Prej 30 deri në 35 për qind e njerëzve në Maqedoni tashmë kanë problem me obezitetin, ndërsa në botë ky numër është një miliard. Në dhjetë vjet, sipas projeksioneve, do të rritet për 50 për qind, jo vetëm në shtetet e zhvilluara, por edhe në shtetet në zhvillim siç jemi ne. Pra nuk është problem vetëm për popullatën që ka kushte më të mira jetese, por edhe për shtet në zhvillim, theksoi ministri i Shëndetësisë Arben Taravari në konferencën e sotme për shtyp me rastin e Ditës Botërore të Obezitetit.

Siç theksoi Taravari, në vend janë dy qendra për trajtimin e obezitetit, përkatësisht Klinika e Endokrinologjisë dhe Spitali i Përgjithshëm i Qytetit “8 Shtatori”, por, siç tha, së shpejti Klinika e Endokrinologjisë do të disperzohet edhe në Prilep. Ai theksoi se Ministria e Shëndetësisë dhe Fondi i Sigurimeve Shëndetësore tashmë kanë furnizuar terapinë me insulinë dhe gjithçka që nevojitet për personat me diabet.

“Ne si Ministri e Shëndetësisë, së bashku me Fondin për Sigurim Shëndetësor, dëshirojmë të lavdërohemi se këtë vit tashmë kemi terapi me insulinë dhe gjithçka që nevojitet për personat me diabet, tashmë është siguruar dhe jemi në procedurë për të siguruar rreth 10-20 për qind më shumë. Gjithashtu trajtim do të ketë edhe për pacientët me diabet dhe obezitet, të cilët trajtohen me terapi specifike. Këtë vit, ky numër do të rritet me 200 pacientë të tjerë, që është një numër relativisht i madh. Po ashtu, sensorët në dy vitet e kaluara kanë qenë për 650 pacientë, këtë vit do të jenë 800 pacientë, që është një numër relativisht i mirë, megjithëse nuk është plotësisht i mjaftueshëm, nuk është vetëm për pacientët, pra fëmijët tashmë me diabet, por edhe pacientë të tjerë që janë në grupet e rrezikut”, tha Taravari.

Shtoi se për herë të parë në shtet, Fondi për Sigurim Shëndetësor dhe Ministria e Shëndetësisë do të mbulojnë 25 pacientë të cilët do të mund t’i nënshtrohen operacionit.

“Gjithashtu të paralajmëroj se çfarë risi,  për herë të parë në shtet, 25 pacientë  përmes Fondit dhe Ministrisë do të mund të operohen,  nëse janë obezë dhe ka indikacione për operacion, i cili do të mbulohet plotësisht dhe do të jetë sistemi më i mirë, të them, që është hera e parë që po ndodh diçka e re në shtetin tonë”, tha Taravari.

Advertisement

Në konferencën e sotme për shtyp i pranishëm ishte edhe drejtori i Fondit për Sigurim Shëndetësor, Sasho Klekovski, i cili theksoi se këtë vit për herë të parë është miratuar buxheti për kryerjen e kirurgjisë bariatrike në Klinikën për Kirurgji Digjestive. Këto mjete, theksoi Klekovski, janë rreth 120 milionë denarë.

“Ideja është që kur ka indikacione të forta mjekësore, jo estetike, këtu indikacione të forta mjekësore, kur pesha nuk mund të kontrollohet në asnjë mënyrë tjetër, t’i qaset ndaj kësaj mënyre të ndërhyrjes. Këtu duhet të pranojmë se obezitetin nuk e shohim më si problem estetik, por si problem shëndetësor dhe si investim në shëndetin e individëve, sepse disa gjëra si diabeti nuk mund të zgjidhen pa rregullimin e peshës”, tha Klekovski.