Më 17 qershor 2018, në fshatin Nivici, në brigjet e Liqenit të Prespës në Greqi, Shkupi dhe Athina nënshkruan marrëveshjen historike me të cilën u tejkalua kontesti shumëvjeçar për emrin. Me këtë u hap rruga për integrimin euroatlantik dhe shteti, me emrin e ri Republika e Maqedonisë së Veriut, u bë anëtari i 30-të i NATO-s. Tetë vjet pas nënshkrimit të Marrëveshjes së Prespës, marrëdhëniet ndërmjet Maqedonisë së Veriut dhe Greqisë karakterizohen nga përparime, por edhe nga sfida në zbatimin e obligimeve të marra.

Në këtë ditë, tetë vjet më parë, në brigjet e Liqenit të Prespës, Maqedonia dhe Greqia nënshkruan marrëveshjen që i dha fund kontestit tredekadësh për emrin dhe hapi një kapitull të ri në marrëdhëniet ndërmjet dy vendeve.

Marrëveshja e Prespës, e nënshkruar nga kryeministrat e atëhershëm Zoran Zaev dhe Aleksis Cipras, mbetet një nga marrëveshjet diplomatike më të rëndësishme në historinë e re të Ballkanit. Edhe pse nuk i përmbushi të gjitha pritshmëritë që lidhen me integrimin evropian dhe nuk arriti t’i tejkalojë ndarjet e brendshme politike, ajo i mundësoi vendit anëtarësimin në NATO dhe i dha fund një mosmarrëveshjeje që për dekada kishte bllokuar përparimin e tij ndërkombëtar.

Mbështetësit e marrëveshjes e konsiderojnë atë si shembull të guximit politik dhe diplomacisë së suksesshme, ndërsa kritikët vazhdojnë ta kundërshtojnë edhe sot. Megjithatë, mbetet fakt se Prespa u bë një model i njohur ndërkombëtarisht për zgjidhjen e mosmarrëveshjeve të ndërlikuara përmes dialogut dhe kompromisit.

Tetë vjet më vonë, marrëveshja vazhdon të nxisë debate në shoqërinë në Maqedoninë e Veriut, por edhe të kujtojë se çështjet më të vështira politike mund të zgjidhen kur ekziston vullneti për marrëveshje dhe vizion për të ardhmen./Tv Koha/

Advertisement

Kreu i Lidhjes Shqiptare, Ziadin Sela, në intervistën në Alsat, këmbënguli se studentët shqiptarë duhet ta japin provimin e jurisprudencës në shqip, pa pasur nevojë për një ligj të ri. I pyetur përse tani ky qëndrim, ndërkohë që në vitin 2024, në kohën kur Sela ishte në Qeveri, Ministri i Drejtësisë Krenar Lloga kishte kërkuar një ligj për jurisprudencën, Sela tha se qasja e Llogës ishte gabim.

“- Pra po thoni se nuk ka nevojë për ligj të ri?
– Nuk ka nevojë, duhet të zbatohet, duhet vendim të sjell ministri i drejtësisë.

– Dua të ju pyes, në kohën kur ju ishit në Qeveri, ministri i drejtësisë Lloga kishte kërkuar në janar të vitit 2024 një ligj për jurisprudencën, pse atëherë kishte nevojë tani s’ka ?

-Unë mendoj se ajo qasje ka qenë gabim, natyrisht që në atë periudhë unë akoma nuk kam qenë kryetar i partisë, ka qenë tjetër kryetar partie, nisën turbulencat që i ndodhën ASH-së dhe thjeshtë nuk jam konsultuar. “- deklaroi Sela. / Alsat.mk

Dje në ora 10:35, zyrtarë policorë nga SPB Tetovë kanë privuar nga liria një 51-vjeçar nga fshati Poroj i Tetovës. Ai kërkohej me urdhëresë gjyqësore për vuajtje të dënimit me burg për vepër penale të kryer sipas nenit 284-a të Kodit Penal. Personi është dërguar në Institucionin Ndëshkues-Përmirësues Burgu i Tetovës për vuajtje të dënimit.

……Dje në ora 11:30 në SPB Tetovë është denoncuar se më 15 Qershor rreth orës 16:30, para hyrjes së kishës “Shën Atanasie” në fshatin Bërvenicë të Tetovës, është vjedhur një arkë me para. Po merren masa për gjetjen e autorit dhe për zbardhjen e plotë të rastit.

……Dje në ora 17:00 në DPB Gostivar, një 43-vjeçar nga Gostivari ka denoncuar se një person nga fshati Negotinë i Gostivarit, i ka drejtuar kërcënime përmes telefonit. Sipas denoncimit, ai edhe më parë ka shkuar në vendin e tij të punës, në zyrën e tij në Komunën e Gostivarit, dhe i ka drejtuar kërcënime për shkak të masave të ndërmarra më parë lidhur me detyrat e tij zyrtare në komunë, përkatësisht për shkak të një procedure të iniciuar më parë për mbindërtim pa leje të një objekti, e cila ishte denoncuar nga fqinjtë. Po merren masa për zbardhjen e rastit.

……Dje në ora 14:20 në DPB gostivar, një 53-vjeçar nga fshati Çegran i Gostivarit, ka denoncuar se në një rrjet social janë publikuar fotografi të djalit të tij të mitur me tekste me kërcënime për jetën dhe sigurinë e familjes së tij. Është njoftuar prokurori publik dhe po merren masa për zbardhjen e rastit