Autoritetet e Kosovës kanë ndaluar importin e produkteve të një qumështoreje nga Maqedonia e Veriut, pasi në disa dërgesa është konstatuar prania e bakterit Escherichia coli (E. coli).

Pas këtij vendimi, Agjencia e Ushqimit dhe Veterinarisë (AUV) në Maqedoninë e Veriut ka paralajmëruar kontroll të jashtëzakonshëm inspektues në qumështoren përkatëse.

Sipas AUV-së, ndalesa është vendosur në fillim të nëntorit, por institucioni pretendon se nuk ka marrë njoftim zyrtar nga autoritetet kosovare.

Ende nuk dihet emri i qumështores, cilat produkte janë të prekura dhe nëse të njëjtat seri janë shitur edhe në tregun vendor.

Ish-drejtori i TEC “Manastir”, Pece Matevski, është dënuar me dy vjet burg për shpërdorim të detyrës zyrtare në një tender publik, që i shkaktoi ndërmarrjes dëme prej rreth 2.9 milionë eurosh.

Sipas vendimit të shkallës së parë të Gjykatës Themelore në Manastir, parregullsitë lidhen me një tender të vitit 2022, me vlerë mbi 11 milionë euro, për nxjerrjen e djerrinës në minierën Brod Gneotino.

Gjykata konstatoi se përjashtimi i ofertës më të lirë të kompanisë “Granit” favorizoi kompaninë “Rud Kop”, duke dëmtuar financiarisht termocentralin.

Gjashtë persona të tjerë morën dënime me kusht, ndërsa tre anëtarë të Komisionit të Prokurimit Publik u liruan nga akuzat.

Dega e BDI-së në Kumanovë ka reaguar ashpër ndaj punësimeve të fundit në Spitalin e Kumanovës, duke akuzuar pushtetin për diskriminim etnik dhe VLEN-in për heshtje përballë përjashtimit të shqiptarëve.

“90 punësime dhe asnjë shqiptar! Një diskriminim i tillë nuk mbahet mend as në ish-Jugosllavi”, thuhet në reagimin e BDI-së, e cila kërkon hetim institucional për kriteret dhe procedurat e punësimit.

Kritikat më të ashpra i janë drejtuar VLEN-it, përfaqësuesit e të cilit, sipas BDI-së, vazhdimisht kanë deklaruar se cilësia duhet të ketë përparësi ndaj përkatësisë etnike.

“A thua vallë, në gjithë Kumanovën nuk paska pasur as edhe një motër medicinale shqiptare të kualifikuar?”, pyet BDI-ja, duke ngritur dyshime nëse heshtja e VLEN-it është çmimi politik për qëndrimin në koalicion me VMRO-DPMNE-në.

Nga BDI theksojnë se rreth 70 mijë shqiptarë gravitojnë drejt Spitalit të Kumanovës dhe kanë të drejtë të përfaqësohen në mënyrë të barabartë në këtë institucion.

Advertisement

“Nuk kërkojmë privilegje, kërkojmë barazi! Nuk kërkojmë lëmoshë, kërkojmë të drejtën që na takon!”, përfundon reagimi.