Kandidati i AKI-së, për postin e kryetarit të Çairit, Bujar Osmani, tha se nga analizat e bëra, rezulton se Çairit i mungon një vizion dhe strategji për sportin, se nuk ka salla sporti, ndërsa ato që janë, ose nuk janë funksionale ose jepen në mënyrë jo transparente dhe korruptive. Ai premton revitalizim të fushave dhe sallave të sportit, me qëllim që t’u ofrohet qytetarëve të Çairit, mundësi që të bëjnë sport qoftë për rekreacion, qoftë për shëndetin e tyre.

Do të nisim fillimisht me revitalizimin e fushave dhe sallave sportive, i keni këtu mbrapa meje, palestrën sportive ‘Enver Idrizi’ në Serovë, me të gjitha nevojat që duhet të plotësohen për ofertë, për shërbim sportiv në bazë të standardeve, palestrën sportive ‘Vasil Gllavinov’ menjëherë, edhe pse e dini që ‘Vasil Gllavinov’ është pjesë e projektit të madh të Mishell Rojkin për shkollë të re, çerdhe të re, parking nëntokësor dhe kënd lojërash. Pastaj palestra sportive ‘Imri Elezi’ në lagjen Dizhon, rinovim i tërësishëm i sallës, palestra sportive liria në Gazi Babë,” tha Bujar Osmani, kandidat i AKI-së për komunën e Çairit.

Fushata e këtyre zgjedhjeve është shndërruar në luftë për mbrojtje të Marrëveshjes së Ohrit nga BDI-ja, pavarësisht se për të, pjesa normative dhe zbatimi kishin përfunduar që kur ndryshoi edhe karakterin e saj në parti të gjelbër, shkruan Alsat.

Kreu i kësaj partie, në një sërë daljesh publike, artikulon qëndrime se Marrëveshja e Ohrit po rrezikohet, edhe pse për të gjitha çështjet e ndjeshme për shqiptarët, vetë kjo parti kishte dhënë dritën e gjelbër.

“Marrëveshja është seriozisht e rrezikuar, sepse këta kanë vazhduar kanë hequr balancerin”, tha Ali Ahmeti, Kryetar i BDI-së.

Por, së pari, përpara se balancerin ta hiqte Gjykata Kushtetuese, vetë ministrat e BDI-së kishin firmosur heqjen e tij nën arsyetimin se po keqpërdoret në procesin e punësimit nëpërmjet deklarimit të rrejshëm të përkatësisë etnike nga qytetarët. Së dyti, vendimi i Kushtetueses tregonte nga ana tjetër se çështja normative e Marrëveshjes së Ohrit nuk kishte mbaruar. Ekspertët në vazhdimësi kishin kritikuar BDI-në që për dy dekada në pushtet, nuk kishte arritur të vendoste Badinterin apo votimin e dyfishtë në Gjykatën Kushtetuese me qëllim që të parandalonte mbivotimin.

Pjesë e interesit të Ahmetit, që vazhdimisht artikulon kritika është edhe zbatimi i Ligjit për Përdorimin e Gjuhëve. Me këtë rast, Ahmeti theksoi se është shfuqizuar edhe Inspektorati.

Advertisement

“Kanë hequr Inspektoratin për Gjuhën, kanë bërë degradim nëpër institucione, e kanë hequr gjuhën shqipe nga përdorimi”, u shpreh Ali Ahmeti, Kryetar i BDI-së.

Në fakt, kjo nuk është e vërtetë. Së pari, Inspektorati nuk është shfuqizuar, por është vendosur nën kompetencë të Ministrisë së Drejtësisë dhe kjo është arritur me ndryshimet ligjore të miratuara në Kuvend, ku BDI duke mos marrë pjesë në seancë i toleroi këto ndryshime. Së dyti, BDI-ja kishte votuar për ndryshimet e Ligjit për Riorganizimin e Qeverisë, të cilat parashikonin që inspektoratet të mos ishin organe të pavarura, por të ishin nën kompetencë të ministrive. Lidhur me gjuhën shqipe, Ahmeti, përmend edhe lëndën përpara Gjykatës Kushtetuese.

“Ka pasur iniciativë nga Gjykata Kushtetuese në dhjetor të vitit të kaluar për abrogimin e ligjit të gjuhës”, theksoi Ali Ahmeti, Kryetar i BDI-së.

Në fakt, iniciativa nuk është e Gjykatës Kushtetuese, por e parashtruesve. Gjykata formon lëndë për çdo iniciativë që dorëzohet.

“Tamam i ngjante vitit 89 abrogimi i autonomisë së Kosovës nga Millosheviqi. Dhe jemi organizuar, kemi shkuar para Gjykatës Kushtetuese, jemi vendosur me tenda aty”, tha Ali Ahmeti, Kryetar i BDI-së.

Advertisement

Protesta me tenda as nuk e ka ndaluar e as mund ta ndal Gjykatën Kushtetuese nga marrja e një vendimi. Faktet flasin se Gjykata caktoi seancë përgatitore, ku pritej të kishte ekspertë të brendshëm e ndërkombëtarë, megjithatë fillimisht u anulua për shkak të tragjedisë së Koçanit, ndërsa më pas në mënyrë të çuditshme doli një vendim i Gjykatës Administrative me të cilin u shfuqizua vendimi i Kuvendit për zgjedhjen e gjyqtares kushtetuese Elizabeta Dukovska. Ahmeti tani përgënjeshtron veten, pasi dikur fitonte zgjedhjet duke thënë se Marrëveshja e Ohrit ishte mbyllur.

“Pas miratimit të pjesës normative të Marrëveshjes Paqësore të Ohrit dhe të zbatimit të përditshëm të saj, reformave thelbësore, anëtarësimit në NATO dhe vulosjes së të ardhmes evropiane ka ardhur koha që Bashkimi Demokratik për Integrim të fokusohet tërësisht në cilësinë e të jetuarit e kushteve të jetesës së përditshme”, kishte thënë Ali Ahmeti, kryetar i BDI.

Kandidati për kryetar të komunës së Çairit nga radhët e VLEN, Izet Mexhiti, prezantoi master planin për Çairin të përgatitur nga arkitekti Bajram Vardar. Programi është ndarë në shtatë pika mes të cilave çështja e parkingjeve, komunikacioni dhe monumentet historike dhe kulturore. Masterplani do të jetë pikë rrëfim për përpilimin e planit gjeneral urbanistik në qytetin e Shkupit për zonën e Çairit. Për lehtësimin e komunikacionit Mexhiti paralajmëron dy bulevarde të reja, bulevardi Kroacia dhe Mali i Zi por edhe lidhje përmes malit të Gazibabës deri në Autokomandë.

“Bulevardi “Kroacia” i cili është vazhdimësi i “Bosnja e Hercegovinës”, e lidhë pra pjesën e Butelit me Gazibabën, pra del në Autokomandë. Ndërsa bulevardi Mali i Zi është vazhdimësi e bulevardit “Sllovenia”, që e lidhë pra Butelin me Karposhin dhe Gjorçe Petrovin. Aty ka diku një kilometër, realizimi i saj mund të bëhet ose brenda fakultetit të shkencave natyrore ose jashtë, menjëherë përreth fakultetit të shkencave natyrore, ka një rrugë që mund të del në autokomandë dhe ajo mund dukshëm ta lehtëson komunikacionin”, tha Izet Mexhiti – Kandidat i VLEN për kryetar të Çairit.