Lajme nga vendi
Kronika e zezë – Tetovë dhe Gostivar, 19 Korrik
Dje në ora 10:30, zyrtarë policorë nga SPB Tetovë kanë privuar nga liria personin një 47-vjeçar nga Tetova, duke vepruar sipas një denoncimi paraprak se në shtëpinë familjare ka kërcënuar babanë e tij 76-vjeçar dhe ka dëmtuar një pjesë të mobilieve. Pas privimit nga liria, ai i është nënshtruar alkotestit, me çka është konstatuar se kishte 3.22 promilë alkool në gjak.
……Dje në ora 22:00, gjatë kryerjes së detyrës zyrtare në sheshin e qytetit në Tetovë, zyrtarë policorë nga SPB Tetovë kanë vërejtur dhe parandaluar prishjen e rendit dhe qetësisë publike me një përleshje fizike midis një 32-vjeçari nga fshati Poroj dhe një 38-vjeçari nga fshati Pallçisht i Epërm. Pas ndërhyrjes, 32-vjeçari është dërguar në Spitalin Klinik të Tetovës, ku janë konstatuar lëndime trupore.
……Dje në ora 20:13, pas marrjes së një denoncimi për të shtëna me armë ose piroteknikë në lagjen Drenovec të Tetovës, zyrtarë policorë nga SPB Tetovë kanë dalë në vendngjarje dhe kanë konstatuar se në shtëpinë ku po mbahej një aheng familjar i organizuar nga një 49-vjeçar një nga mysafirët, një 22-vjeçar nga Tetova, edhe përkundër paralajmërimeve, ka përdorur fishekzjarre dhe pushkaliqe. Me personin në fjalë është zhvilluar bisedë informative dhe është përpiluar procesverbal për kundërvajtje të konstatuar kundër rendit dhe qetësisë publike.
……Sotë pas mesnate në ora 03:15 në SPB Tetovë është denoncuar se në rrugën rajonale Jazincë-Tetovë, në fshatin Poroj të Tetovës, ka ndodhur një aksident komunikacioni midis një automjeti të udhëtarëve “Seat” me targa të Tetovës, i drejtuar nga një 55-vjeçar nga fshati Sllatinë, dhe një automjeti të udhëtarëve “Volksvagen Golf” me targa të Tetovës, i drejtuar nga një 39-vjeçar nga fshati Poroj. Në aksident lëndime të rënda trupore kanë pësuar të dy shoferët, të konstatuara në Spitalin Klinik të Tetovës.
……Dje në ora 12:35 në DPB Gostivar është denoncuar se në rrugën “Zhivko Brajkoski” në Gostivar ka ndodhur një aksident komunikacioni midis një automjeti të udhëtarëve “Toyota” me targa të Gostivarit, i drejtuar nga një 49-vjeçar nga Gostivari, ndërsa në anën tjetër një motoçikletë “Kavasaki” me targa të Gostivarit, e drejtuar nga një 26-vjeçar nga Gostivari. Në aksident lëndime të rënda trupore ka pësuar motoçiklisti, të konstatuara në spitalin e Gostivarit.
…….Dje në ora 15:40 në rrugën “Nikolla Parapunov” në Gostivar, zyrtarë policorë kanë privuar nga liria një 16-vjeçar nga Gostivari për shkak të dyshimit të bazuar për kryerjen e veprës penale “marrje e automjetit motorik”. Paraprakisht, në ora 12:10, një 26-vjeçar ka denoncuar se gjatë natës në rrugën Kej Vardar është marrë automjeti i udhëtarëve “VolksVagen Golf” me targa të Gostivarit, pronë e bashkëshortit të saj 31-vjeçar. Automjeti me dëmtime të dukshme dhe me çelës në bravë është gjetur rreth orës 15:10 nga një i afërm i pronarit në një parkim në lagjen Maleardi, pas së cilës me vërtetim i është kthyer pronarit. Pas kompletimit të rastit do të vijojë parashtresa përkatëse.
