Policia e Kosovës bën të ditur se me qëllim të ruajtjes së rendit dhe qetësisë publike, si dhe mbarëvajtjes së protestës së lajmëruar sipas Ligjit mbi tubimet publike nga Organizata e Veteranëve të Luftës – UÇK-së, e cila pritet të mbahet sot në orën 12:00, në sheshet e kryeqytetit, ka bërë të gjitha përgatitjet e nevojshme operacionale policore.

Policia e Kosovës thekson se sipas Ligjit mbi tubimet publike e njeh të drejtën e qytetarëve për shprehjen e lirë përmes protestave të qeta e demokratike në suaza ligjore dhe sipas detyrës zyrtare do të angazhohet që të ofrojë siguri për të gjithë pjesëmarrësit, në mënyrë që mbarëvajtja e protestës të kalojë e qetë dhe pa incidente.

“Zyrtarët kompetentë të PK-së kanë mbajtur takim njoftues me përfaqësuesit e Organizatës së Veteranëve të Luftës, me qëllim të njoftimit dhe koordinimit rreth organizimit të protestës dhe masave tjera që ndërlidhen me zhvillimin e protestës.

Me qëllim të garantimit të rendit e sigurisë publike, mbrojtjes së jetës dhe pronës si dhe ofrimit të sigurisë ndaj qytetarëve e pjesëmarrësve në protestë, Policia e Kosovës iu bën thirrje të gjithë pjesëmarrësve në çdo protestë që të respektojnë dispozitat ligjore dhe udhëzimet e zyrtarëve policorë, të tregojnë kujdes e maturi gjatë protestimit, të mos hedhin gjësende e mjete të forta, të mos përdorin maska dhe të kontribuojnë që protesta të zhvillohet në mënyrë të qetë dhe të sigurt”.

Policia tutje bën të ditur se për shkak të zhvillimit të protestës dhe lëvizjes së pjesëmarrësve, mund të ketë kufizime ose ndërprerje të përkohshme të qarkullimit të trafikut në disa rrugë që të shpien drejt shesheve të kryeqytetit, andaj janë paraparë edhe angazhime të njësive policore patrulluese të trafikut, në rast të nevojës për riorientim të trafikut në rrugët alternative.

Advertisement

Policia e Kosovës falënderon qytetarët për mirëkuptimin dhe bashkëpunimin e treguar në vazhdimësi. Zyrtarët policorë do të jenë të pranishëm në terren për të garantuar rendin dhe sigurinë publike, siguria e qytetarëve dhe mbarëvajtja e aktivitetit janë prioritet i Policisë së Kosovës.

Ish-shefi i Misionit Verifikues të OSBE-së në Kosovë, William Walker, e ka cilësuar një moment të keq për Kosovën, Ballkanin dhe Evropën vendimin e Dhomave të Specializuara në Hagë ndaj katër ish-krerëve të UÇK-së, të cilët u dënuan me gjithsej 81 vjet burg.

Walker tha se procesi, sipas tij, është karakterizuar nga “keqmenaxhimi i drejtësisë” që nga fillimi. Ai shprehu gjithashtu zhgënjimin e tij me Bashkimin Evropian, duke pretenduar se është krijuar një qasje që vendos në të njëjtën peshore krimet e kryera gjatë luftës në Kosovë.

Në një prononcim për A2 CNN, Walker ngriti edhe çështjen e presidentit të Serbisë, Aleksandar Vuçiq, duke pyetur pse ai nuk është thirrur për të dëshmuar në Hagë.

“Jam shumë i mërzitur me BE-në që, për arsyet e veta politike, ka dashur të vërë shenjën e barazimit për ato gjëra të tmerrshme që janë bërë nga qeveria e Serbisë, përfshirë edhe Vuçiqin”, tha Walker.

Ai shtoi se nuk e kupton pse Vuçiqi nuk është marrë në pyetje apo thirrur për të dëshmuar para Dhomave të Specializuara.

Advertisement

“Pse nuk është marrë ai nga Zyra e Prokurorisë Speciale, ose të thirret në Hagë për të dëshmuar? Nuk e di pse BE-ja ka bërë bashkë një trupë gjykues për të akuzuar shqiptarët”, u shpreh Walker.

Duke iu referuar presidentit serb, Walker tha se Vuçiqi “ende kryen ritet” që, sipas tij, i ka kryer gjatë kohës kur ishte ministër i Informacionit në qeverinë e Slobodan Millosheviçit.

“Nëse kthehem te Vuçiqi, nga Beogradi ai ende kryen ritet që ka bërë si ministër i propagandës në kohën e Millosheviçit. Prandaj jam shumë i zhgënjyer me BE-në, duke bërë një përqasje me paragjykim për të gjetur përgjegjësinë e tmerreve që ka shumë për të fajësuar”, tha Walker.

Wesley Clark, ish-komandant i NATO-s në Evropë, u shpreh se ajo që ka ndodhur në Kosovë në vitet 1997-1999 nuk duhet harruar nga bota.

“Kanë kaluar 27 vjet dhe disa prej atyre që janë në gjykatë e kanë harruar frikën e represionit të Millosheviçit mbi njerëzit e Kosovës. Unë e mbaj mend shumë qartë, në verën e vitit 1998, kur mbi 400 000 njerëz u spastruan nga fshatrat e tyre, ushtria që bënte lëvizje speciale taktike dhe eliminonte intelektualët, avokatët, profesorët. Shkonin atje për të plaçkitur shtëpitë dhe për të kryer krime të tmerrshme kundër njerëzve”, tha Clark në një lidhje direkte me “Off the Record” nga Andrea Danglli, në A2CNN.

“Sigurisht, njerëzit rezistuan kundrejt kësaj, por ndoshta sot pas 27 vitesh, duke parë çfarë ndodh edhe me pushtimin rus në Ukrainë, atë çfarë ndodh në Lindjen e Mesme, njerëzit harrojnë.

Por, nuk është e njëjta gjë. Nga 1997 deri në 1999 ata nuk duhet ta harrojnë sepse ne duhet të formësojmë civilizimin e ri, për ruajtjen e të drejtave të njeriut, për atë që ka bërë Amerika edhe me deklaratën që e ka nënshkruar, dhe këtë njerëzit nuk duhet ta harrojnë”, shtoi ish-komandanti i NATO-s.