Lajme nga vendi
Maqedonia me transformim të qartë energjetik dhe rezultate konkrete – mesazh i fortë nga JESCO në Berlin
Në një takim të Komitetit të Përbashkët Ekonomik Gjermano-Maqedonas (JESCO), i mbajtur në Ministrinë federale për ekonomi dhe energji të Republikës Federale të Gjermanisë, Maqedonia dërgoi një mesazh të qartë: transformimi energjetik nuk është një plan për të ardhmen, por një proces që tashmë po jep rezultate.
Në kuadër të delegacionit zyrtar, nga Ministria e energjisë, minierave dhe burimeve minerale mori pjesë sekretari shtetëror Goran Jovanovski, i cili mbajti një fjalim ku foli për politikën energjetike, dekarbonizimin, zhvillimin e investimeve dhe sigurinë e furnizimit në Maqedoni.
Në prezantimin e tij, Jovanovski theksoi se vendi po zbaton një politikë energjetike të vendosur të bazuar në dy prioritete kyçe – dekarbonizim të përshpejtuar dhe furnizim të sigurt dhe stabil me energji. Me miratimin e Ligjit të ri për Energjetikën në maj 2025, shteti ka vendosur një sistem modern, transparent dhe plotësisht të harmonizuar me standardet evropiane, i cili siguron parashikueshmëri për investitorët dhe i jep fund pasigurisë në treg.
„Shteti nuk e ndjek më tregun – ai e krijon drejtimin e tij,” theksoi Jovanovski, duke shtuar se me vendosjen e planifikimit sistematik dhe planeve vjetore për kapacitete të reja energjetike dhe ruajtje të energjisë, zhvillimi bëhet i koordinuar, i parashikueshëm dhe i orientuar strategjikisht.
Ai nënvizoi se tashmë është në zhvillim një cikël i fuqishëm investimesh në burime të ripërtrishme dhe ruajtje të energjisë, që rezulton me rritje të prodhimit vendor, ulje të varësisë nga importi dhe forcim të pavarësisë energjetike. Paralelisht, po investohet në modernizimin e rrjetit elektroenergjetik dhe zhvillimin e kapaciteteve inteligjente dhe balancuese si bazë për tranzicionin e gjelbër.
Për më tepër, Ligji i ri për burimet e ripërtrishme të energjisë, i cili është në fazën përfundimtare, do të mundësojë realizim më të shpejtë të investimeve përmes procedurave të thjeshtuara dhe transparencës më të madhe, me një qëllim të qartë – më shumë energji të ripërtrishme, më pak lëndë djegëse fosile dhe emetime të reduktuara.
Në kuadër të diskutimeve u theksua edhe rëndësia e Planit të integruar kombëtar për energji dhe klimë 2025–2030, i cili përmban 61 masa konkrete për dekarbonizim, efikasitet energjetik, reformë të tregut dhe rritje të sigurisë së furnizimit.
Jovanovski theksoi se siguria energjetike mbetet prioritet kryesor, përmes diversifikimit të burimeve, ndërtimit të interkoneksioneve të reja dhe integrimit të përforcuar rajonal, duke nënvizuar se “stabiliteti energjetik nuk është vetëm çështje ekonomike, por edhe çështje e sigurisë kombëtare“.
Takimi i JESCO-s, i cili filloi me një sesion pune dhe shkëmbim analizash ekonomike dhe perspektivash mes dy vendeve, mundësoi dialog të drejtpërdrejtë me odat ekonomike, komunitetin e biznesit dhe ekipet e ekspertëve, me fokus në klimën e investimeve dhe prioritetet e përbashkëta strategjike.
Maqedonia mbetet e përkushtuar fuqishëm në rrugën e saj evropiane, me orientim të qartë drejt harmonizimit të plotë me standardet e BE-së në energjetikë dhe politikat klimatike – përmes reformave konkrete, zbatimit transparent dhe rezultateve të matshme.
Anëtari i Komisionit Shtetëror për Parandalimin e Korrupsionit (KSHPK), Besnik Xhemaili, është zgjedhur zëvendëskryetar i KSHPK-së, funksion që do ta kryejë gjashtë muaj.
Zgjedhja e zëvendëskryetarit të KSHPK-së është kryer sipas parimit të rotacionit, dhe renditja u përcaktua sipas rendit alfabetik të mbiemrave të anëtarëve të KSHPK-së, shpjegoi kryetari Adem Çuçuli.
“Mandati i zëvendëskryetares aktuale të KSHPK-së, Sofija Spasova Medarska, përfundon më 18 gusht, ndërsa mandati i zëvendëskryetarit të ri, Besnik Xhemaili, do të fillojë më 19 gusht të këtij viti”, theksoi Çuçul, propozimi i të cilit u pranua unanimisht.
