Lajme nga vendi
DJALOSHI NGA ÇEGRANI PJESË E MISIONIT HËNOR “ARTEMIS II” TË NASA-s!
Ish-Studenti, Alumni, i Universitetit të Evropës Juglindore, Albon Rexhepi, po kontribuon në një nga projektet më të rëndësishme të hulumtimit hapësinor në botë.
Rexhepi, i cili aktualisht ka funksion drejtues në kompaninë DEWETRON në Shtetet e Bashkuara të Amerikës, është pjesë e ekipit të kompanisë që kontribuon në misionin Artemis II të NASA.
Me origjinë nga Çegrani i Gostivarit, ish-studenti i UEJL-së, Albon Rexhepi, ka bërë krenar çdo shqiptar në Maqedoninë e Veriut.
Nëpër rrjetet sociale “vlojnë” përgëzimet për suksesin e tij që vijnë nga Gostivari me rrethinë dhe jo vetëm.
Djaloshi nga Çegrani i Gostivarit, është pjesë e ekipit të kompanisë që kontribuon në misionin Artemis II të NASA.
“Në DEWETRON, jemi krenarë që jemi një furnizues i besueshëm që mbështet teknologjinë pas këtij misioni – duke ndihmuar inxhinierët të sigurojnë të dhëna të sakta dhe të besueshme në disa nga mjediset më sfiduese që mund të imagjinohen”, thuhet në komunikatën e lëshuar nga kjo kompani.
Rrjeti televiziv amerikan “12 News” i ka kushtuar një storje Albon Rexhepit.
Ishte një eufori e vërtetë pranë Kennedy Space Center në Florida javën e kaluar, kur misioni Artemis II nisi me sukses udhëtimin drejt Hënës. Ndër ata që festuan këtë moment historik ishte edhe Albon Rexhepi, i cili tha se ky është kulmi i viteve të tëra pune për ekipin e tij.
“Që raketa të niset me sukses… është një përjetim shumë surreal,” u shpreh Redzepi.
Ai dhe ekipi i tij prej 23 personash punojnë nga një zyrë në South County Trail. Sipas Rexhepit, teknologjia e tyre është një nga sistemet kyçe që ndihmon në kthimin e sigurt të astronautëve në Tokë.
“Një sistem ndodhet në kapsulë dhe një tjetër në Tokë; ato janë të lidhura përmes GPS-it, duke mundësuar ndjekjen në kohë reale të vendndodhjes dhe duke siguruar që kapsula, si gjatë nisjes ashtu edhe gjatë kthimit, të ulet aty ku duhet,” shpjegoi ai.
Sipas një njoftimi për shtyp nga kompania, dega e tyre në Rhode Island zhvillon gjithashtu mjete matëse që u mundësojnë inxhinierëve dhe astronautëve të analizojnë me saktësi performancën, qëndrueshmërinë dhe rezistencën e komponentëve thelbësorë në kushte ekstreme.
“Siç thonë, është vërtet shkencë raketore,” shtoi Redzepi.
Rexhepi, i diplomuar në Westerly High School, tha se kurrë nuk e kishte imagjinuar se do të arrinte të ishte pjesë e një projekti të tillë.
“Kur isha i vogël, shikoja E.T. the Extra-Terrestrial dhe filma të tjerë për hapësirën, ndaj kjo është jashtëzakonisht emocionuese,” tha ai.
Tani ai shprehet krenar që edhe një copëz e vogël nga Rhode Island është pjesë e një misioni kaq të madh historik.
Ai pret me padurim të vazhdojë punën në programin Artemis dhe fazat e tij të ardhshme, ndërsa NASA synon të nisë ndërtimin e një baze në sipërfaqen e Hënës që nga viti 2028.
“Edhe nga një shtet i vogël dhe një kompani e vogël, mund të bëhesh pjesë e diçkaje shumë të madhe,” përfundoi ai.
Nuk ka munguar edhe përgëzimi nga Universiteti i Evropës Juglindore.
