Lajme nga vendi
Të miturit në Maqedoni, gjithnjë e më shumë shpenzojnë kohën në internet
Tridhjetë e nëntë për qind e të anketuarve të përfshirë në një anketë të kryer nga Agjencia për Komunikime Elektronike thanë se të miturit në familjet e tyre shpenzojnë mesatarisht më shumë se pesë orë të lidhur në internet.
“Përafërsisht gjysma e të anketuarve ose 46.3 për qind e dinë se ekziston një program i kontrollit prindëror që do të sigurojë internet të sigurt për personat nën 18 vjeç. Prej tyre, vetëm 10.2 për qind e kanë instaluar tashmë një softuer të tillë, ndërsa nga ata të anketuar që nuk e kanë instaluar një softuer të tillë dhe e dinë se ekziston, rreth 61 për qind do ta instalonin atë. Rreth 10 për qind e të anketuarve që kanë qëndrim pozitiv ndaj instalimit të softuerit të kontrollit prindëror dhe e dinë se ku mund ta gjejnë atë”, thuhet në raportin e anketimit të opinionit publik nga aspekti i mbrojtjes së përdoruesve të shërbimeve elektronike.
Në katër vitet e fundit, thuhet në analizë, është vërejtur një trend në rritje në numrin e familjeve ku aksesi në internet përdoret edhe nga të miturit.
Në vitin 2022, rreth 43.2 për qind e të anketuarve janë përgjigjur se të miturit përdorin internetin në familjet e tyre dhe 85.6 për qind e tyre të mitur përdorin internetin çdo ditë.
Sipas anketës, numri i përdoruesve të shërbimit të internetit në familje është rritur nga 79 për qind në 89 për qind në pesë vitet e fundit.
Nga të anketuarit që kanë akses në internet në familjet e tyre, vetëm 29.5 për qind e dinë shpejtësinë e lidhjes në internet që duhet të ofrohet nga operatori, dhe 76.8 për qind e tyre besojnë se marrin shpejtësinë dhe sasinë e pritur të të dhënave nga ofruesi i internetit.
Siç thuhet në gjetjet, në katër vitet e fundit ka pasur një rritje të numrit të të anketuarve që janë përballur me një lloj problemi gjatë përdorimit të internetit në shtëpi, pra në vitin 2022 vetëm 29 për qind e të anketuarve nuk kanë pasur problem me lidhjen e tyre të internetit në shtëpi.
Problemet më të shpeshta me internetin janë shpejtësia e paqëndrueshme e lidhjes (34.2 përqind), ndërprerjet/mosdisponueshmëria e shërbimit (30.6 përqind) dhe problemet me pajisjet teknike.
Për shkak të ndërprerjeve apo mosdisponueshmërisë së shërbimit në 12 muajt e fundit, 38.4 për qind e familjeve kanë kontaktuar ofruesin e internetit dhe për 55.7 për qind e tyre problemi që kanë raportuar është zgjidhur në të njëjtën ditë.
Anketa është kryer me pjesëmarrjen e 1100 të anketuarve të moshës 18 vjeç e lart, mes përdoruesve të cilitdo prej shërbimeve të komunikimit elektronik: telefonisë fikse, telefonisë celulare, internetit dhe televizionit.
Mostra është përfaqësuese sipas veçorive të gjinisë, moshës, përkatësisë etnike dhe vendbanimit, në raport me të dhënat zyrtare statistikore në momentin e kryerjes së hulumtimit, të disponueshme në Entin Shtetëror të Statistikave – të dhënat nga regjistrimi i vitit 2021.
Lajme nga vendi
MBJELLJET E GRURIT NË POLLOG NË RREZIK – BUJQIT PËRBALLEN ME KOSTO TË LARTA!
Edhe pse kushtet atmosferike janë të favorshme për mbjelljet vjeshtore, bujqit në rajonin e Pollogut po përballen me pasiguri ekonomike. Çmimet e ulëta të grurit, shpenzimet e larta të prodhimit dhe vështirësitë në shitjen e prodhimit të sivjetshëm po i dekurajojnë fermerët. Agronomët paralajmërojnë se pa masa konkrete mbështetëse, vendi rrezikon të bëhet gjithnjë e më i varur nga importi i grurit.
Vala e fundit e reshjeve ka ndikuar pozitivisht në përmirësimin e mungesës së mëparshme të ujit dhe ka siguruar lagështi optimale dhe produktive në shtresën sipërfaqësore të tokës.
Kjo ka krijuar kushte të favorshme agroekologjike për përfundimin e mbjelljeve vjeshtore dhe për fillimin e zhvillimit vegjetativ të kulturave drithërore.
Agronomi, Alirami Saliu, për Tv Koha, thotë se për mbjelljet vjeshtore ekziston një kalendar i përcaktuar, i cili për kushtet klimatike të rajonit të Pollogut parasheh periudhën nga mesi deri në fund të muajit tetor.
