Lajme nga vendi
Notë “tre” për shkollat nga inspektorët e arsimit: higjienë e dobët dhe mungesë e kompjuterëve
Kushtet e dobëta higjienike në shkolla dhe sallat e sportit, mungesa e mjeteve ndihmëse mësimore (harta gjeografike, globe, hamerë, harta historike, smart tabela, trupa gjeometrikë, herbariume etj.) si dhe mungesa e kompjuterëve dhe pajisjeve kompjuterike në procesin e mësimdhënies janë mangësitë më të shpeshta që i kanë shënuar inspektorët e arsimit në raportet e tyre gjatë vlerësimit të punës së shkollave në Maqedoni. Inspektorati Shtetëror i Arsimit (ISHA) tashmë për më shumë se një dekadë ndjek punën e shkollave dhe mbi bazë të saj edhe i vlerëson ato. Përmes vlerësimit integral, i cili kryhet çdo tre vjet, mund të shihet se cilat janë pikat e forta dhe cilat janë dobësitë e shkollave, shkruan Portalb.mk.
Meta.mk kërkoi informacion dhe të dhëna nga ISHA për inspektimet e fundit të kryera në shkolla, nga ku na dërguan raporte për disa shkolla.
“Në tetor të këtij viti shkollor janë realizuar 12 vlerësime integrale, nga të cilat shtatë në shkolla fillore dhe pesë në ato të mesme. Nga këto 12 shkolla, katër u vlerësuan me notë “pjesërisht kënaq”, dhe tetë shkolla u vlerësuan me notën “mirë”, thonë nga ISHA.
Notat që një shkollë mund t’i marrë për punën e saj janë “shumë mirë”, “mirë”, “pjesërisht kënaq” dhe “e pakënaqshme”. Në vendin tonë asnjë shkollë nuk është vlerësuar si “e pakënaqshme”, bëjnë të ditur nga ISHA.
Sipas indikatorëve, vlerësohet planifikimi dhe përgatitja e procesit mësimor të cilin e realizon secili mësues. Gjithashtu matet dhe vlerësohet përdorimi i qasjeve të ndryshme në mësimdhënie, si dhe nëse ata mbajnë me rregull dhe siç duhet evidencën pedagogjike. Gjithashtu, për të formuar notën në nivel të shkollës shihet edhe se si çdo mësues i vlerëson nxënësit (a e bën këtë në mënyrë të vazhduar, me ndërprerje apo herë pas here duke i zbatuar standardet),shkruan Portalb.mk. Është me rëndësi edhe nëse mësuesi planifikon dhe organizon takime me prindërit dhe nëse ka certifikata për zhvillim profesional. Po ashtu analizohet edhe atmosfera e punës brenda shkollës dhe merret parasysh edhe puna e shërbimit profesional dhe drejtorit të shkollës.
Sa i përket lëndës së TIK-ut, problemi është se klasat ose janë të pajisura dobët me kompjuterë, ose ato që janë nuk përdoren. Ndër “dobësitë” inspektorët e kanë listuar edhe inventarin e vjetërsuar të shkollave, shkollat e pasiguruara, qëllimet e pa përshtatura për ligjërimin e lëndëve sipas nevojave arsimore të nxënësve, mungesën e rampave për qasje për personat me aftësi të kufizuara, shkruan Portalb.mk.
Gjithashtu, në këto “dobësi” bën pjesë edhe ajo që në disa shkolla qasja e mësimdhënësve ndaj mësimdhënies është e njëjtë për të gjithë nxënësit, e kështu është, për shembull, në shkollën “Kiro Spanxhov-Brko” në Kavadar.