Ky angazhim përfaqëson një arritje të rëndësishme profesionale dhe një shembull pozitiv për studentët dhe të rinjtë, duke dëshmuar se alumnit e UEJL-së janë pjesë e projekteve globale me ndikim të madh – thuhet në komunikatë.
Lajme nga vendi
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Shkuma e bardhë u shfaq më 24 korrik, ndërsa Inspektorati Shtetëror për Mjedisin Jetësor, në koordinim me institucionet kompetente, ndërmori inspektime të jashtëzakonshme në terren dhe analiza laboratorike për të përcaktuar shkakun e rastit.
Sipas Inspektoratit, gjatë kontrolleve të kryera te subjektet industriale në zonën që janë nën kompetencë shtetërore nuk janë konstatuar parregullsi ligjore. Autoritetet bëjnë të ditur se subjektet kanë vepruar në përputhje me kushtet e përcaktuara në lejet ekologjike për menaxhimin e ujërave të ndotura.
Institucioni thekson se cilësia e ujit në këtë pjesë të Vardarit ndikohet nga faktorë të shumtë, përfshirë ujërat komunale dhe atmosferike, si dhe aktiviteti i një numri të madh subjektesh afariste në zonën përreth, prandaj të gjitha institucionet kompetente po veprojnë në mënyrë të koordinuar.
Raporti paraprak i Ndërmarrjes Publike “Ujësjellësi dhe Kanalizimi” – Shkup, i dorëzuar më 29 korrik në Ministrinë e Mjedisit Jetësor dhe Planifikimit Hapësinor, konstaton se parametrat fiziko-kimikë të analizuar nuk i tejkalojnë vlerat kufitare të lejuara.
Njëkohësisht, me kërkesë të Inspektoratit Shtetëror për Mjedisin Jetësor, mostra janë analizuar edhe nga një laborator i akredituar. Raporti përfundimtar pritet t’i dorëzohet Inspektoratit dhe Ministrisë më 4 gusht, pas së cilës institucionet kanë paralajmëruar se do ta informojnë opinionin për rezultatet përfundimtare.
Inspektorati Shtetëror për Mjedisin Jetësor bëri të ditur se do të vazhdojë me inspektime të rregullta dhe të jashtëzakonshme për të siguruar mbrojtjen e mjedisit jetësor dhe shëndetit të qytetarëve.
Ndryshe, në lumin Lepenc, i cili e furnizon Lumin Vardar, u shfaq një vëllim i madh i shkumës së bardhë në rrjedhjen e tij në Shkup. Shkuma u raportua si ndotje e madhe e lumit, lum i cili në Karposh bashkohet me Vardarin. Rasti ishte raportuar në orën 14:10./portalb.mk/
Një fëmijë dyvjeçar nga Kumanova është helmuar pasi ka konsumuar një mjet për tretjen e ngjyrës, njofton Ministria e Punëve të Brendshme.
Sipas policisë, rasti është raportuar dje rreth orës 14:00, kur Spitali i Përgjithshëm i Kumanovës ka njoftuar SPB Kumanovë se tek ta ishte sjellë për trajtim një fëmijë dyvjeçar nga Kumanova me shenja helmimi.
Pas marrjes së ndihmës së parë mjekësore, fëmija është transferuar në Kompleksin e Klinikave “Nëna Terezë” në Shkup për trajtim të mëtejshëm.
Nga SPB Kumanovë bëjnë të ditur se po ndërmerren masa për zbardhjen e plotë të rrethanave të rastit.
Ky nuk është rasti i parë i helmimit të fëmijëve në rajonin e Kumanovës. Gjatë vitit të kaluar u regjistruan disa raste të ngjashme, ku fëmijë të moshave të ndryshme u helmuan pasi konsumuan mjete për pastrim, dezinfektues ose tableta të lëna në vende të arritshme për ta.
