Dje, sipas një denoncimi paraprak se në rrugën magjistrale Gostivar – Tetovë një automjet pasagjerësh “Shkoda” me targa të Tetovës po lëvizte në drejtim të kundërt, u ndërmorën masa dhe në pikën e pagesës rrugore Tetovë punonjësit e policisë e ndaluan automjetin dhe pas kontrolleve të kryera u konstatua se shoferi një 33-vjeçar nga fshati Dobrosht ishte nën efektin e alkoolit, përkatësisht iu matën 2,06 promilë alkool në gjak, pas së cilës u privua nga liria. Punonjësit e policisë privuan nga liria edhe pasagjerët e tij nga fshati Nerasht dhe nga fshati Dobrosht, sepse janë sjellë në mënyrë agresive dhe arrogante ndaj punonjësve të policisë që po kryenin veprime zyrtare. Ata janë mbajtur në stacionin policor dhe pas dokumentimit të rastit, ndaj tyre do të ketë parashtresa përkatëse.

……..Dje, punonjësit e policisë nga SPB Tetovë privuan nga liria një 46-vjeçar nga fshati Sellcë, e Tetovës. Gjatë një kontrolli në shtëpinë e tij dhe hapësirat ndihmëse, të kryer me urdhër gjyqësor, u gjet dhe u sekuestrua marihuanë. Pas dokumentimit të rastit, ndaj tij do të ketë parashtresë përkatëse.

…….Dje në orën 14:05 para Institucionit Ndëshkimor-Korrektues Burgu i Tetovës, punonjësit e policisë nga SPB Tetovë privuan nga liria një 44-vjeçar nga f.Sellarcë e Epërme. Pasi iu tha se nuk është ditë vizitash, ai sulmoi fizikisht komandantin dhe punonjësit e burgut që po kryenin veprime zyrtare. Ai është mbajtur në stacionin policor dhe pas dokumentimit të plotë të rastit do të pasojë një parashtresë përkatëse.

………Dje në orën 17:25 në SPB Tetovë, nga Qendra Mjekësore e Gostivarit është raportuar se tek ata me lëndime ishte sjellë një 22-vjeçar nga fshati Çegran, i Gostivarit. Pas masave të ndërmarra dhe kontrolleve të kryera u konstatua se ai i ka marrë lëndimet gjatë një rënieje nga mopedi në fshatin Çegran, të cilin e ka drejtuar pa patentë shoferi. Është kryer inspektimi dhe pas dokumentimit të plotë të rastit do të pasojë një kallëzim përkatës.

…….Dje në orën 17:50 në DPB Gostivar, një 64-vjeçar nga Gostivari ka denoncuar se rreth orës 16:00 në rrugën “Beliçica” në Gostivar është sulmuar fizikisht nga një person. Po ndërmerren masa për zbardhjen e plotë të rastit.

Advertisement

…….Dje në orën 22:55 në Stacionin Policor Jegunovcë, një 46-vjeçar nga një fshat i Tetovës ka denoncuar se një shok 17-vjeçar i djalit të tij 16-vjeçar i ka marrë portofolin nga lokali i tij dhe e ka përdorur kartelën e tij të pagesave për të paguar në një market në fshat. Sipas denoncimit, ai me djalin e tij ishin duke pastruar lokalin dhe me një rast të përshtatshëm ia ka marrë portofolin, kurse pasi ka marrë një mesazh për transaksionin e kryer, është bërë një kontroll i kamerave të sigurisë në market dhe është konstatuar se 17-vjeçari e ka përdorur kartelën. Po ndërmerren masa për zbardhjen e rastit.

…….Sot në mëngjes në orën 04:10, punonjësit e policisë nga Stacioni Policor i Grupçin kanë privuar nga liria një 39-vjeçar nga një fshat i Tetovës, duke vepruar sipas një denoncimi paraprak nga babai i tij 61-vjeçar se rreth orës 01:00 e ka sulmuar fizikisht dhe i ka thyer xhamin e derës. Ai është mbajtur në stacionin policor dhe pas dokumentimit të rastit ndaj tij do të pasojë një parashtresë përkatëse.

Zëvendësdrejtori i Doganave, Mustafa Dauti, ka njoftuar për intensifikimin e kontrolleve kundër tregtisë së paligjshme të duhanit dhe produkteve të tjera, pas goditjes së një grupi ndërkombëtar të përfshirë në krimin e organizuar dhe importin e paligjshëm të cigareve.

Dauti bëri të ditur se kontrollet janë shtuar jo vetëm ndaj importeve të duhanit dhe produkteve të tij, por edhe në tregun e brendshëm.

Gjatë kontrolleve të realizuara nga zyrtarët doganorë dhe ekipet mobile, janë konstatuar raste të shitjes së produkteve të duhanit dhe alkoolit pa pulla akcizore dhe pa paguar detyrimet përkatëse ndaj shtetit.
Si rezultat i këtyre kontrolleve, janë sekuestruar 135 kilogramë duhan i prerë dhe 30 litra alkool, ndërsa vlera e akcizës së papaguar për këto produkte arrin në 337.558 denarë.