Mbjelljet vjeshtore po hyjnë në fazën përfundimtare. Kushtet atmosferike dhe lagështia në tokë janë të favorshme, por mbetet e paqartë se sa sipërfaqe do të mbillen këtë vit me grurë. Çmimet e ulëta të blerjes, shpenzimet e rritura të prodhimit dhe mungesa e leverdisë ekonomike po i detyrojnë bujqit të heqin dorë nga kultivimi i një pjese të sipërfaqeve bujqësore.
Interesimi i ulët për blerjen e grurit dhe çmimi i ulët i prodhimit të sivjetshëm kanë bërë që një pjesë e fermerëve të mbeten me sasi të pashitura në depot e tyre. Ndërkohë, çmimet e naftës, plehrave artificiale dhe materialeve të tjera të nevojshme për prodhim vazhdojnë të rriten.
Bujqit paralajmërojnë se, nëse shteti dhe Ministria e Bujqësisë nuk ndërmarrin masa konkrete, Maqedonia gjithnjë e më shumë do të bëhet e varur nga importi i grurit.
Kohë më parë nga Ministria e Bujqësisë kanë bërë shpërndarjen e kartelave të naftës së gjelbër për bujqit.
Siç njoftojnë nga Ministria e Bujqësisë, për Tetovën janë ndarë gjithsej 1.577 kartela, në vlerë prej 11.953.292 denarësh, mbështetje e drejtpërdrejtë për uljen e kostove të prodhimit bujqësor.
/Tv Koha/
Lajme nga vendi
BDI: JO VETËM “ALTA BANKA”, EDHE INSULINA NË DUAR TË BOTËS SËRBE!
“Alta Banka” nuk është rasti i vetëm që një kompani serbe po investon në vendin tonë duke tentuar ta shtri ndikimin në vend, thonë nga Bashkimi Demokratik për Integrim.
Arta Bilalli nga kjo parti tha se blerja e Phoenix Pharma nga kompania serbe VEGA, e lidhur me biznesmenin Dejan Çakajac, bashkëpronar i kompanisë së lojërave të fatit Mozzart, është një rast tjetër që dëshmon tezën e opozitarëve.
ARTA BILALLI ZENDELI – BDI
“Më 3 prill 2025, Komisioni për Mbrojtjen e Konkurrencës, me vendimin nr. 08-55, miratoi blerjen e Phoenix Pharma nga kompania serbe VEGA, e lidhur me Dejan Çakajac, bashkëpronar i kompanisë së lojërave të fatit Mozzart. Insulina nuk është biznes i zakonshëm. Është ilaç jetik dhe furnizimi me të është çështje e sigurisë shëndetësore të shtetit. Prandaj, sot pyesim publikisht: Kush e ka vlerësuar rrezikun për sigurinë e furnizimit me insulinë? Pse Komisioni e miratoi këtë përqendrim dhe a ka pasur ndikim politik në këtë vendim?
Megjithatë, sapo përfundoi konferenca, rasti i përmendur nga Arta Bilalli u lidh me Qeverisjen e Arben Taravarit dhe kohën kur ai ka qenë në krye të Ministrisë së Shëndetësisë.
TV Koha kontatoi Taravarin, në një përgjigje me shkrim ai tha se kompania për të cilën flet BDI-ja është kompani private dhe se, shit blerja e kompanive private nuk është kompetencë e ministrit dhe ministries.
ARBEN TARAVARI – Ish Ministër i Shëndetësisë
Kompanitë private, kush i shet dhe kush i blen, nuk janë çështje që bien në kompetencë të Ministrisë së Shëndetësisë. Nuk kam pasur asnjë informacion se kush e ka shitur apo blerë ndonjë kompani të caktuar. Kjo nuk është përgjegjësi e ministrit dhe as e Ministrisë së Shëndetësisë.
Ndryshe, Phoenix Pharma në Maqedoninë e Veriut është një nga kompanitë kryesore të distribucionit me shumicë të barnave dhe produkteve farmaceutike. Roli i saj është shumë i rëndësishëm, sepse lidh prodhuesit e barnave me farmacitë, spitalet, institucionet shëndetësore dhe pacientët./Tv Koha – Shkup/
Lajme nga vendi
Piloti shqiptar shpallet më i miri me avionët F-35 në forcën ajrore të SHBA
Një tjetër histori suksesi që bën krenar çdo shqiptar! Edmond Smajli, pilot me origjinë nga Kosova, është shpallur më i miri në drejtimin e avionëve luftarakë F-35 në Forcën Ajrore të Shteteve të Bashkuara.
F-35 konsiderohet si një nga avionët më të avancuar dhe më të sofistikuar në botë, dhe të arrish të vlerësohesh si më i miri në këtë kategori është një arritje e jashtëzakonshme.
Me profesionalizëm të lartë dhe përkushtim maksimal, Smajli ka arritur të dallojë mes elitës së pilotëve amerikanë, duke dëshmuar aftësi të jashtëzakonshme dhe disiplinë të fortë.
Ky sukses nuk është vetëm personal, por një moment krenarie për gjithë shqiptarët, duke treguar se talenti dhe puna e palodhur nuk njohin kufij.
Një emër që tashmë shkruhet me germa të arta në historinë e aviacionit ushtarak!


You must be logged in to post a comment Login