Nisma “Më mirë për Tetovën” u bën thirrje të gjithë këshilltarëve të Komunës së Tetovës, sic thonë, të mos lejojnë rritjen e çmimit të shërbimeve nga Saubermacher, e cila godet direkt xhepin e qytetarëve. Nga Komuna e Tetovës thonë se nuk do të lejojnë të rëndohet ekonomia e qytetarëve dhe se kanë vërrejtjet për propozim-çmimoren e kompanisë që do të shpalosen gjatë seancës së të hënës.

Në mbledhjen e radhës të Këshillit, e cila do të mbahet ditën e hënë, më 27.04.2026, si pika e 20 e rendit të ditës, nga udhëheqësia komunale është pranuar propozimi i “Saubermacher” për çmimore të re që do të rrit ndjeshëm çmimin e shërbimit për grumbullimin e mbeturinave si për persona fizik dhe ato juridik, thanë në një press-konferencë para Komunës së Tetovës nga nisma “Më mirë për Tetovën”.

Kjo nismë ka publikuar edhe propozim – çmimoren që e kanë pranuar këshilltarët komunal.

Sipas tyre, po ndodh rreziku të cilin e kishin paralajmëruar.

AGRON ARIFI – “Më mirë për Tetovën”
Sipas propozimit të rendit të ditës dhe materialit që kemi pranuar, parashihet që shërbimet nga “Saubermacher” të rriten 30% për amvisëritë (shtëpitë dhe banesat) dhe 50 deri 100% për bizneset, me çka dëmtohet drejtpërdrejtë buxheti i tetovarëve.
Ky është rreziku që i kanoset qytetarëve kur komuna lidh marrëveshje për Partneritet Publiko-Privat. Privati gjithmonë ka interes përfitimin financiar, ndërsa komuna, e cila nuk është e aftë të ofrojë shërbimet e duhura dhe të jetë në shërbim të qytetarëve, i ikën përgjegjësisë duke lidhur marrëveshje të dëmshme që zhvasin banorët e Tetovës.

Advertisement

Kryesuesi i Këshillit Komunal të Tetovës, Jusuf Abduli, tha se e kanë pranuar kërkesën e “Saubermacher” për rritje të çmimeve dhe se kanë vërrejtjet e tyre që do t`i shpalosin në seancën e së hënës. Por, sipas Abdulit, rritja nuk është aq sa pretendojnë nga nisma “Më mirë për Tetovën”.

JUSUF ABDULI – Kryesues i Këshillit Komunal

“Po është bërë kërkesë nga ana e “Saubermacher” për rritjen e çmimeve, në bazë të kërkesës ka një rritje prej 30% për qytetarët ndërsa për kompanitë ka rritje, nuk është rritje aq sa këshilltari i pavarur e thotë. Ne si grup i këshilltarëve jemi në diskutim dhe kemi vërejtjet tona të cilat do t’i shpalosim në seancën e radhës, do mundohemi të gjejmë zgjidhje dhe që mos ketë rritje ose mos pranohet kjo kërkesë e Saubermacherit që të ketë një rritje që nuk do ndikojë në ekonominë e qytetarëve”, tha Abduli.

Kujtojmë që Komuna e Tetovës në vitin 2023 nënshkroi marrëveshje për partneritet publiko-privat me kompaninë sllovene të grupacionit “Saubermacher” për menaxhimin e mbeturinave në Tetovë.

Si rezultat i kësaj, u ndryshua edhe metodologjia e pagesës. Paraprakisht paguhej taksa për çdo anëtarë të familjes, kurse aktualisht sipas metrit katror të banesave.

Advertisement

Kompania kishte inicuar edhe procedura për pagesë të detyrueshme të borxheve të papaguara të faturave të qytetarëve./Tv Koha/

Bashkimi Demokratik për Integrim (BDI) mirëpret zhvillimet e fundit lidhur me projektin strategjik të Korridorit 8, të cilat dëshmojnë qartë se ky projekt madhor vazhdon edhe përkundër përpjekjeve të Qeverisë për ta shkëputur lidhjen e tij me Republikën e Shqipërisë.

Shtyrja e vizitës së delegacionit të UNESCO-s nuk e vë në pikëpyetje realizimin e projektit, por konfirmon seriozitetin dhe domosdoshmërinë e realizimit të tij sipas projektimit të realizuar në kohën kur BDI ishte pjesë e Qeverisë, thonë integristët.
BDI rikujton se Korridori 8 është projekt me rëndësi strategjike për vendin dhe rajonin, i cili lidh lindjen me perëndimin, forcon integrimin ekonomik dhe rrit lëvizjen e lirë të qytetarëve. Mbështetja e Bashkimit Evropian dhe angazhimet e marra në Deklaratën e Tiranës janë dëshmi shtesë se ky projekt është prioritet i padiskutueshëm. Përpjekjet për ta penguar apo vonuar këtë projekt janë të kota, sepse Korridori 8 është një realitet në ndërtim dhe një domosdoshmëri për të ardhmen evropiane të vendit.

