Protesta për gjuhën shqipe në dhënien e provimit të jurisprodencës e studentëve shqiptarë të Maqedonisë së Veriut, u bë objekt diskutimi dhe shqetësimi edhe në Samitin e IV të Diasporës Shqiptare të së martës në Tiranë.

Foli për këtë temë fillimisht ministri i Punëve të Jashtme dhe Europën, Ferit Hoxha. Më pas kryeministri dhe nuk pushuan së foluri edhe Ali Ahmeti e Dritan Abazoviç. Por këtë temë nuk e pashë shqetësuese për ministrin e Punëve të Jashtme të Kosovës, Glauck Konjufcën, as për kreun e parlamentit të Maqedonisë së Veriut, Afrim Gashi. Ky i fundit madje kërkoi që të mos politizohet çështja e përdorimit të gjuhës shqipe në këtë vend, ndërkohë që Ali Ahmeti “ishte i shqetësuar” se po bëhen përpjekje për ta zhvleftësuar Marrëveshjen e Ohrit të gushtit 2001.

“Turp apo jo, ne nuk e dimë ku i kemi qytetarët tanë” – Hoxha: Platformë për regjistrimin vullnetar të shqiptarëve jashtë vendit
Kanë kaluar 25 vite që kur është nënshkruar Marrëveshja e Ohrit, e cila i dha fund luftës civile në Maqedoni. Gjatë kësaj kohe për 22 vite Ali Ahmeti ka qenë në pushtet. Megjithatë ai nuk e zgjidhi përfundimisht çështjen e përdorimit të gjuhës shqipe në administratën dhe veprimtaritë institucionale maqedonase. Tani del e thërret alarmin se po i kontestohet marrëveshja në fjalë. Që këtu më bëhet të besoj se dikush po i fryn konfliktit midis shqiptarëve dhe maqedonasve në Maqedoninë e Veriut. Kush është ky dikushi? Përgjigjen e kësaj pyetjeje e dha po në këtë samit të diasporës ish-kryeministri pro-serb i Malit të Zi, por me emrin shqiptar Dritan dhe mbiemrin e përzier shqiptaro-serb, Abazoviç.

Dritan Abazoviç bëri thirrje që të mbrohet gjuha shqipe. Pra ai nxiti palën e persekutuar, studentët shqiptarë të Maqedonisë së Veriut, që ta intensifikojnë luftën “për gjuhën shqipe dhe përdorimin e saj në provimet e jurispridencës”! Që studentët dhe qytetarët me kombësi shqiptare duhet të luftojnë për të drejtat e tyre jo vetëm kulturore e gjuhësore, por edhe kushtetuese, politike, administrative e të përfaqësimit, kjo është një e drejtë e patjetërsueshme. Por pa u ndikuar nga Ali Ahmeti, i cili i kishte të gjitha mundësitë që në pranverë-verën e vitit 2001 të impononte një marrëveshje gjithëpërfshirëse dhe të plotë, pa dilema dhe pasoja për të ardhmen. Kishte mundësi madje që të impononte ndryshime kushtetuese me të cilat deputetët shqiptarë duhej të votonin me 2/3 për ndryshimin e Kushtetutës. Por nuk e bëri këtë. Nga padija, nga pamundësia apo me dashje, kjo le të jetë pjesë e ndërgjegjes së tij. Megjithatë Ali Ahmeti ka për detyrë që të kërkojë ndjesë para se të flasë e të nxitë konflikte të tjera të radhës në Maqedoninë e Veriut.

Ndërsa rekomandimi i Dritan Abazoviç më ngjan si porosi e Aleksandër Vuçiq. Prandaj thashë se përgjigjen pse dikush kërkon konflikt shqiptaro-maqedonas tashmë e kam kuptuar nga ajo që thotë ish-kryeministri aksidental i Malit të Zi. Në fakt jo dhe aq aksidental, po të kemi parasysh se Abazoviç riktheu Kishën Ortodokse Serbe në Cetinjë, ose po të kemi parasysh se ai ishte gati të hynte në Open Balkanin e Aleksandër Vuçiq dhe Edi Ramës, nëse do ta lejonte presidenti i Republikës i asaj kohe, Milo Gjukanoviç. Shkurt, mendja të shkon se Serbia po përpiqet që ta shfrytëzojë këtë moment delikat në marrëdhëniet midis shqiptarëve dhe maqedonasve me qëllim shpërbërjen e këtij shteti.

Advertisement

Duhet të kemi parasysh se në Perëndim është e përhapur narrativa, sipas së cilës “Shqiptarët në Maqedoninë e Veriut nuk do të pranojnë të qëndrojnë në të njëjtin shtet me maqedonasit”! Një gazetare shumë e njohur e Spiegel më thoshte para disa vitesh se nëse flet me shqiptarët në Maqedoni, vetëm 5 minutat e para të flasin për bashkëjetesë, tolerancë dhe më pas ata harrojnë e shprehen ashpër kundër maqedonasve. Në fakt ajo gabonte kur thoshte “maqedonasve”! Shqiptarët në Maqedoninë e Veriut shprehen kundër politikave diskriminuese të elitës maqedonase ndaj tyre. Kjo dihet.