Sipas njoftimit të Dautit, për dy persona janë ngritur kallëzime për kundërvajtje, ndërsa ndaj një personi, në rastin ku shmangia e akcizës arrin rreth 257 mijë denarë, do të parashtrohet kallëzim penal në përputhje me Kodin Penal.
Dauti theksoi se kontrolli i tregtisë së ligjshme është i rëndësishëm për mbrojtjen e interesit publik, respektimin e ligjit dhe krijimin e kushteve të barabarta për të gjithë tregtarët që ushtrojnë veprimtarinë e tyre në mënyrë të rregullt.

Siguria dhe shëndeti në punë janë e drejtë themelore e çdo punëtori, ndërsa krijimi i një mjedisi pune të sigurt, të shëndetshëm dhe dinjitoz mbetet një nga prioritetet e Ministrisë së Ekonomisë dhe Punës. Këtë e theksoi ministri i Ekonomisë dhe Punës, Besar Durmishi, në aktivitetin e sotëm me rastin e shënimit të Javës Evropiane për Sigurinë dhe Shëndetin në Punë, gjatë të cilit ndahen edhe Çmimet Kombëtare për sistemin më të mirë të zbatuar të sigurisë dhe shëndetit në punë.

“Siguria dhe shëndeti në punë nuk janë vetëm detyrim ligjor apo përmbushje e standardeve të përcaktuara. Ato janë e drejtë themelore e çdo punëtori, çështje e dinjitetit njerëzor dhe përgjegjësi e përbashkët. Qëllimi ynë është i qartë – çdo punëtor të ketë një mjedis pune të sigurt, të jetë i mbrojtur nga rreziqet dhe pas përfundimit të ditës së punës të kthehet në shtëpi i shëndetshëm dhe i sigurt”, theksoi ministri Durmishi.

Në fjalimin e tij, ministri theksoi se zhvillimi i shpejtë teknologjik, digjitalizimi dhe mënyrat e reja të organizimit të punës, krahas mundësive për rritjen e produktivitetit dhe zhvillimit ekonomik, sjellin edhe sfida të reja për mbrojtjen e punëtorëve. Siç theksoi ai, vëmendje e veçantë duhet t’u kushtohet rreziqeve psikosociale, stresit dhe ndikimit të proceseve bashkëkohore të punës në shëndetin mendor të të punësuarve.

“Prioriteti ynë është përmirësimi i vazhdueshëm i kornizës ligjore, forcimi i parandalimit dhe krijimi i kushteve ku përparimi ekonomik dhe teknologjik do të shoqërohet me standarde më të larta për mbrojtjen e punëtorëve. Po ndërtojmë një treg pune ku siguria dhe shëndeti nuk janë detyrim shtesë, por pjesë përbërëse e çdo procesi pune”, theksoi Durmishi.

Ministri vuri në dukje edhe përgjegjësinë e përbashkët të institucioneve, punëdhënësve, sindikatave, shërbimeve inspektuese dhe vetë punëtorëve në krijimin e një kulture të parandalimit, duke theksuar në veçanti rolin e kompanive.

Advertisement

“Investimi në kushte pune të sigurta dhe të shëndetshme nuk duhet të shihet si shpenzim, por si investim afatgjatë te njerëzit, në produktivitetin e kompanive dhe në konkurrueshmërinë e ekonomisë sonë. Vetëm një punëtor i shëndetshëm dhe i mbrojtur mund ta realizojë plotësisht potencialin e tij, ndërsa kompanitë që kujdesen për të punësuarit e tyre krijojnë bazën për zhvillim të qëndrueshëm”, u shpreh ministri.

Në kuadër të aktivitetit, vëmendje e veçantë iu kushtua kompanive që me praktikat e tyre kontribuojnë në avancimin e standardeve të sigurisë dhe shëndetit në punë.

Durmishi shprehu kënaqësinë për interesimin e kompanive që edhe këtë vit aplikuan për Çmimin Kombëtar për sistemin më të mirë të zbatuar të sigurisë dhe shëndetit në punë, duke theksuar se përkushtimi i tyre duhet të shërbejë si nxitje dhe shembull për punëdhënësit e tjerë.

Ai u përcolli urime kompanive të shpërblyera dhe shprehu mirënjohje për Këshillin për Siguri dhe Shëndet në Punë, partnerët socialë dhe të gjithë aktorët që kontribuojnë në përmirësimin e kushteve të punës.

Advertisement

Ministria e Ekonomisë dhe Punës do të vazhdojë me aktivitete të orientuara drejt përmirësimit të legjislacionit, ngritjes së vetëdijes publike, forcimit të masave parandaluese dhe bashkëpunimit me partnerët socialë, me qëllim sigurimin e një niveli më të lartë të mbrojtjes së punëtorëve.

“Qëllimi ynë i përbashkët nuk është vetëm përmbushja e detyrimeve ligjore, por krijimi i një mjedisi pune ku çdo individ do të ndihet i sigurt, i mbrojtur dhe i respektuar. Zhvillimi ekonomik ka vlerë të vërtetë vetëm kur shkon paralelisht me mbrojtjen e shëndetit, sigurisë dhe dinjitetit të punëtorëve”, përfundoi ministri Durmishi.