Lajme nga vendi
Ministria e Financave: Pagesat e pagave dhe kompensimeve kryhen rregullisht në përputhje me ligjin, pretendimet e “Të majtës” janë të pabaza
Ministria e Financave hedh poshtë kategorikisht dezinformatat e publikuara sot nga “E majta”.
Si çdo proces zgjedhor, po ashtu edhe në fillim të këtij procesi, Ministria e Financave parashtroi njoftim deri te të gjithë shfrytëzuesit buxhetorë, me ç’rast gjatë shpenzimit të mjeteve buxhetore në periudhën parazgjedhore, duhet t’i marrin parasysh kufizimet në përputhje me dispozitat e Kodit Zgjedhor dhe Ligjit të Buxheteve.
Në njoftimin drejtuar shfrytëzuesve buxhetorë, Ministria e Financave i referohet nenit 8-a, paragrafi 1, alineja 2 të Kodit Zgjedhor:
“Nga dita e miratimit të Vendimit për shpalljen e zgjedhjeve deri në përfundimin e zgjedhjeve për president të Republikës së Maqedonisë, për deputetë në Kuvendin e Republikës së Maqedonisë dhe deri në zgjedhjen e Qeverisë së Republikës së Maqedonisë sipas rezultateve të zgjedhjeve, si dhe nga dita e miratimit të Vendimit për shpalljen e zgjedhjeve e deri në përfundimin e zgjedhjeve për zgjedhjen e kryetarit të komunës ose anëtarëve të këshillit, përkatësisht deri në konstituimin e këshillit të komunave dhe qytetit të Shkupi, nuk mund:
– të kryhen pagesat e pagave, pensioneve, ndihmës sociale dhe pagesat e tjera, si dhe kompensimet nga mjetet buxhetore ose nga mjetet e fondeve publike të cilat nuk janë pagesa të rregullta mujore, përkatësisht të gjitha transfertat dhe pagesat njëvjeçare ose transfertat e njëhershme nga mjetet buxhetore ose nga mjetet e fondeve publike, as të tjetërsohet kapitali shtetëror dhe as të nënshkruhen marrëveshje kolektive”.
Theksojmë qartë: Ministria e Financave nuk ka refuzuar asnjë urdhërpages për pagesën e asnjë lloj detyrimi ndaj të punësuarve në përputhje me ligjin. Përkatësisht, në përputhje me Ligjin e Buxheteve dhe Kodin Zgjedhor, kryhen rregullisht pagesat e pagave, shtesat dhe kompensimet e pagave që lidhen me punën në ditët e festave, punën e natës, punën gjatë ditëve të diela, punën jashtë orarit të punës, si dhe të drejtën e kompensimit të pagës për vdekjen e ndonjë anëtari të familjes, punën në terren etj.
Prandaj, të gjitha pretendimet e së “Majtës” janë të pabaza, keqdashëse dhe kanë vetëm një qëllim – të përhapin panik dhe të manipulojnë publikun.
I rekomandojmë të “Majtës” në vend që të merren me konfuzione, një herë e përgjithmon ta lexojnë Kodin Zgjedhor dhe Ligjin e Buxheteve dhe të informohen se si funksionon aparati shtetëror.
Ministria e Financave do të vazhdojë të zbatojë me konsistencë dispozitat ligjore dhe njëkohësisht do të garantojë që të mbrohen gjitha të drejtat e të punësuarve.
Lajme nga vendi
Arben Fetai godet politikën e vjetër: ‘Dy dekada makiavelizëm për pushtet, koha e VLEN ka ardhur’
Zëvendëskryeministri dhe një nga Lideret e VLEN, Arben Fetai ka reaguar me një postim të fortë ndaj politikës së vjetër shqiptare në Maqedoninë e Veriut, duke theksuar se për dy dekada të njëjtët njerëz kanë justifikuar çdo padrejtësi ndaj shqiptarëve dhe kanë mbjellë politikë makiaveliste me synim të vetëm pushtetin.
“Për 20 vite, të njëjtët njerëz që çdo keqbërje ndaj shqiptarëve e justifikonin me ‘ku të shkojmë’, vazhdojnë të mbjellin politikë makiaveliste. Me çdo formë, me çdo mjet propagandistik, synojnë vetëm një gjë – pushtetin. Sepse vetëm ashtu dinë të jetojnë”, shkruan Fetai.
Ai kujtoi edhe periudhën e negociatave të paszgjedhjeve të kaluara, duke përmendur emra konkretë nga BDI-ja.
“E kujtojmë mirë kohën kur kryenegociatori i BDI-së, Fatmir Besimi, pas 150 mijë votave shkonte të bënte koalicione. E ato negociata zgjatnin 10 minuta – mjaftonte fjala e Sasho Mijallkovit për ndarjen e posteve!”, theksoi ai.
Sipas Fetait, kjo mënyrë e vjetër e të bërit politikë ka marrë fund me ardhjen e forcës së re politike VLEN.
