Një valë e nxehtë ajrore do ta mbajë Maqedoninë nën diell të fortë deri në fund të javës së ardhshme, ndërsa temperaturat pritet të kalojnë 40 gradë Celsius. Periudha më kritike pritet të nisë nga e mërkura, 5 gusht, ndërsa kujdes të veçantë duhet të tregojnë të moshuarit, fëmijët, gratë shtatzëna, të sëmurët kronikë dhe punëtorët që punojnë në ambiente të hapura.

Vendi hyn në një periudhë më të gjatë me mot me diell dhe shumë të nxehtë, ku aktivitetet e përditshme, lëvizja në qytet, puna jashtë, madje edhe qëndrimi i shkurtër në një automjet të mbyllur, mund të paraqesin rrezik serioz për shëndetin.

Sipas metereologëve sot temperaturat do të ngriten deri në 39 gradë Celsius. Megjithatë, kjo është vetëm fillimi i periudhës së vapës ekstreme.

Në temperatura shumë të larta, organizmi e ka më të vështirë të ruajë temperaturën normale të trupit. Kur temperatura e ajrit afrohet ose e tejkalon temperaturën e trupit të njeriut, ftohja natyrale vështirësohet, veçanërisht kur lagështia e ajrit është e lartë.

Prandaj, mos prisni të ndieni etje për të pirë ujë. Konsumoni lëngje rregullisht gjatë gjithë ditës.

Advertisement

Instituti i Shëndetit Publik rekomandon që ekspozimi i drejtpërdrejtë në diell dhe aktivitetet në ambiente të hapura të shmangen nga ora 11:00 deri në 17:00.

Vapa nuk ndikon njësoj tek të gjithë. Më të rrezikuarit janë: personat mbi 60 vjeç; gratë shtatzëna; foshnjat dhe fëmijët; të sëmurët kronikë; qytetarët në gjendje të rënduar sociale; personat me mbipeshë;  punëtorët që kalojnë pjesën më të madhe të ditës në ambiente të hapura.

Punëtorët e ndërtimtarisë, bujqit, policët e trafikut, korrierët dhe të gjithë ata që punojnë nën diell janë ndër kategoritë më të ekspozuara.

Ditët në vijim do të kërkojnë ndryshim të ritmit të përditshëm: detyrat të kryhen herët në mëngjes ose në mbrëmje, aktivitetet fizike të kufizohen dhe një shishe me ujë të jetë pjesë e domosdoshme sa herë që dilni nga shtëpia.

Vapa nuk mund të shmanget, por pasojat e saj mund të parandalohen në masë të madhe me kujdes dhe respektimin e rekomandimeve të autoriteteve shëndetësore./Tv Koha/

Advertisement

Sot në orën 07:30, zyrtarë policorë nga DPB Gostivar kanë privuar nga liria një 58-vjeçar nga fshati Raven i Gostivarit, për shkak të dyshimit të bazuar për veprën penale të kryer “prodhim i paautorizuar dhe lëshim në qarkullim i drogave narkotike, substancave psikotrope dhe prekursorëve”. Gjatë kontrollit në shtëpinë e tij dhe në hapësirat ndihmëse, të kryer në bazë të urdhrit gjyqësor, janë gjetur dhe konfiskuar një substancë e bardhë pluhur, marihuanë dhe fishekë pistolete. Ai është ndaluar në stacionin policor dhe pas dokumentimit të plotë të rastit, ndaj tij do të vijojë kallëzimi përkatës.

……Dje në DPB Gostivar është raportuar se në periudhën prej datës 29.07 në orën 22:00 deri në orën 09:40 të datës 30.07.2026, në një parkim në rrugën “Goce Delçev” në Gostivar, një plumb qorr nga një armë zjarri ka goditur çatinë e një automjeti të parkuar “Mercedes” me targa gjermane, në pronësi të një qytetari nga Gostivari. Nuk ka persona të lënduar, ndërsa plumbi është marrë nga zyrtarët policorë për procedurë të mëtejshme. Është kryer këqyrja në vendngjarje dhe po merren masa për zbardhjen e rastit.

