Ministri i Ekonomisë dhe Punës, Besar Durmishi, mori pjesë në Kosova Finance Forum 2026, ku theksoi se ndërtimi i besimit në tregjet financiare është parakusht kyç për investime, rritje ekonomike dhe stabilitet në rajonin e Ballkanit Perëndimor.

Në fjalimin e tij, Durmishi vlerësoi se rajoni ndodhet në një moment vendimtar, i karakterizuar nga ndryshime të shpejta ekonomike dhe teknologjike, duke theksuar se besimi nuk është më një koncept abstrakt, por një nevojë konkrete për zhvillim të qëndrueshëm.

“Pa besim nuk ka investime, pa investime nuk ka rritje ekonomike. Prandaj, institucionet duhet të ofrojnë politika të qëndrueshme, transparente dhe të parashikueshme”, deklaroi Durmishi.

Ai nënvizoi se integrimi evropian mbetet prioritet strategjik për Republikën e Maqedonisë së Veriut, duke theksuar se ky proces shkon përtej harmonizimit të legjislacionit dhe përfshin transformim të thellë të modelit ekonomik drejt një ekonomie konkurruese dhe të integruar në tregjet evropiane dhe globale.

Ministri theksoi rolin e rëndësishëm të financimit në zhvillimin industrial, duke vënë në dukje se qasja në kapital është thelbësore për rritjen e bizneseve, veçanërisht për ndërmarrjet e vogla dhe të mesme, të cilat përbëjnë shtyllën kryesore të ekonomisë.

Advertisement

Durmishi bëri të ditur se Ministria e Ekonomisë dhe Punës është duke zbatuar politika që synojnë përmirësimin e klimës së biznesit, mbështetjen e investimeve cilësore dhe nxitjen e inovacionit. Në këtë drejtim, ai përmendi edhe krijimin e Agjencisë për Inovacion dhe Zhvillim – INOVA, si një mekanizëm kyç për mbështetjen e kompanive inovative dhe projekteve me vlerë të shtuar.

Gjithashtu, ai njoftoi për ndryshimet në Ligjin për mbështetjen financiare të investimeve, i cili do të hyjë në fuqi nga viti 2026 dhe do të fokusohet në mbështetjen e investimeve që krijojnë vende të reja pune, avancim teknologjik dhe zhvillim rajonal.

Në fjalën e tij, ministri u ndal edhe te tregu i punës, duke theksuar se janë siguruar 40 milionë euro për masa aktive të punësimit, të fokusuara te të rinjtë, trajnimet, rikualifikimi dhe mbështetja për vetëpunësim.

Ai veçoi sektorët me potencial të lartë, si teknologjitë e informacionit dhe komunikimit (ICT) dhe shërbimet e proceseve afariste (BPO), si shtytës të rëndësishëm të transformimit ekonomik dhe rritjes së konkurrueshmërisë së vendit.

Në fund, Durmishi theksoi rëndësinë e bashkëpunimit rajonal, duke vlerësuar se vendet e Ballkanit Perëndimor mund të arrijnë më shumë përmes veprimit të përbashkët.

Advertisement

“Ballkani Perëndimor ka potencial të madh ekonomik. Sfida jonë është ta shndërrojmë atë në investime konkrete, inovacione dhe zhvillim të qëndrueshëm për qytetarët tanë”, përfundoi ministri Durmishi.

Në periudhën 20–26 prill 2026, në kuadër të projektit CEEPUS PL-1910-02-2526 “Supply Chains Management: From the Perspective of National Industries”, u zhvilluan aktivitete në Akademinë për Studime Ekonomike në Kishinjev, Republika e Moldavisë.

Në këto veprimtari morën pjesë përfaqësues nga Fakulteti Ekonomik i Universitetit të Tetovës: Prof. Dr. Brikend Aziri, dekan i Fakultetit Ekonomik; Prof. Dr. Vjollca Hasani Limani, prodekane për shkencë; si dhe studentet Zana Abazi dhe Era Memedi, nga cikli i parë i studimeve në programin studimor Financa dhe Kontabilitet.

Në përputhje me agjendën e projektit, u mbajt takimi i parë koordinativ i rrjetit, ku përveç UT-së, morën pjesë edhe universitete partnere nga rajoni dhe më gjerë, përfshirë: Universitetin e Tiranës (Shqipëri), Universitetin e Prishtinës (Kosovë), Universitetin e Sarajevës Lindore (Bosnje dhe Hercegovinë), Universitetin e Osijekut (Kroaci), Universitetin Edutus (Hungari), Akademinë për Studime Ekonomike të Moldavisë, Universitetin Mediteranian (Mali i Zi), Universitetin Teknologjik të Lodzit (Poloni) dhe Universitetin Perëndimor të Timisoarës (Rumani).

Në vijim të aktiviteteve, delegacioni zhvilloi një takim koordinativ edhe me Rektorin e Akademisë për Studime Ekonomike të Moldavisë, Alexandru Stratan. Gjatë këtij takimi u diskutuan mundësitë për thellimin e bashkëpunimit ndërinstitucional, përmes formalizimit të marrëveshjeve përkatëse, me fokus në zhvillimin e kërkimit shkencor dhe në shkëmbimin e stafit akademik dhe studentëve.

Gjatë kësaj vizite, Prof. Dr. Brikend Aziri mbajti ligjëratë me temë “The Role of Human Resources in Supply Chain Management”, ndërsa Prof. Dr. Vjollca Hasani Limani ligjëroi mbi temën “Planning and Coordinating Supply and Demand in Supply Chains”. Ndërkohë, studentet Era Memedi dhe Zana Abazi morën pjesë në Simpoziumin Rinor me Pjesëmarrje Ndërkombëtare, ku prezantuan punimin e tyre me titull “Digital Money or Cash: Are We Ready for a Cashless Society?”.

Advertisement

Gjithashtu, në funksion të objektivave të projektit, u realizuan vizita studimore në biznese relevante, të cilat kontribuuan në thellimin e njohurive praktike dhe në fuqizimin e dimensionit aplikativ të procesit mësimor.

Me titullin “Qeverisje Vendore e Shkëlqyer”, Ambasadori i Bashkimit Europian Mihalis Rokas promovoi financimin e projekteve të BE-së. Ai tha se në gjashtë vitet e fundit janë mbështetur 21 komuna, duke promovuar ekselencën, ndërtimin e kapaciteteve dhe trajnimin. Rokas shtoi se Bashkimi Evropian është partner i besueshëm duke përfshirë edhe komunat në këtë vend.

“Duhet të them se janë projekte shumë të suksesshme. Unë vet kam vizituar së fundmi disa komuna në Bogovinë, në Kumanovë, kam qenë në Ohër, në Strugë, kam qenë në Prilep dhe mund të shoh se ekipet e kryetarëve të komunave janë profesionale, punojnë shumë dhe përmes mbështetjes sonë të vazhdueshme kemi arritur të kemi ekipe komunale efikase dhe efektive. Sigurisht që problemet mbeten, ka shumë çështje mjedisore që komunat duhet t’i adresojnë por, siç e dini, ne jemi shumë aktivë edhe me programet ndërkufitare apo programet e bashkëpunimit rajonal”, tha Mihalis Rokas.