“Mësuesit nuk e përshtasin zgjedhjen e detyrave dhe aktiviteteve me nevojat individuale arsimore të nxënësve. Ata nuk i njoftojnë prindërit dhe nxënësit me standardet dhe kriteret e vlerësimit, nuk përdorin metoda të ndryshme vlerësimi, nuk monitorojnë në vazhdimësi ecurinë e nxënësve, nuk i përfshijnë nxënësit në vlerësim nëpërmjet vetëvlerësimit. Shkolla nuk ka procedura të parapara për mekanizmat dhe instrumentet për nxënësit e talentuar, si dhe për identifikimin dhe monitorimin e nxënësve me vështirësi në mësim”, ka shënuar në raportin e tij inspektori përgjegjës për këtë shkollë.
Çdo shkollë ka pikat e saj të forta. Kështu, në “Strasho Pinxhur” në Vevçan, shumica e mësimdhënësve përdorin teknika, forma dhe metoda interaktive bashkëkohore të mësimdhënies, nxënësit marrin pjesë në gara, mësimdhënësit vazhdimisht avancohen me trajnime, kurse, seminare, projekte. Ngjashëm është edhe në “Vëllezërit Milladinovci” në Aerodrom të Shkupit, ku ka pjesëmarrje të madhe në gara dhe suksese të nxënësve në nivel komunal, shtetëror dhe ndërkombëtar.
Roli i vlerësimit integral nuk është represiv, pra nuk ka dënime për shkollat me nota më të ulëta dhe qëllimi është të shihet cilësia e sistemit arsimor në vend.
Dje, zyrtarë policorë nga Sektori për Polici Kriminalistike pranë SPB Tetovë dhe nga ekipi mobil “Task Force”, në koordinim me përfaqësues të Inspektoratit Shtetëror të Tregut dhe Drejtorisë së të Ardhurave Publike, kanë realizuar kontroll aksional në një objekt hotelerie në Qendrën Tregtare të Qytetit në Tetovë.
Me këtë rast, para objektit është zënë një 48-vjeçar nga Tetova dhe gjatë kontrollit tek ai është gjetur një substancë e bardhë pluhur, pas çka është privuar nga liria.
Ndërsa, brenda në objekt, te pronari 54-vjeçar nga fshati Trebosh janë gjetur 15 paketime me substancë të bardhë pluhur, pas çka edhe ai është privuar nga liria.
Të dy janë ndaluar në stacionin policor dhe pas dokumentimit të plotë të rasteve, ndaj tyre do të vijojë parashtresë përkatëse.
…….
Dje në orën 12:00 në Stacionin Policor Gostivar, nga Ndihma e Shpejtë Mjekësore Gostivar është denoncuar se te ata është sjellë një 15-vjeçar nga Gostivari pa shenja jete. Sipas denoncimit, në shtëpinë e tij në Gostivar ai kishte rrëshqitur dhe ka rënë shkallëve, ndërsa pasi është pranuar në spital, pas reanimimit të kryer ka shfaqur shenja jete dhe me automjet të Ndihmës së Shpejtë Mjekësore Gostivar është transferuar në Kompleksin e Klinikave “Nënë Tereza” në Shkup, ku i janë konstatuar lëndime të rënda trupore. Është njoftuar prokurori publik, është kryer këqyrje në vendngjarje dhe po merren masa për zbardhjen e ngjarjes.
…….
Dje në orën 19:10 në Stacionin Policor Tetovë, një 38-vjeçar nga Tetova ka denoncuar se rreth orës 18:30 në rrugën “Todor Cipovski Merxhan”, djali i saj 11-vjeçar është sulmuar fizikisht nga një i mitur tjetër. Po merren masa për zbardhjen e rastit.
……
Dje në orën 22:30 në Hanet e Mavrovës, zyrtarë policorë nga Stacioni Policor Mavrovë kanë privuar nga liria një 22-vjeçar nga Shkupi. Gjatë një kontrolli në trafik është ndaluar automjeti i udhëtarëve “Volksëagen Golf” me targa të Shkupit, të cilin e drejtonte ai, me ç’rast është konstatuar se e drejtonte pa pasur leje drejtimi. Automjeti është konfiskuar dhe pas dokumentimit të plotë të rastit do të vijojë parashtresë përkatëse.