……Dje në ora 19:10 në Stacionin Policor të Mavrovës, një 46-vjeçar nga Gostivari ka denoncuar se rreth orës 16:30 në malin Lera, derisa po kulloste bagëtinë e tij, pas një fjalosjeje paraprake, një person nga fshati Duf e ka sulmuar fizikisht dhe e ka kërcënuar me armë zjarri. Po ndërmerren masa për gjetjen e personit dhe zbardhjen e rastit.
……Dje në ora 23:40 në DPB Gostivar, një 48-vjeçar nga Gostivari, gazetar dhe pronar i një televizioni lokal nga Gostivari, ka denoncuar se rreth orës 19:30 në rrugën “Ilinden” në Gostivar, derisa po kryente detyrën zyrtare, një qytetar nga Gostivari e ka kërcënuar dhe ka tentuar t’ia marrë kamerën. Sipas denoncimit, motiv i mundshëm i sulmit është një foto-lajm i publikuar më parë nga gazetari.
……Dje në ora 23:20 në rrugën “Vëllezërit Gjinovski” në Gostivar, zyrtarë policorë nga Stacioni Policor për Siguri në Trafikun Rrugor Gostivar kanë ndaluar një automjet të udhëtarëve “Citroen” me targa të Gostivarit, i drejtuar nga një 53-vjeçar nga Gostivari. Gjatë kësa ai është sjellë në mënyrë agresive ndaj tyre dhe i ka kërcënuar, pas së cilës është shoqëruar në stacionin policor.
Deputetja e Bashkimit Demokratik për Integrim Arbana Pasholli është e mendimit se personat e përfshirë në projektin e kanalizimit në Zajaz duhet të japin përgjegjësi në rast se vërtetohet teza se në këtë fshat edhe pse janë marrë paratë, nuk është shtruar rrjeti i kanalizimit.
E pyetur nga TV Koha, Pasholli deklaron se pret që edhe institucionet të veprojnë në rast se një gjë e tillë dëshmohet.
Sido që të jetë, në rast se këto pretendime verifikohen presim nga institucionet kompetente që të reagojnë dhe normalisht që të mbahen përgjegjës personat kompetent dhe direkt të përfshirë.
Megjithatë, Pasholli mendon se tema e kanalizimit në Zajaz është temë që po shfrytëzohet për të devijuar vëmendjen nga situate aktuale. Ajo është e mendimit se të gjitha vendbanimet meritojnë investime dhe infrastrukturë cilësore, si dhe kushte dinjitoze për jetesë.
Vlerësoj se çdo vendbanim meriton vëmendje, meriton infrastrukturë cilësore. Meriton kushte dinjitoze për jetesë, nuk mund të jap një përgjigje të drejtëpërdrejtë pa pasur informacion të plotë dhe të verifikuar dhe gjithashtu nuk mund të jap një përgjigje bazuar në atë çfarë kemi dëgjuar nëpër media dhe devijimin e vëmendjes, normal përpjekjet për devijim të vëmendjes nga temat aktuale.
Për rastin e kanalizimit në Zajaz, javë më parë ka alarmuar edhe ambasadori i Bashkimit Evropian në Shkup, Mihalis Rokas. Rokas tha se ka filluar hetimi dhe mbledhja e dokumentacionit të plotë për këtë projekt, i cili është paraqitur si i përfunduar në vitin 2024, por që realisht nuk është kryer në terren./Tv Koha – Shkup/
Lajme nga vendi
BLLACË: AKSIDENTI FATAL – TRE VIKTIMA! Rruga që i ndanin nga përqafimi me familjarët u shndërrua në tragjedi
U nisën nga Gjermania, duke numëruar orët që i ndanin nga përqafimi me familjarët dhe pushimet në vendlindje. Por rruga drejt shtëpisë u shndërrua në tragjedi.
Vetëm pak kilometra para se të hynin në Kosovë, udhëtimi i tyre mori fund përgjithmonë.