……Dje në orën 16:25 në SPB Tetovë, një 27 vjeçar nga Tetova ka raportuar se në rrugën “Dimo Gavrovski Kara” në Tetovë, pas një mosmarrëveshjeje paraprake për një vend parkimi, është sulmuar fizikisht nga një 54-vjeçar nga fshati Bogovinë e Tetovës. Po merren masa për zbardhjen dhe dokumentimin e rastit.

……Dje në orën 20:15 në fshatin Neproshten të Tetovës, zyrtarë policorë nga Stacioni Policor Tearcë kanë privuar nga liria një 20-vjeçar nga fshati Xhepçisht, pasi tek ai është gjetur dhe konfiskuar marihuanë. Pas dokumentimit të plotë të rastit, ndaj tij do të dorëzohet parashtresë përkatëse.

……Dje në orën 20:30 në Stacionin Policor Gallatë, një 34-vjeçar nga fshati Vrapçisht i Gostivarit, ka raportuar se rreth orës 18:45 në fshat është sulmuar fizikisht nga fqinjë i tij. Po merren masa për zbardhjen e rastit.

Advertisement

……Pas mesnate në orën 02:20 në rrugën “18 Nëntori” në Gostivar, zyrtarë policorë nga DPB Gostivar kanë privuar nga liria një 34-vjeçar nga Gostivari. Paraprakisht, bashkëshortja e tij 36-vjeçare ka raportuar se rreth orës 23:00, pas një mosmarrëveshjeje të shkurtër, e ka sulmuar fizikisht në shtëpinë familjare dhe nga çanta e saj ka marrë para dhe çelësat e automjetit të saj dhe është larguar. Ai është ndaluar në stacionin policor dhe pas dokumentimit të rastit do të vijojë kallëzimi përkatës.

Gjatë këtyre 24 muajve kemi arritur rezultate të dukshme në shumë fusha, ndërsa në shëndetësi nisëm ndryshime që prekën drejtpërdrejt mjekët, pacientët dhe familjet e tyre – thanë në një press-konferencë nga VLEN.  Sipas tyre, një nga premtimet kryesore ishte punësimi i 600 specializantëve privatë në shëndetësinë publike. Tani, sic thonë nga VLEN,me vendimin e Qeverisë për punësimin e grupit të dytë prej 300 specializantësh, ky premtim po përmbushet.

KALTRINA BEQIRI – Grupi i parë prej 300 specializantësh tashmë është punësuar, ndërsa vazhdon procesi për punësimin e grupit të dytë. Synimi është që ky proces të përfundojë deri në fund të këtij viti. Kjo është një mundësi që 300 mjekë të rinj, të cilët e kanë nisur specializimin me shpenzimet e tyre, të bëhen pjesë e sistemit publik dhe ta ndërtojnë të ardhmen këtu, në vendin e tyre. Në të njëjtën kohë, spitalet që prej vitesh përballen me mungesë specialistësh do të përforcohen me kuadrin që u nevojitet. Përparësi do të kenë spitalet e përgjithshme dhe klinike jashtë Shkupit, si dhe specializimet ku mungesa e mjekëve është më e madhe.

Kjo është veçanërisht e rëndësishme për qytetarët e Tetovës, Gostivarit, Kërçovës, Strugës dhe qyteteve tjera. Ata nuk duhet të humbin një ditë të tërë, të shpenzojnë për rrugë dhe të udhëtojnë drejt Shkupit për një kontroll që mund dhe duhet ta marrin pranë shtëpisë.

Nuk mjafton vetëm të ndërtojmë spitale dhe të blejmë pajisje. Spitalet kanë nevojë për mjekë. Prandaj, krahas investimit historik prej 74 milionë eurosh në Spitalin klinik të Tetovës dhe hapjes së rrugës për ndërtimin e spitalit të ri në Kërçovë, po investojmë edhe te njerëzit që kujdesen për shëndetin dhe shpëtojnë jetë.

Ne premtuam punësimin e 600 specializantëve dhe po e përmbushim zotimin. Mjekët e rinj do ta ndërtojnë të ardhmen këtu, spitalet do të përforcohen, ndërsa qytetarët do të marrin shërbime shëndetësore më pranë vendbanimit të tyre.

Advertisement