Në seancën e sotme të KSHPK-së, kryetari Çuçul informoi se Komisioni ka evidentuar 30 persona të zgjedhur, të emëruar ose mandati i të cilëve ka përfunduar në prill, të cilët nuk e kanë përmbushur detyrimin ligjor për të paraqitur deklaratën e gjendjes pronësore dhe konfliktit të interesit brenda afatit ligjor. Për të gjithë personat, theksoi Çuçul, do të iniciohen procedura kundërvajtëse dhe shqiptohen gjoba.
Anëtarët e Komisionit Shtetëror për Parandalimin e Korrupsionit sot morën 51 vendime për të njëjtin numër rastesh nga ankues të njohur ose të panjohur në KSHPK.
Uji nga ujësjellësi në Gostivar mbetet vetëm për përdorim teknik dhe ende nuk ka rekomandim që të përdoret për pirje ose gatim, deklaroi kryeministri Hristijan Mickoski.
Sipas tij, arsyeja është paraqitja e një bakteri rezidual në instalimet e ujësjellësit, për shkak të të cilit uji vazhdon të jetë i ndaluar për konsum.
Duke komentuar akuzat ndaj Qeverisë se nuk ka ndërmarrë masa për të parandaluar ndotjen e ujit në Gostivar, Mickoski tha se në vitin 2021, kur lideri i SDSM-së, Venko Filipçe, ishte ministër i Shëndetësisë, ishin regjistruar mbi 400 ankesa për cilësinë e ujit në Gostivar.
Kryeministri i bëri thirrje Prokurorisë që t’i verifikojë këto pretendime, të hapë procedurë dhe të kryejë kontrolle në Institutin e Shëndetit Publik dhe Agjencinë e Ushqimit dhe Veterinarisë.
Sipas Mickoskit, institucionet kompetente duhet të sqarojnë pse, edhe pse kanë pasur mundësi të reagojnë, nuk kanë ndërmarrë masa për mbrojtjen e shëndetit të qytetarëve të Gostivarit.
Lajme nga vendi
Skandal me provimin e Stomatologjisë: Studentja i pagoi ryshfet profesorëve, policia kapi mijëra euro
Njësia për Krim Financiar pranë Ministrisë së Punëve të Brendshme ka ngritur kallëzim penal ndaj tre personave të dyshuar për përfshirje në një skemë korruptive lidhur me përfitimin e paligjshëm të certifikatës për provimin profesional në stomatologji.
Gjatë kontrolleve te dy prej të dyshuarve, policia ka sekuestruar shuma të konsiderueshme parash në valuta të ndryshme.
Sipas MPB-së, A.T. (27) nga Manastiri, studente e stomatologjisë, gjatë dhjetorit 2025 ka komunikuar disa herë përmes aplikacionit Viber me S.Ç. (56) nga Gostivari, profesor në Fakultetin e Stomatologjisë dhe ish-nënkryetar i Odës së Stomatologëve.
Siç njofton MPB-ja, pasi arritën marrëveshje, studentja i ka transferuar para në llogarinë bankare profesorit, me qëllim që ai të përdorte ndikimin e tij për t’i mundësuar marrjen e certifikatës si punëtore shëndetësore, edhe pse nuk i plotësonte kushtet e nevojshme.
Sipas kallëzimit penal, profesori më pas ka ndërhyrë te S.E. (63) nga Shkupi, i cili në atë periudhë ishte kryetar i Komisionit për Provimin Profesional pranë Ministrisë së Shëndetësisë.
Më 17 dhjetor 2025, studentja është paraqitur para komisionit, ka kaluar provimin dhe më pas ka marrë certifikatën shtetërore.
Gjatë aksionit, zyrtarët policorë nga Departamenti për Luftimin e Krimit të Organizuar dhe Krimit të Rëndë kanë kryer kontrolle në banesat e të dyshuarve të dytë dhe të tretë, ku janë sekuestruar 65.280 euro, 29.840 franga zvicerane dhe 161.500 denarë.
“Në bazë të provave të siguruara, A.T. dyshohet për veprën penale dhënie shpërblimi për ndikim të kundërligjshëm, S.Ç. për marrje shpërblimi për ndikim të kundërligjshëm, ndërsa S.E. për marrje ryshfeti”, njoftoi MPB.
Hetimet vazhdojnë për zbardhjen e plotë të rastit dhe përcaktimin e të gjitha rrethanave që lidhen me skemën e dyshuar korruptive.
Besnik Xhemaili zgjidhet zëvendëskryetar i Antikorrupsionit
Uji në Gostivar mbetet vetëm për përdorim teknik, nuk lejohet për pirje
Skandal me provimin e Stomatologjisë: Studentja i pagoi ryshfet profesorëve, policia kapi mijëra euro
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
