Kur do të mund ta japin provimin e jurisprudencës në gjuhën shqipe studentët shqiptarë? Ministri i Drejtësisë, Jeton Shasivari, thotë se kjo nuk është çështje etnike apo politike, por juridike dhe institucionale. Ai paralajmëroi takim me organizatat studentore në tetor, me qëllim gjetjen e një zgjidhjeje për dhënien e provimit në gjuhët e përcaktuara me ligj.

Provimi i jurisprudencës në gjuhën shqipe sërish në fokus të Kuvendit.

Pyetjes së deputetes Diana Toska se kur studentët do të mund ta japin këtë provim në shqip, ministri i Drejtësisë, Jeton Shasivari, iu përgjigj se gjuha mund të jetë e ndryshme, por kriteret duhet të jenë të njëjta për të gjithë.

Në Ministrinë e Drejtësisë, sipas Shasivarit, tashmë kanë arritur kërkesa nga pesë organizata studentore për mundësinë e dhënies së provimit në gjuhë të tjera.

Mes tyre janë edhe Universiteti “Nënë Tereza” dhe Universiteti i Tetovës, të cilat kërkojnë mundësinë e dhënies së provimit në gjuhën shqipe.

Advertisement

Shasivari thotë se kërkesat e studentëve duhet të merren seriozisht, pasi bëhet fjalë për të rinj që në të ardhmen do të jenë pjesë e sistemit juridik.

Ai paralajmëroi se në tetor do t’i ftojë përfaqësuesit e organizatave studentore në një takim koordinues, ku do të diskutohen kërkesat dhe do të kërkohet një zgjidhje institucionale për provimin e jurisprudencës në gjuhët e përcaktuara me ligj.

Shtatë vjet pas tragjedisë në Llaskarcë, familjet e 16 viktimave ende presin drejtësi. Shfuqizimi i aktgjykimit të Apelit dhe kthimi i lëndës për rivendosje hapin përsëri mundësinë që ky proces të zvarritet pa fund.

Edhe në dhjetor paralajmëruam se “Durmo Turs”, bashkë me shumë raste të tjera, është dëshmi e gjallë e dështimit të sistemit. Pamë shtyrje të dyshimta, raporte mjekësore dhe moszbatim të vendimeve.

Besimi në gjyqësor, që ka rënë deri në dy për qind, nuk ra nga qielli. Vetëm superekspertiza për rastin e Llaskarcës qëndroi 315 ditë në Byronë për ekspertiza gjyqësore. Në krye të Byrosë ishte Valdet Xhaferi, funksionar i BDI-së. Pra, lënda nuk u zvarrit vetë.

Gjyqësori duhet reformuar nga rrënjët dhe ministri i ri i Drejtësisë e ka nisur mbarë këtë punë, me vendosmërinë që raste si Llaskarca të mos mbeten më peng i sistemit.

Kërkojmë publikimin e shpejtë të arsyetimit dhe trajtimin me përparësi të lëndës, pa lojëra të reja procedurale. Familjet e viktimave nuk duhet të kthehen përsëri në pikën zero.

Advertisement

Shqetësimi i qytetarëve është rritur pas përleshjeve të fundit mes të rinjve në Tetovë. Përleshjet kanë ndodhur në dy net radhazi, ndërsa në to dyshohet se janë përfshirë persona që lidhen me dy tifo-grupe, “Vojvodët” dhe “Ballistët”. Nga këto përleshje raportohet se tre persona kanë mbetur të lënduar, ndërsa policia ka nisur identifikimin e personave të përfshirë.

Qytetarët e anketuar nga Televizioni Koha janë të revoltuar me politikanët dhe burrshtetasit për mos marrje të masave kundrejt dhunës mes tifogrupeve në Tetovë dhe më gjërë. Bashkëjetesa nuk është luks, por është një gjë e domosdoshme që duhet të respektohet meqë këtu jetojmë dhe nuk kemi se ku e çojmë njëri tjetrin, thonë qytetarët duke u bërë thirrje institucioneve që të marrin masa konkrete dhe njëherë e përgjithmonë të parandalohet kjo dukuri që po shkakton probleme të njëpasnjëshme në Tetovë.

“Të gjitha këto tensione që ndodhin, vijnë nga partitë politike. Në interes të partive politike, i nxisin të rinjtë që të bëjnë gjëra të tilla në vend që të jetojmë së bashku. Përderisa nuk mblidhemi, maqeonas, shqiptarë e të tjerë, që së bashku të ju tregojmë se mund të kemi bashkëjetesë këtu, për shumë e shumë vite të tjera. Jam kundër të rinjëve që përzihen në punët e politikës. Edhe politikanët edhe prindërit duhet të ju tregojnë fëmijëve që ky shtet është i joni dhe e jona do të jetë. Me bashkëpunim, me mirëkuptim. Ju apeloj prindërve që fëmijëve nëpër shtëpi, pavarësisht se kush është, të ju tregojnë fëmijëve që ky shtet është i përbashkët”!

“Kjo ka të bëj me kulturën familjare. Nuk ka të bëj me politikën. Politika ka ekzistuar edhe më herët por skemi pas konflikte. Duhet prindërit dhe policia të jenë më të ashpër”!
Pas rasteve të fundit, policia ka shtuar praninë në pjesët e qytetit ku zakonisht ndodhin përplasjet, ndërsa përfaqësues të tifo-grupeve janë thirrur edhe në biseda informative. Por qytetarët kërkojnë që reagimi i institucioneve të mos vijë vetëm pasi të ndodhë dhuna, por të ketë masa parandaluese dhe kontrolle më të mëdha.

Dukuria e rrahjeve dhe përleshjeve mes tifogrupeve nuk duhet të shihet vetëm si një konflikt mes të rinjve. Kur këto përplasje përsëriten në rrugët e qytetit dhe rrezikohet siguria e qytetarëve, bëhet fjalë për një problem serioz që kërkon reagim të menjëhershëm nga policia, institucionet, prindërit dhe shoqëria në përgjithësi.

Advertisement