Dalja e Grubit nga arresti shtëpiak shkaktoi reagime edhe në skenën politike.

VLEN përmes një reagimi thotë se Artan Grubi doli nga arresti shtëpiak, por është larg të qenit njeri i lirë.

Sipas VLEN, Çfarëdo pazari të bëjë, sado që t’i vërë në shërbim lidhjet e vjetra të BDI-së në drejtësi dhe skemat e nëntokës, ai patjetër do të përballet edhe gjatë me mëkatet e tij të pushtetit.

Pavarësisht teatrit që ia organizuan nja dhjetë besnikë me fishekzjarre tifozësh, fytyra e trembur dhe e zbehtë e “kingut” flet shumë, edhe pa e hapur gojën. Edhe pse Bujar Osmani, në një intervistë, u përpoq t’i lëpinte ato që kishte pështyrë për Artan Grubin gjatë fushatës së zgjedhjeve lokale, kjo nuk mjaftoi. U desh të ulej edhe më poshtë. Nga ish-shef i diplomacisë, përfundoi si tifoz i një njeriu të listës së zezë të SHBA-së. Simptomatike është mungesa e pishtarit të Ali Ahmetit, i cili disa herë, përmes deklaratave, u përpoq më kot ta shiste si meritë të vetën zëvendësimin e arrestit shtëpiak me masa më të lehta për ish-bashkëpunëtorin e tij më të afërt dhe trashëgimtarin pa kurorë.

Nga ana tjetër, LSDM-ja e akuzoi pushtetin për ndikim politik mbi sistemin e drejtësisë dhe zbatim selektiv të ligjeve, duke vlerësuar se institucionet veprojnë me kritere të ndryshme, varësisht nga rasti.

Advertisement

Artan Grubi del në liri me festime. Mickoski emëron prokuror në televizion. Jep urdhra nga foltorja e Kuvendit dhe përmes telefonit. Komisioni Shtetëror për Parandalimin e Korrupsionit dhe Prokuroria i hedhin poshtë të gjitha kallëzimet për tenderët kriminalë. Raporti i Komisionit Evropian është katastrofik: ndërhyrje e Mickoskit në sistemin e drejtësisë. Prokurorët i quan mediokër. Popullin e quan llum dhe moçal.

Nga Partia Liberal-Demokrate deklaruan se rastet e lidhura me Artan Grubin dhe Iva Mihajlovën ngrenë çështje serioze për funksionimin e institucioneve dhe kontrollin e kufirit shtetëror.

“Rasti i Iva Mihajlovës nuk është më një kolaps institucional, por një tragjikomedi e zezë dhe e pamëshirshme, në të cilën sistemi është plotësisht i paralizuar – në të njëjtën ditë kur gjykata dhe prokuroria kërkuan sërish paraburgim për të arratisurën Iva Mihajlova, nga paraburgimi doli i buzëqeshur dhe i qetë ish-i arratisuri Artan Grubi”, thuhet në komunikatën e partisë.

Grubi, ish-zëvendëskryeministri i parë dhe ministër për Sistem Politik nga radhët e BDI-së, në dhjetor të vitit 2024 u përfshi në të ashtuquajturën listë të zezë të SHBA-së, për shkak të dyshimeve për përfshirje në korrupsion të konsiderueshëm, të lidhur me lëndën “Target” të ish-Prokurorisë Speciale Publike.

Pas publikimit të sanksioneve, Grubi u tërhoq nga jeta publike, ndonëse pretendonte se para familjes dhe miqve ishte “i pastër si loti”./Tv Koha/ 

Advertisement