Siç mësohet, tre viktimat janë Ejup Tërnava, Cennet Tërnava dhe Fatmire Shabani. Rastin e ka konfirmuar edhe Ministria e Punëve të Brendshme.
Auroritetet thonë se policia për rastin në fjalë është njoftuar rreth orës 22:35.
Policia njofton gjithashtu se para se të ndodhte aksidenti në stacionin policor në Bit Pazar ka pasur denoncim për zhdukjen e tre shtetasve kosovarë, tashmë të ndjerē.
Vetura e aksidentuar ka qenë me targa gjermane. Dy persona kanë ardhur në Aeroportin e Shkupit për ta marrë një familjare të tyre drejt Kosovës./Tv Koha – Shkup/
Lajme nga vendi
Shasivari: Vazhdojmë partneritetin e fuqishëm me SHBA-në për sundimin e ligjit dhe luftën kundër korrupsionit
Ministri i Drejtësisë, Jeton Shasivari, sot zhvilloi takim me Nicole Varns, ushtruese e detyrës së shefes së Misionit në Ambasadën e Shteteve të Bashkuara të Amerikës, ku u konfirmua bashkëpunimi i fortë dhe i vazhdueshëm ndërmjet Ministrisë së Drejtësisë dhe SHBA-së si partner strategjik në zbatimin e reformave në sistemin e drejtësisë.
Një njoftim theksohet se, në takim është diskutuar për prioritetet kyçe të Ministrisë së Drejtësisë, me theks të veçantë te reformat në drejtësi, sundimi i ligjit, digjitalizimi i sistemit gjyqësor, agjenda legjislative dhe lufta kundër korrupsionit. Ministri i Drejtësisë, Jeton Shasivari, kërkoi që në periudhën e ardhshme të mundësohet shkëmbimi i përvojave dhe ofrimi i ndihmës ekspertësh nga SHBA-ja në fushën e legjislacionit penal.
Ministri Shasivari ka shprehur mirënjohje për mbështetjen e vazhdueshme që SHBA-ja i ofron Ministrisë së Drejtësisë dhe proceseve reformuese në vend, duke theksuar se ajo luan një rol të rëndësishëm në forcimin e kapaciteteve institucionale, veçanërisht në luftën kundër krimit të organizuar ndërkombëtar, si dhe në avancimin e bashkëpunimit ndërmjet institucioneve vendore dhe partnerëve ndërkombëtarë.
Në fokus të bisedimeve ishte edhe reforma e legjislacionit penal, e cila mbetet një nga prioritetet strategjike të Ministrisë së Drejtësisë. Në këtë drejtim, u theksua se ka filluar zbatimi i projektit “Mbështetje për zbatimin e Strategjisë Kombëtare për Drogat në Republikën e Maqedonisë së Veriut”, i financuar nga Byroja për Çështje Ndërkombëtare të Narkotikëve dhe Zbatimit të Ligjit (INL) pranë Departamentit Amerikan të Shtetit.
Në takim u konfirmua angazhimi i përbashkët për thellimin e mëtejshëm të partneritetit përmes projekteve të reja të përbashkëta, mbështetjes së ekspertëve dhe shkëmbimit të përvojave në fushat me interes të përbashkët.
Ministria e Drejtësisë mbetet e përkushtuar fuqishëm në zbatimin e reformave, forcimin e sundimit të ligjit dhe përmbushjen e standardeve evropiane, në interes të qytetarëve dhe të integrimit evropian të shtetit. (INA)
PASHOLLI: KANALIZIMI NË ZAJAZ TENTATIVË PËR TA DEFOKUSUAR OPINIONIN!
BLLACË: AKSIDENTI FATAL – TRE VIKTIMA! Rruga që i ndanin nga përqafimi me familjarët u shndërrua në tragjedi
Shasivari: Vazhdojmë partneritetin e fuqishëm me SHBA-në për sundimin e ligjit dhe luftën kundër korrupsionit
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