Autoritetet shëndetësore dhe institucionet kompetente apelojnë që produktet kimike, barnat dhe substancat e rrezikshme të ruhen gjithmonë jashtë mundësisë së fëmijëve, për të parandaluar raste të tilla.
Gjatë muajit korrik, mesatarisht janë regjistruar rreth 15 zjarre në hapësira të hapura në ditë. Falë ndërhyrjeve të shpejta të zjarrfikësve dhe mbështetjes nga mjetet ajrore të Drejtorisë për Mbrojtje dhe Shpëtim (DMSH), të gjitha zjarret janë vënë me sukses nën kontroll dhe janë shuar. Reshjet e shiut gjatë periudhës së kaluar ndikuan në uljen e numrit të zjarreve dhe ngadalësuan përhapjen e tyre, njoftojnë nga DMSH-ja. Megjithatë, periudha me reshje ka përfunduar. Mjafton vetëm një shkëndijë! – thonë autoritetet.
Zjarri në Leshnicë të Tetovës është lokalizuar –thuhet në njoftimin në Facebook të Komandantit të Zjarrfikësve të Tetovës, Avni Ameti, I cili thotë se në koordinim të plotë me të gjitha institucionet përgjegjëse, në terren intervenuan dy avionë të Drejtorisë për Mbrojtje dhe Shpëtim, si dhe ekipet e zjarrfikësve të Tetovës, të cilat punuan pa ndërprerje dhe me përkushtim maksimal.
“U bëj apel të gjithë qytetarëve që gjatë ditëve në vijim të tregojnë kujdes maksimal, të mos ndezin zjarr në ambiente të hapura dhe të raportojnë menjëherë çdo tym apo vatër zjarri në numrin emergjent 112” – thotë Avni Ameti.
Por, jo vetëm kaq!
Sipas tij, pas çdo zjarri që shuhet, fshihet një histori sakrifice, guximi dhe përkushtimi.
Zjarrfikësit përballen çdo ditë me rrezikun për të mbrojtur jetën, familjet dhe pronën e qytetarëve. Nuk është thjesht një profesion – është një mision që kërkon zemër, disiplinë dhe vendosmëri.
Shumica e zjarreve shkaktohen pa qëllim. Qytetarët zakonisht nuk synojnë të shkaktojnë zjarr, por një pakujdesi e vetme mund të ketë pasoja të rënda.
Prandaj bëhet thirrje që të mos hidhen bishta cigaresh në hapësira të hapura, veçanërisht nga automjetet në lëvizje.
-Mos ndizni zjarr apo skara në pyje dhe në vende me bimësi të thatë.
-Pastroni barin e tharë dhe shkurret rreth shtëpive dhe uikend-shtëpizave -dhe krijoni një brez mbrojtës.
-Mos digjni kashtën dhe kullotat. –
-Tregoni kujdes gjatë përdorimit të veglave që krijojnë shkëndija, si gurët prerës dhe aparatet e saldimit.
-Fermerët të jenë të kujdesshëm gjatë përdorimit të pajisjeve për largimin e shpendëve, të cilat mund të shkaktojnë zjarr.
U bëhet thirrje qytetarëve që çdo sjellje të dyshimtë ta raportojnë menjëherë në stacionin më të afërt policor ose në numrin 112.
Raportoni persona që mbajnë lëndë të dyshimta të lëngshme, pishtarë, fishekzjarre të mëdha ose mjete e aktivitete të tjera që mund të shkaktojnë zjarr.
Në kushtet e temperaturave jashtëzakonisht të larta kërkohet kujdes maksimal.
Një shkëndijë mund të shkaktojë një tragjedi të madhe!” – apelojnë nga Drejtoria për Mbrojtje dhe Shpëtim./Tv Koha/
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Dyvjeçar nga Kumanova helmohet me tretës ngjyre, dërgohet në Klinikën “Nëna Terezë”
KUJDES MAKSIMAL NGA ZJARRET: NJË SHKËNDIJË MUND TË SHKAKTOJË TRAGJEDI!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
