Shoferët që tranzitojnë nëpër Maqedoninë e Veriut, pra shtetas të huaj, do të përfshihen në sistemin e kamerave “Qyteti i Sigurt” (Safe City), por derisa të përfundojë përmirësimi i plotë i sistemit, dënimet nuk do t’u arrijnë në shtëpi.

Deri atëherë, të gjithë ata që ngasin shpejt nëpër autostradat e vendit me automjete me targa të huaja, do të ndëshkohen vetëm nga zyrtarët policorë me makina civile të pajisura me radarë (të njohur si “përgjuesit”), të cilët sipas MPB-së janë vazhdimisht prezentë në Korridorin 8 dhe 10.

“Në lidhje me automjetet për të cilat pyetni, të ashtuquajturit ‘përgjues’, ju njoftojmë se të njëjtit janë vazhdimisht prezentë në korridoret 8 dhe 10 me qëllim të sanksionimit të shoferëve që shkelin rregullat dhe rregulloret e trafikut,” thonë nga MPB.

Më parë, Ministri i Brendshëm, Pançe Toshkovski, u bëri thirrje të gjithë atyre që tranzitojnë nëpër Korridorin 8 dhe 10 se kamerat e “Qytetit të Sigurt” janë funksionale, punojnë dhe regjistrojnë shkeljet e rregullave të komunikacionit.

Toshkovski deklaroi se pas qytetarëve të vendit, së shpejti edhe shtetasit e huaj dhe mërgimtarët që kalojnë tranzit do të marrin gjoba për shkeljet e bëra. Ai bëri thirrje për respektim të rregullave, duke theksuar se çdo jetë e shpëtuar është një gjest i madh. (INA)

Advertisement

Tetova do të bëhet vendi ku mijëra qytetarë do të bashkohen në një protestë mbarëkombëtare, paqësore dhe dinjitoze, për të mbrojtur rendin kushtetues, sigurinë juridike dhe parimet që për një çerek shekulli kanë garantuar paqen, stabilitetin dhe partneritetin ndëretnik në Republikën e Maqedonisë së Veriut.

Vendimi i Gjykatës Kushtetuese për emërtimet e rrugëve në Tetovë është ngjarja që mobilizon këtë reagim qytetar, por shqetësimi i qytetarëve është shumë më i gjerë. Për një periudhë të gjatë është krijuar bindja se po zhvillohet një proces i vazhdueshëm i dobësimit të mekanizmave që burojnë nga Marrëveshja e Ohrit. Çdo zhvillim i veçantë ka shtuar pasigurinë; të marra së bashku, ato krijojnë një pamje që kërkon reagim qytetar.

Prandaj është e rëndësishme të rikujtojmë faktet.

Këshilli i Komunës së Tetovës miratoi vendimin për emërtimin e rrugëve në përputhje të plotë me ligjin dhe me shumicën e dyfishtë, sipas procedurës së përcaktuar për çështje të tilla.

Vendimi iu dërgua Qeverisë. Qeveria nuk u përgjigj brenda afatit ligjor. Ligji për Vetëqeverisje Lokale është i qartë: mosveprimi i Qeverisë brenda afatit prodhon efekt juridik dhe konsiderohet miratim i aktit të komunës.

Advertisement

Për të shmangur çdo dilemë procedurale, Këshilli i Komunës e miratoi edhe një herë të njëjtin vendim. Edhe pas këtij votimi, Qeveria nuk ndërmori asnjë veprim. Edhe kësaj here, heshtja institucionale prodhoi efektin juridik të parashikuar me ligj.

Për 20 vjet, ky akt ishte pjesë e rendit juridik të shtetit.

Më pas, Gjykata Kushtetuese vendosi ta rihapë këtë çështje.

Gjatë procedurës, Gjykata Kushtetuese kërkoi sqarime dhe dokumentacion nga Komuna e Tetovës. Komuna nuk iu përgjigj kësaj kërkese dhe nuk e mbrojti juridikisht vendimin e saj. Mungesa e këtij reagimi institucional ka pasoja serioze dhe kërkon përgjegjësi.

Vendimi i Gjykatës Kushtetuese krijon një precedent me rëndësi kushtetuese. Për herë të parë vihet në diskutim një akt që ka prodhuar pasoja juridike për dy dekada. Kjo ngre shqetësime legjitime për sigurinë juridike dhe për mënyrën se si mund të trajtohen në të ardhmen çështje të tjera që lidhen me Marrëveshjen e Ohrit.

Advertisement

Në periudhën që vjen, Gjykata Kushtetuese pritet të vendosë edhe për Ligjin për Përdorimin e Gjuhëve. Qytetarët kanë të drejtë të kërkojnë që këto procese të zhvillohen mbi bazën e Kushtetutës, të marrëveshjeve politike që kanë garantuar paqen dhe të parimit të sigurisë juridike.

Ministria e Punëve të Brendshme njoftoi se është zbardhur rasti i 30 qershorit, kur një vajzë 12-vjeçare u sulmua fizikisht në një park në Komunën e Aerodromit, ndërsa disa të mitur të pranishëm e filmonin ngjarjen me telefonat e tyre celularë.

Policia ka dorëzuar në Prokurorinë Themelore Publike të Shkupit kallëzim penal ndaj dy vajzave të mitura për veprën penale “Dhunë”, ndërsa kallëzime penale janë ngritur edhe ndaj dy të miturve për nxitje dhe incizim të paautorizuar, si dhe ndaj pesë prindërve për neglizhim dhe keqtrajtim të fëmijës.

Nga MPB bëjnë të ditur se zyrtarët policorë nga Aerodromi, Draçeva dhe Kisella Voda kanë ndërmarrë të gjitha veprimet e nevojshme për dokumentimin e plotë të këtij rasti.

Rasti ka të bëjë me incidentin në të cilin vajza 12-vjeçare u sulmua fizikisht nga disa të mitura, ndërsa të mitur të tjerë që ndodheshin në vendngjarje e filmonin sulmin me telefonat e tyre celularë.