……..
Dje në orën 20:00 në Stacionin Policor Gostivar, një 71-vjeçar nga Gostivari ka denoncuar se rreth orës 18:30 te Stacioni i Autobusëve në Gostivar, derisa po kryente detyrat e punës si taksist, është sulmuar fizikisht nga një person. Po merren masa për zbardhjen e rastit.
…….
Dje në orën 13:25, zyrtarë policorë nga Stacioni Policor Gostivar kanë privuar nga liria një 29-vjeçar nga Gostivari, i cili ditën e mëparshme është denoncuar nga nëna e tij 53-vjeçare se në disa raste e ka kërcënuar. Pas dokumentimit të plotë të rastit, ndaj tij do të parashtrohet kallëzim përkatës.
……
Pas mesnate në orën 02:00 në SPB Tetovë është denoncuar se ka shpërthyer zjarr në një arë në fshatin Sellarcë e Epërme. Zyrtarë policorë nga Stacioni Policor Zherovjan kanë dalë në vendngjarje dhe kanë konstatuar se është djegur kashtë, e cila ishte grumbulluar në disa pirgje. Ekipi i Njësisë Territoriale Kundër Zjarrit e ka shuajtur zjarrin, ndërsa persona të lënduar nuk ka. Këqyrja e vendngjarjes është kryer nga ekipi i SPB Tetovë.
Lajme nga vendi
Në shtator, tetë burra në Maqedoni u diagnostikuan me HIV, vetëm këtë vit janë regjistruar 49 raste të reja
Në shtator të këtij viti, në Maqedoninë e Veriut u regjistruan tetë raste të reja me HIV/AIDS, të gjitha te persona të gjinisë mashkullore, tregojnë të dhënat nga buletini më i ri mujor i Institutit të Shëndetit Publik (ISHP). Katër nga personat e diagnostikuar rishtazi janë të moshës 30 deri në 39 vjeç, ndërsa nga një rast është regjistruar në grupmoshat 15–19 vjeç, 20–29 vjeç, 40–49 vjeç dhe 50–59 vjeç, transmeton Portalb.mk.
Në shtator u raportuan edhe dy raste të vdekjes te persona me HIV, të cilët ishin regjistruar më parë me këtë infeksion, përkatësisht në vitin 2015 dhe 2018. Të dy personat që vdiqën ishin të moshës 40 deri në 49 vjeç. Sipas të dhënave të ISHP-së, nga fillimi i vitit 2026 deri më 30 shtator, në vend janë regjistruar gjithsej 49 raste me HIV/AIDS.
Që nga fillimi i regjistrimit të rasteve, në vitin 1987, e deri në shtator të vitit 2026, në vend janë regjistruar gjithsej 778 persona me HIV/AIDS. Prej tyre, 520 persona jetojnë me HIV/AIDS, 144 kanë vdekur, ndërsa 114 figurojnë si të humbur për ndjekje, përkatësisht si persona që janë shpërngulur jashtë vendit.
Në buletinin për sëmundjet akute infektive thuhet se gjatë shtatorit në Maqedoninë e Veriut katër persona kanë vdekur nga ethet e Nilit Perëndimor, ndërsa gjithsej 1.042 persona janë prekur nga sëmundje akute infektive. Numri i të prekurve është 22 përqind më i lartë krahasuar me të njëjtin muaj të vitit të kaluar, kur ishin regjistruar 854 raste.
“Të katër personat që kanë vdekur ishin të moshës 65 deri në 70 vjeç dhe te ta ishte diagnostikuar forma neuroinvazive e etheve të Nilit Perëndimor. Ata ishin të hospitalizuar në Klinikën Universitare për Sëmundje Infektive dhe Gjendje Febrile në Shkup, ndërsa te të gjithë ishin regjistruar edhe sëmundje shoqëruese”, thuhet në buletin.
