Uji në Gostivar vazhdon të jetë i pasigurt për konsum. Ai mund të përdoret vetëm për qëllime teknike, për ruajtjen e higjienës personale dhe pastrimin e shtëpive. Për të hequr ndalimin për pirjen e ujit dhe përgatitjen e ushqimit, nevojiten tri analiza të njëpasnjëshme me rezultate të rregullta. Ministri i Punëve të Brendshme, Pançe Toshkovski, pas përfundimit të mbledhjes së Shtabit të Krizës deklaroi se në ditët në vijim do të shtohen kontrollet e cilësisë së ujit, në mënyrë që të krijohet një pasqyrë më e qartë se kur qytetarët e Gostivarit do të kenë sërish ujë të pijshëm.

Edhe pse në rrjetin e ujësjellësit të Gostivarit ende është e pranishme bakteri, uji mund të përdoret për larje dhe si ujë teknik, ndërsa ndalimi për konsum mbetet ende në fuqi. Megjithëse autoritetet më herët kishin paralajmëruar se kjo baktere mund të shkaktojë infeksione të lëkurës, syve, veshëve dhe traktit urinar, pas mbledhjes së fundit të Shtabit Kryesor të Krizës u bë e ditur se uji është i sigurt për përdorim teknik.

Sa i përket ujit të pijshëm, ende nuk ka afat se kur do të lejohet përdorimi. Do të priten tri analiza radhazi që duhet të konfirmojnë mungesën e baktereve.

Ministri i Punëve të Brendshme u bëri apel qytetarëve që sa më shpesh ta lënë ujin të rrjedhë nga çezmat, pasi krahas hiperklorinimit, kjo ndihmon në përshpejtimin e procesit të pastrimit të rrjetit.

“Në takim u dakorduam se ende kemi situatën e njëjtë faktike lidhur me cilësinë e ujit, respektivisht nuk kemi ujë për të thënë se është në rregull. Mbetemi në rekomandimet e mëparshme. Matja do të bëhet më shpesh dhe sapo të kemi tre rezultate të njëpasnjëshme në të gjitha pikat e matjes në qytet, atëherë qytetarët do t`i njoftojmë se krahas për përdorim teknik, uji mund të përdoret për pije”

Advertisement

Bëhet fjalë për bakterin Pseudomonas aeruginosa, i cili zakonisht shfaqet në ujë të ndenjur. Në periudhën e ardhshme do të shtohen matjet e cilësisë së ujit në pika të ndryshme të rrjetit, ndërsa procesi i hiperklorinimit do të vazhdojë. Sipas autoriteteve, ky bakter shfaqet në ujë të ndenjur që nuk ka qarkulluar nëpër çezma.

“Bakteria më shpesh paraqitet në sistemin e ujësjellëit kur uji nuk qarkullon. Duke marrë parasysh se kishte ndalesë që uji të mos përdoret as teknikisht e as për pije për këtë shkak është vepruar konform protokolleve. Është rritur niveli I klorimit, është bërë pastrimi i rrjetit ujësjellës dhe si laborator këto procese i ndjekim vazhdimisht”

Uji në Gostivar është i ndaluar për pije që nga 17 korriku, pasi autoritetet konstatuan se për 22 ditë pompat kishin futur ujë të ndotur me fekale në rrjetin e ujësjellësit të qytetit. Më 19 korrik u shpall epidemi, ndërsa më 21 korrik Qeveria shpalli gjendje krize 30-ditore në qytet./Tv Koha/ 

Një sipërfaqe bukur e madhe e fushave të Tearcës dhe u përfshi nga zjarri. Intervenimi në kohë i zjarrëfikësve, autoriteteve dhe vetë qytetarëve bëri që zjarri të vihet nën kontroll dhe që të lokalizohet, e më vonë të shuhet tërësisht. Komandanti i Njësitit Territorial Kundër Zjarrit në Tetovë, Avni Ameti thotë se mbi 5 orë kanë bërë luftë me zjarrin deri sa e kanë shuar tërësisht. Sipas tij, më së shpeshti këto llojë zjaresh shkaktohen nga vetë faktori njeri, i cili u bëri apel që qytetarët të kenë kujdes të shtuar meqë në këtë periudhë të thatë, zjarri ndizet dhe përhapet shumë shpejtë.

AVNI AMETI – NJTKZ “Afërsisht 5 apo 6 orë kemi intervenuar në këtë terren këtu me gjitha kapacitetet që ka stacioni i Tearcës dhe i Tetovës, pra u përfshimë gjithë këtu. Po ashtu kemi pasur intervenime të tjera të shumëta dje në Tetovë në sipërfaqe të hapura, gjithsej rreth dhjetë zjarre ka pasur dje në Tetovë. Ka pasur për një muaj rreth 30 intervenime që i ka bërë vetëm nënstacioni i Tearcës, ndërsa stacioni i Tetovës dhe i Bogovinës kanë rritje enorme të zjarreve dhe dihet që faktori njeri është kryesori, apo hedhja edhe e qelqit vend e pa vend që shkaktojnë zjarre me këto përmasa”

Kreu i komunës së Tearcës Daut Memishi, ka paralajmëruar përgjegjësi ligjore për personat që me dashje apo nga pakujdesia shkaktojnë zjarre.

“Nuk kemi konstatuar ende, por vërejtjet e para edhe të zjarrfikësve pasi zjarri ishte përhapur në katër pika të ndryshme, nënkupton se ka qenë zjarrvënie me qëllim. Apeloj miqësisht qytetarëve që të kenë kujdes sepse kjo javë do jetë më e nxehta e vitit, dhe meqë ka zjarre edhe në vende tjera, mundojnë ekipet për intervenim nga ajri sepse dje kërkuam ndërhyrje edhe nga ajri, por falë zjarrfikësve edhe të Tetovës u arrit shpejtë të lokalizohet, por falënderoj edhe banorët që ndihmuan për katër deri pesë orë pra arritën ta lokalizojmë. Sot i kemi në terren ekipet që të vërtetohet sa hektar është djegur. Parandaluam që zjarri të kaplojë edhe komunën e Jegunocit”

Memishi thotë se ka pasur zjarrvënie të qëllimshme brenda muajit edhe nëpër disa fshatra të Komunës së Tearcës të cilat vepra po hetohen dhe autorët do përgjigjen para Ligjit. Ndryshe, intervenimi në 36 raste vetëm nga njësiti i Tearcës për brenda një muaji, sipas Memishit dëmton shumë buxhetin e Komunës së Tearcës, andaj ka apeluar banorët që të bëjnë kujdes sidomos gjatë punimeve apo zjarreve që ndezin në fusha për të pastruar tokat./Tv Koha/

Advertisement