Megjithatë është interes i shqiptarëve kudo që ata jetojnë, që shteti i Maqedonisë të ekzistojë. Madje të forcohet dhe të integrohet edhe në Bashkimin Europian, përveçse në NATO. Ndërkohë që shqiptarët e Maqedonisë së Veriut i kanë të gjitha mundësitë dhe aftësitë t’i avancojnë të drejtat e tyre dhe të imponojnë deri ndryshime kushtetuese për këto të drejta, por pa provokuar dhunën ose federalizmin ose shpërbërjen e shtetit. Të qenit i barabartë në një shtet të përbashkët është në dobi të shqiptarëve. Ndërsa serbët kanë interes zhbërjen e këtij shteti dhe shpërbërjen e tij! Dhe një pjesë e elitës maqedonase dëshiron pikërisht ta realizojë narrativën serbe. Prandaj duhet kujdes, siç thuhet: – Mishi të piqet dhe helli të mos digjet!

Qytetarët që kanë punuar në Afganistan dhe Irak së bashku me studentët që përmes programit “Work and Travel” kanë punuar jashtë vendit, protestuan para Drejtorisë së të Ardhurave Publike për shkak të njoftimeve që kanë marrë se duhet të paguajnë tatim për paratë që i kanë fituar jashtë shtetit. Janë të revoltuar se zyrtarë të ndryshëm tatimorë i informojnë në mënyra të ndryshme dhe pyesin pse askush nuk i ka njoftuar deri tani.

“Gjermania na i kthen për të na mbështetur ne si të rinj, për të na motivuar të jemi një faktor i mirë në shoqëri dhe të bëjmë diçka pozitive me arsimin tonë, rininë tonë, dhe këtu për këtë na ndëshkojnë, për atë punë në shtet të huaj. Dhe për ato tre muaj ne nga këtu nuk marrim asnjë sigurim social, asnjë mbrojtje, asnjë sigurim shëndetësor, asnjë sigurim pensional…”, tha një student.

Qytetarët që kanë punuar në Afganistan dhe Irak pyesin çfarë është pritur për pesë vite. Ata pretendojnë se tatimi është paguar jashtë vendit dhe janë kundër tatimit të dyfishtë.

“Nuk mundet një institucion të jetë në letargji 5 vite dhe pastaj pas pesë viteve ai institucion të zgjohet dhe të thotë ej ju keni tatim në vitin 2020.
Për mua janë paguar nga ajo kompani 12.800 euro për tre vite tatim, domethënë 4.000 euro në vit. Ata nuk e pranojnë. A e di çfarë na tha drejtoresha? Kjo është falsifikim. Këtë unë mund t’ua bëj juve”, u shpreh një qytetar.

Drejtoresha e DAP-it, Elena Petrova, thotë se tatimi për të ardhurat nga jashtë nuk është i ri dhe se duhet të mblidhet. Ajo tha se për vitin 2025 kanë identifikuar 134 studentë që kanë punuar në Gjermani, 19 kanë dorëzuar deklaratë, 10 kanë paguar tatim. Për personat që kanë qenë në misione në Afganistan dhe Irak, kërkohet dëshmi se tatimi është paguar në një shtet tjetër. Për 257 persona është kërkuar verifikim përmes MPJ, deri tani ka pasur përgjigje vetëm për një person.

Advertisement

“Jemi të vetëdijshëm se një pjesë e qytetarëve përballen me këto obligime administrative dhe financiare, për të cilat në të kaluarën nuk janë informuar dhe nuk u janë planifikuar. Por kjo nuk e ndryshon obligimin ligjor. Prandaj qasemi me mirëkuptim dhe me përgjegjësi të qartë për ta zbatuar ligjin”, theksoi Elena Petrova – drejtoreshë e DAP.

Sipas të dhënave të DAP-it, kthesa vjen nga viti 2024, kur ka filluar përpunimi sistematik i të dhënave nga bankat. Për vitin 2020 janë dërguar 11.527 njoftime. Tatimi total i përcaktuar është rreth 2,8 milionë euro, nga të cilat deri tani janë mbledhur rreth 494.000 euro. Të dhënat për vitin 2025 tregojnë se 70.869 qytetarë kanë pasur të ardhura nga jashtë në vlerë totale prej 577 milionë eurosh. Nga DAP thonë se të gjithë nuk i nënshtrohen tatimit. Deri tani janë dërguar 9.522 njoftime, ndërsa 4.459 persona kanë dorëzuar deklarata vullnetarisht.

Pirja e duhanit shkakton dëmtime kronike të mushkërive dhe enëve të gjakut, duke çuar në shfaqje të kancerit, sëmundje kronike obstruktive, pneumotoraksit spontan, aterosklerozës, aneurizmave dhe stenozës karotide, të cilat shpesh përfundojnë me nevojë për ndërhyrje kirurgjikale. Në Klinikën për kirurgji torakale dhe vaskulare numri i pacientëve është në rritje të vazhdueshme; vitin e kaluar janë trajtuar më shumë se 3100 pacientë, prej të cilëve rreth 150 – kryesisht duhanpirës – me ndërhyrje kirurgjikale torakale, ku dominon kanceri i mushkërive. Çdo vit diagnostifikohen 600 deri në 700 pacientë të rinj, kryesisht duhanpirës, me kancer të mushkërive, ndërsa shumica janë në fazë të avancuar të sëmundjes dhe dërgohen në Klinikën për radioterapi dhe onkologji për trajtim të mëtejshëm, thotë në intervistë për MIA, drejtori i Klinikës për kirurgji torakale dhe vaskulare, dr. Igorçe Xhikovski.