Mirë se erdhët në realitetin e Korridorit 8 – thuhet në reagimin e VLEN, sic thonë, duke e mirëpritur “zbulimin” e fundit të Bashkimi Demokratik për Integrim lidhur me Korridorin 8, i cili, edhe pse me vonesë, konfirmon atë që e kanë thënë dhe dëshmuar vazhdimisht: ky projekt nuk ndalet dhe nuk është pronë e askujt.

Pas një periudhe të gjatë deklaratash kontradiktore dhe përpjekjesh për të krijuar mjegull politike, është inkurajuese të shohim se opozita më në fund po reflekton dhe po i afrohet qëndrimeve që VLEN i ka mbrojtur me konsekuencë dhe përgjegjësi institucionale.VLEN rikujton se përkushtimi ynë për realizimin e Korridorit 8 ka qenë i qartë që nga dita e parë: Një projekt strategjik që lidh vendin me rajonin dhe me Bashkimi Evropian, dhe që duhet të ndërtohet mbi baza profesionale, transparente dhe të qëndrueshme.

Ndërtimi i segmentit rrugor dhe hekurudhor të Korridorit 8 do të kushtojë pothuajse 5 miliardë euro, deklaroi dje dhe Ministri i Transportit, Aleksandar Nikoloski, gjatë takimit për aktivitetet dhe planet e projekteve të Korridorit 8.

Advertisement

Sa i përket segmentit autostradë Trebenishtë – Qafë Thanë, pas vërejtjeve nga UNESCO për shkak të zonës së mbrojtur, ai theksoi se nuk vihet në pikëpyetje fakti nëse do të ketë zgjidhje autostrade deri në Strugë dhe në pikën kufitare Qafë Thanë, por vetëm se nëpër cilën trase do të kalojë.

Njëkohësisht anulohet ardhja e delegacionit të UNESCO-s në Maqedoni, që të diskutohen vërejtjet lidhur me punimet e Korridorit 8 në rajonet e mbrojtura.

Edhe pse fillimisht ishte paralajmëruar se UNESCO do të vinte kah mesi i Majit, sipas Ministrit Nikolovski, me kërkesë të tyre vizita mund të realizohet në mesin e qershorit.

Me deklaratën e nënshkruar më 18 shkurt të këtij viti në Tiranë, shtetet që janë pjesë e Korridorit 8 konfirmuan sërish përkushtimin e tyre për zbatimin e këtij projekti.

Advertisement

Dje, në orën 10:00, zyrtarë policorë nga SPB Tetovë, në bazë të urdhëresës gjyqësore, kanë kryer bastisje në shtëpinë dhe ambientet ndihmëse të një 78-vjeçari në Tetovë. Bastisja është në lidhje me dyshimin për vepër penale “raste të veçanta të falsifikimit të dokumenteve”, e dënueshme sipas nenit 379 të Kodit Penal. Gjatë kontrollit janë gjetur dhe konfiskuar dokumente që lidhen me veprën penale. Pas dokumentimit të plotë të rastit, do të dorëzohet parashtresa përkatëse.

Dje, në orën 18:45, në rrugën “Iliria” në Tetovë, zyrtarë policorë nga Stacioni Policor për Siguri në Trafikun Rrugor Tetovë, kanë privuar nga liria dy të mitur për shkak të dyshimit për vepër penale sipas nenit 297-a të Kodit Penal – drejtim i pakujdesshëm i automjetit. Personat e ndaluar janë: Një 17-vjeçar nga fshati Pallçisht i Epërm, i cili drejtonte një motoçikletë me targa të Tetovës pa pasur leje drejtimi dhe një 16- vjeçar nga Tetova, i cili po ashtu drejtonte një motoçikletë me targa të Tetovës pa leje drejtimi. Të dy motoçikletat janë konfiskuar, është njoftuar Prokurori Publik dhe pas dokumentimit të rasteve do të ngrihen padi përkatëse.

……Dje, në orën 23:50, në SPB Tetovë është raportuar se në rrugën rajonale Gostivar – fsh. Gradec, saktësisht në fshatin Debresh, ka ndodhur një aksident trafiku mes: Automjetit të pasagjerëve “Opel” me targa të Shkupit, i drejtuar nga një 20 vjeçar nga fshati Vranjoc dhe automjetit të pasagjerëve “Nissan” me targa të Gostivarit, i drejtuar nga një 32-vjeçar nga fshati Dobërdoll. Në aksident ka pësuar lëndime të rënda trupore shoferi, të konstatuara në Qendrën Urgjente në Gostivar. Ndërkohë, lëndime trupore kanë pësuar shoferi i automjetit “Opel” dhe pasagjerja në veturën “Nissan”, të konstatuara në Qendren urgjente në Spitalin e Gostivarit. Inspektimin e vendit të ngjarjes e ka kryer ekipi i inspektimit të DPB Gostivar.