Epidemia e etheve të Nilit Perëndimor është ende në vazhdim.
Pjesa më e madhe e sëmundjeve infektive të regjistruara në shtator ishin infeksione të zorrëve. Nga gjithsej 1.042 rastet e raportuara, 694 ishin raste me enterokolit, që përbëjnë 66,6 përqind të të gjitha sëmundjeve akute infektive të regjistruara.
Krahasuar me shtatorin e vitit të kaluar, kur ishin raportuar 465 raste me enterokolit, këtë vit është shënuar rritje prej 49,2 përqind. Nga fillimi i këtij viti deri në fund të shtatorit janë regjistruar 4.313 raste, që është 43,1 përqind më shumë sesa në të njëjtën periudhë të vitit të kaluar.
Në vendin e dytë për nga shpeshtësia janë lija e dhenve, me 123 persona të prekur, të ndjekura nga salmoneloza me 56 raste, zgjebja me 47 raste dhe infeksionet bakteriale e intoksikimet e shkaktuara nga ushqimi me 30 raste.
Në shtator u regjistruan edhe 29 raste të mononukleozës infektive, tetë raste të sëmundjes së legjionarëve dhe gjashtë infeksione të shkaktuara nga bakteri Escherichia coli.
Lajme nga vendi
Ministria e Transformimit Digjital në RMV bllokon përkohësisht trafikun e jashtëm në internet si masë parandaluese
Ministria e Transformimit Digjital informon se, si pjesë e aktiviteteve parandaluese, trafiku i jashtëm në internet në sistemet e prekura është bllokuar përkohësisht, me qëllim parandalimin e shfrytëzimit të mundshëm të dobësive.
Prandaj, ata theksojnë se Ministria, përmes Sektorit të Sigurisë Kibernetike dhe ekipit qeveritar të sigurisë kompjuterike (MKD-GOV-CSIRT), vazhdon me monitorimin e zgjeruar dhe të vazhdueshëm të kërcënimeve kibernetike, analizën e ngjarjeve të sigurisë dhe të dhënave të regjistrave, si dhe kontrollin e treguesve të mundshëm të kompromentimit.
Përndryshe, institucionet qeveritare dhe kompanitë në të gjithë Evropën dhe botën u detyruan të mbyllin faqet e tyre të internetit dje, pasi u zbuluan të meta serioze në gjuhën e programimit mbi të cilën bazohet pjesa më e madhe e internetit, raportuan mediat botërore.
Ministria e Transformimit Digjital informon se, si pjesë e aktiviteteve parandaluese, trafiku i jashtëm i internetit në sistemet e prekura u bllokua përkohësisht, me qëllim parandalimin e shfrytëzimit të mundshëm të dobësive.
Më pas, shtohet, u kryen kontrolle në versionet e softuerit dhe u aplikuan patch-e dhe përditësime të përshtatshme sigurie, si dhe u kontrollua funksionaliteti dhe siguria e serverëve të internetit.
Masat, thonë nga Ministria, synojnë të zvogëlojnë rrezikun e aksesit të paautorizuar dhe kompromentimit të mundshëm të serverëve të internetit.
“Sipas kontrolleve të kryera deri më tani, nuk janë gjetur indikacione për shfrytëzim të suksesshëm të dobësive të listuara ose për kompromentimin e faqeve të internetit të Qeverisë dhe ministrive”, thuhet në njoftim.
Kronika e zezë – Tetovë dhe Gostivar, 22 Tetor
“Stolat” e betonit u rrokullisën në bulevard, Rama ironizon pedagogët dhe refuzimin e tyre për dialog: Erdhën përsëri…
Në shtator, tetë burra në Maqedoni u diagnostikuan me HIV, vetëm këtë vit janë regjistruar 49 raste të reja
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