“Kjo politikë mori fund më 19 tetor. VLEN është forca që mendon, vepron dhe mbron. Asnjëherë kundër kombit, asnjëherë kundër askujt”, përfundon ai.
Lajme nga vendi
Studentët e Fakultetit të Arteve të UT-së e vizituan ekspozitën e profesorit Miftar Memeti në Galerinë “Bezisten” në Shtip
Pas hapjes zyrtare të ekspozitës së profesorit dhe piktorit të njohur Miftar Memeti, studentët e Fakultetit të Arteve të Universitetit të Tetovës, drejtimi Art Figurativ, më 29 tetor 2025, realizuan
një vizitë studimore në ambientet e Galerisë së Arteve “Bezisten” në Shtip.
Në këtë vizitë ishte i pranishëm edhe vetë profesori Miftar Memeti, i cili zhvilloi një bashkëbisedim të hapur me studentët, duke ndarë përvoja të vlefshme nga karriera e tij artistike dhe akademike. Ai foli mbi procesin krijues, rëndësinë e origjinalitetit, kërkimit dhe pasionit në artin bashkëkohor.
Studentët ishin të shoqëruar nga prodekania për arsim, profesoresha e Historisë së Artit Jëlldëz Asani, dhe profesoresha e vizatimit Drenusha Palloshi. Ata u pritën ngrohtësisht nga drejtoresha e
galerisë dhe kuratori i ekspozitës, të cilët e prezantuan konceptin dhe mënyrën e organizimit të kësaj ekspozite.
Në hapësirat e galerisë ishin ekspozuar vepra nga cikle dhe teknika të ndryshme artistike, vizatime me goditje të sakta e karakteristike, si dhe piktura në vaj mbi pëlhurë, të realizuara me një paletë të gjerë ngjyrash, që dëshmojnë mjeshtërinë dhe vizionin e veçantë të autorit.
Në veçanti spikatnin dy piktura monumentale të portretit të Nënë Terezës, të cilat ruajnë dorëshkrimin e njohur të artistit përmes formave konceptuale dhe frymës postmoderne që e
karakterizon krijimtarinë e tij.
Në tërësi, veprat e profesor Miftar Memetit reflektojnë freskinë e impresionizmit, lëvizjen e lirë të ngjyrave dhe ndjesinë e hapësirës, duke i dhënë artit të tij një dimension komunikues ku edhe
publiku bëhet pjesë e procesit krijues.
Studentët shprehën mirënjohjen e tyre për mundësinë e këtij takimi me një artist të kalibrit akademik e kombëtar, i cili përmes shembullit dhe përvojës së tij frymëzon brezat e rinj të ecin me
përkushtim në rrugën e artit.
Kjo vizitë u vlerësua si një përvojë e vlefshme praktike dhe frymëzuese, që forcon lidhjen midis edukimit universitar dhe jetës artistike në vendin tonë.
Lajme nga vendi
Kandidati i VLEN-it për Dollnenit, Islami kërkon mbështetje për të drejtuar komunën në mandatin e ardhshëm
Kandidati i VLEN-it për Komunën e Dollnenit, Blerim Islami, para banorëve dhe përfaqësuesve politik të koalicionit, shpalosi vizionin e tij për komunën dhe kërkoi mbështetje për të drejtuar komunën në mandatin e ardhshëm. Nga VLEN kërkuan unitet etnik dhe fetar kurse thanë se Islami personifikon karakterin e komunës. Islami ka premtuar investime në arsim, furnizim me ujë të pijshëm, ndërtimin e një poliklinike, përmirësim të infrastrukturës duke përfshirë rrugët kryesore dhe rrugicat në të gjithë komunën, hapjen e një zone teknologjike industriale, rrjet të zgjeruar kanalizimi, dhe menaxhim efikas me mbeturinat.
“Ndodhemi në fshatin Debresh. Kemi vizitë nga përfaqësues qeveritar. Me ne sot është Afrim Gashi, kryetar i Parlamentit, e kemi zv.kryeministrin e parë, z. Izet Mexhiti dhe kryetarin e Alternativës z. Zeqirija Ibrahimi. Vizita e tyre këtu është ndihmë e madhe për ne. Kudo që shkojmë, çdo shtab që vizitojmë ndihet atmosfera e fitores dhe shpresojmë që më 2 nëntor të festojmë së bashku këtu në Dollnen”, deklaroi Blerim Islami, Kandidat i VLEN-it për Dollnenin. /Alsat.mk
Arben Fetai godet politikën e vjetër: ‘Dy dekada makiavelizëm për pushtet, koha e VLEN ka ardhur’
Studentët e Fakultetit të Arteve të UT-së e vizituan ekspozitën e profesorit Miftar Memeti në Galerinë “Bezisten” në Shtip
Kandidati i VLEN-it për Dollnenit, Islami kërkon mbështetje për të drejtuar komunën në mandatin e ardhshëm
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
