjë analizë të detajuar. Personalisht pres edhe dy çështje që janë shumë të rëndësishme për të ardhmen e shtetit. Nëse nuk e zbulojmë të vërtetën për këto dy çështje, do të vazhdojmë të jetojmë në iluzion.

Së pari, si në mënyrë ‘magjike’ e burgosura Katica Janeva i ka dorëzuar lëndët në praktikën gjyqësore ndërsa ka qenë në burg. Nuk do të qetësohem derisa të marr përgjigje se si Katica i ringjalli këto lëndë. Nëse duam shtet juridik duhet të dimë sipas cilit ligj dhe si Katica nga burgu i ka aktualizuar këto lëndë, së bashku me prokurorin e atëhershëm publik.

Së dyti, si u gjykua një grup njerëzish për terrorizëm dhe mbi çfarë provash? Si janë nxjerrë deklarata nga dëshmitarët e mbrojtur? Dhe së treti, për çfarë shumash bëhet fjalë për bonuset e prokurorëve të PSP-së dhe pse kanë frikë që ky rast të hyjë në fazë hetimi – nëse janë të pafajshëm, nuk kanë pse të frikësohen.

Në emër të së vërtetës dhe sundimit të ligjit, publiku duhet ta dijë të vërtetën. Gjithçka tjetër është luftë ditore kundër krimit dhe korrupsionit. Pres që prokurori i ri publik të dalë me informacion të qartë për opinionin – pra, ditën atë dhe atë, kjo ka ndodhur. Nëse nuk e bën këtë, do të vazhdojmë të jetojmë në një shtet ku një grup do të jetë i privilegjuar, ndërsa të tjerët do të jetojnë në dëshpërim se drejtësia nuk vlen për të gjithë.

Advertisement

I bëj thirrje publike që pa marrë parasysh për kë ka dyshime për krim, qoftë edhe anëtar i Qeverisë, të hapë hetim dhe ta çojë deri në fund. Nuk guxon të ketë të privilegjuar”, deklaroi Mickoski.

Ndryshime personeli në LSDM-në opozitare përpara kongresit të partisë që do të mbahet në qershor. Në një seancë të Bordit Qendror, partia zgjodhi anëtarët e rinj të organeve drejtuese. Sonja Stamenkova, Sllobodan Çokrevski, Bogdanka Kuzeska, Tanja Ilijovska dhe Rubin Zemon hynë në Bordin Qendror dhe Ekzekutiv, transmeton Portalb.mk.

Andrej Zhernovski është emëruar sekretar ndërkombëtar, dhe Zoran Trifunovski është zgjedhur sekretar i dytë organizativ. Përveç kësaj, partia ka shpallur thirrje për zgjedhjen e kryetarit të Forumit të Pensionistëve.

Kryetari i LSDM-së, Venko Filipçe, prezantoi platformën e re të propozuar nga e cila do të dalë programi i ri i partisë.

“Përmes një procesi gjithëpërfshirës dhe debatit të gjerë me anëtarësinë dhe qytetarët, do të përgatitet versioni përfundimtar i programit, i cili do të prezantohet dhe miratohet në kongresin e programit të LSDM-së”, njoftoi partia.

Versioni përfundimtar i dokumentit do të miratohet në Kongresin e 7 qershorit.

Advertisement

Filipçe: Nuk do të lejoj përçarje të reja në parti

Pas përjashtimit të ish-kryetarit të Shkupit Petre Shilegov dhe njoftimeve në media për krijimin e DOS – një platformë për të bashkuar krahun kritik të opozitës, Filipçe deklaroi se nuk do të lejonte përçarje të reja.

“Fokusi mbetet në përgatitjen e programit të ri që do të miratohet në kongres në qershor,” deklaroi Filipçe në “Top Tema” në Telma. Ai i hodhi poshtë iniciativat për trazira si të pabaza dhe theksoi se nuk do të toleronte struktura që punojnë në interes të qeverisë.

“Nuk do të lejoj një ZNAM të dytë. Nuk mund të lejojmë një ndarje në një kohë kur po dalim me kritika të forta ndaj qeverisë dhe po ekspozojmë veprimet e tyre kriminale”, tha ai.

Sipas tij, iniciativat që qarkullojnë në publik nuk kanë bazë serioze: “Këto janë biseda kafenesh dhe letra të pafirmosura pa argumente konkrete.”

Politikat e reja dhe përgatitja e programit

Lidhur me draft-programin që ai ia paraqet Bordit Qendror, Filipçe theksoi se ai përmban politikat dhe masat e ardhshme të LSDM-së për qytetarët. Baza vjen nga komisionet e ekspertëve, dhe procesi do të përfundojë më 7 qershor.

Advertisement

Në ditën parapake, LSDM do të organizojë takimin ndërkombëtar “Iniciativa e Shkupit” me partitë simotra nga rajoni, i dedikuar një platforme të përbashkët për luftën kundër regjimeve autoritare, korrupsionit dhe për përshpejtimin e integrimit evropian. Ideja është të nënshkruhet deklaratë për integrimin evropian, luftën kundër korrupsionit dhe kundërshtimin e regjimeve autoritare.

Hapja e Kushtetutës është një çështje e ndjeshme dhe varet kryesisht nga marrëveshja ndërmjet partive politike, thotë kryetari i Kuvendit, Afrim Gaşi. Pyetja për kryeparlamentarin u bë në kontekst të iniciativës së Gjykatës Kushtetuese për futjen e institutit të padisë kushtetuese, temë kjo që u diskutua javën e kaluar në një tryezë të rrumbullakët në ambientet e Gjykatës.

Pa dhënë komente të mëtejshme, Gaşi tha se ia lë vendimin partive politike se kur është e nevojshme të bëhet kjo dhe mbi çfarë çështjesh.

“Hapja e Kushtetutës është një çështje e ndjeshme dhe mbi të gjitha punë që kërkon marrëveshje ndërmjet partive politike, dhe ju e dini se në Kuvend nevojitet dy e treta e deputetëve që të bien dakord për hapjen e Kushtetutës. Unë nuk do të komentoj më shumë dhe do ta lë këtë vendim partive politike për të vendosur se kur dhe mbi çfarë çështjesh duhet të veprohet”

Gashi sot u pyet edhe për qëndrimin e tij mbi një çështje tjetër që lidhet me Kushtetutën dhe Gjykatën Kushtetuese, e konkretisht për futjen e votimit me shumicë të ashtuquajturën “Badenter”.
Sipas Kryetarit të Kuvendit, kjo çështje nuk duhet të jetë tabu dhe mbi të duhet të diskutohet nga dy perspektiva – njëra politike dhe tjetra profesionale.

Ndryshe, ndryshimet kushtetuese përmenden më së shpeshti në kontekst të modifikimeve për përfshirjen e Bullgarëve në Preambulën e Kushtetutës, një kusht ky që vendi duhet ta përmbushë për të nisur negociatat me Bashkimin Evropian (BE) mbi kapitujt dhe klasifikimet e anëtarësimit.

Advertisement