Çështja e shtetësisë së dyfishtë ka hapur debat politik pasi VMRO–DPMNE propozoi ndryshime ligjore për kufizimin e saj te deputetët, ndërsa LSDM akuzoi se disa prej tyre kanë shtet rezervë.

Në diskutim nuk ngeli pa u përfshirë edhe presidentja, e cila thotë se kufizimi duhet të përfshijë edhe presidentin dhe ministrat.

“Ekziston mundësia që me ligj të kufizohet shtetësia e dyfishtë dhe mendoj se kjo duhet të vlejë edhe për presidentin dhe ministrat”, tha Gordana Siljanovska–Davkova.

Ajo rikujtoi se Kushtetuta garanton shtetësinë maqedonase, por Ligji për shtetësi parashikon edhe mundësinë e shtetësisë së dyfishtë.

Në nenin 2 të Ligjit për shtetësi thuhet:

Advertisement

Shtetasi i Maqedonisë mund të ketë edhe shtetësinë e një shteti tjetër. Shtetasi i Maqedonisë që ka shtetësi të një shteti tjetër, në vend konsiderohet ekskluzivisht si shtetas i Maqedonisë, përveç nëse me marrëveshje ndërkombëtare përcaktohet ndryshe.

Megjithatë, presidentja rikujton se në legjislacion tashmë ekzistojnë kufizime për funksione të caktuara që janë të rëndësishme për sigurinë e shtetit.

Si shembull përmendi Ligjni për punët e jashtme i cili nuk lejon që ambasadorët të kenë shtetësi të dyfishtë, ndërsa e njëjta vlen edhe për funksione të ndjeshme si drejtori i Agjencisë për Siguri Kombëtare.

Nga Bashkimi Demokratik për Integrim opozitar kanë njoftuar se ndryshimet në Ligjin për deputetët, me të cilat propozohet ndalimi i shtetësisë së dyfishtë për deputetët, do të bllokohen. BDI paralajmëroi gjithashtu se është e mundur që ligjin ta kontestojë në Gjykatën Kushtetuese.

LSDM-ja opozitare dorëzoi edhe një propozim-ligj të vetin, me të cilin parashihet që të gjithë funksionarët e zgjedhur dhe të emëruar, e jo vetëm deputetët, të kenë ekskluzivisht shtetësi maqedonase.

Advertisement

Kryeministri Hristijan Mickoski u bëri thirrje deputetëve që para miratimit të ndryshimeve ligjore të konsultohen me ekspertë të së drejtës kushtetuese.

Ndryshe, në kohën kur u votua Qeveria, doli që dy anëtarë të Qeverisë të kenë shtetësi të dyfishtë.  Ministrja e Energjetikës, Minierave dhe Burimeve Minerale, Sanja Bozhinovska, rezultoi të kishte shtetësi bullgare dhe maqedonase. Ndërsa Zëvendëskryeministri për Politika të Qeverisjes së Mirë, Arben Fetai, doli të jetë i pajisur me shtetësi të Belgjikës dhe të Maqedonisë së Veriut.

Nga ana tjetër, sipas njoftimeve të autoriteteve bullgare mbi 216 mijë pasaporta me shtetësi bullgare u janë lëshuar qytetarëve të Republikës së Maqedonisë së Veriut.

Dy të punësuar në Gjykatën Penale të Shkupit janë arrestuar për ryshfet. Njëri prej tyre me funksion polic gjykate dhe tjetri furnizues i mallrave, janë përfshirë në vepra korruptuese me qëllim që të ndërmjetësojnë në Gjykatën e Apelit dhe Supreme, për një lëndë ku është shqiptuar dënim me 1 vjet burg për prodhim dhe tregim të paautorizuar të armëve. Gjykata i ka caktuar policit gjyqësor paraburgim 30-ditor, ndërsa furnizuesit i cili ndiqet për ndihmë gjatë kryerjes së veprës penale, arrest shtëpiak.

Zëvendëskryeministri Arben Fetai, i cili periudhën e kaluar nuk shkonte në punë, do të largohet nga ekzekutivi, ndërsa këtë informacion para disa javësh e ka ndarë me kryeministrin Hristijan Mickoski. Fetai i cili periudhën e kaluar e humbi pushtetin brenda ASH-së së VLEN-it pas krisjes politike me Azir Aliun dhe Mimoza Musën, i ka thënë Mickoskit se do të rikthehet në Bruksel.“

“Po ne biseduam unë dhe ai personalisht dhe ai personalisht më tha se në të ardhmen nuk do të shihet në Qeveri të cilën e udhëheqë unë, ajo ishte para disa javësh. Ai tha se do të kthehet në Bruksel, duke e pasur parasysh arsimimin e tij, përvojën e tij në kuadër të institucioneve në Bruksel, unë mendoj se ndoshta do të ishte mundësi e mirë të jetë ndonjë i dërguar special në kuadër të Parlamentit Evropian, në kuadër të administratës së Brukselit, kështu që ende mendoj për ato rrethana”, tha kryeministri Hristijan Mickoski në intervistën për TV Sitel.

Ndërkohë figura tjetër në qeveri jashtë koordinimit politik të VLEN-it është ministri Fatmir Limani, për të cilin Bilall Kasami konfirmoi për Alsat se edhe ai nuk do të jetë pjesë e VLEN-it e cila më 9 maj zyrtarisht shkrihet në parti. Megjithatë, nuk dihet nëse edhe ai do të përfshihet në rikonstruimin e Qeverisë të cilin Mickoski e paralajmëron për në fund të muajit maj ose qershor. Parimisht, kryeministri njoftoi se do të ketë ndryshim të disa ministrave dhe do të ketë rotacione brenda partnerëve qeveritar VMRO-VLEN-ZNAM, megjithatë nuk dihet konkretisht se në cilat resorë do të ketë ndryshime. Në një linjë me atë, janë edhe nga koalicioni VLEN, të cilët thonë se aktualisht po angazhohet në zbatimin e prioriteteve programore.

“Aktualisht nuk është diskutuar lidhur me ndryshimet e resorëve në përbërjen e Qeverisë. Në këtë fazë, i gjithë angazhimi i VLEN-it është i përqendruar në proceset që janë në vijim dhe në realizimin e prioriteteve tona programore. Çdo zhvillim me interes publik, do të komunikohet në kohë, ku qytetarët dhe mediat do të informohen për gjitha detajet”, thonë nga VLEN për Alsat.

Ndër emrat e përfolur që pritet të përfshihen me rikonstruimin e Qeverisë është edhe ministri i Drejtësisë Igor Fillkov i cili vjen nga radhët e ZNAM-it, për shkak ngecjeve të reformave gjyqësore, por edhe ai i Kulturës Zoran Lutkov. Gjithashtu përflitet se mund të lëvizin nga pozicionet ministri i Jashtëm, Timço Mucunski dhe ai i Administratës Goran Minçev. Nuk përjashtohet gjithashtu mundësia që të ketë ndryshime, qoftë dhe rotacion mes Ministrisë së Shëndetësisë dhe Ministrisë së Arsimit. /Alsat.mk

Advertisement