Lajme nga vendi
Nexhmedin Sadiku – kandidat i VLEN për Likovën
Të nderuar qytetarë të Likovës sonë,
Komuna e jonë, e cila i dha më së shumti shqiptarisë atëherë kur kishte nevojë, mori më së paku në më shumë se 20 vite keqqeverisje të BDI-së në nivel qendror dhe lokal. Likova u bë shembull i pabarazisë në zhvillim, i ndarjes së padrejtë të buxhetit, i neglizhencës e i papërgjegjësisë.
Premtuan infrastrukturë, kulturë e sport, ndërsa e lanë Likovën pa nevojat themelore: PA UJË TË PIJSHËM, pa kanalizim, të mbytur në mbeturina e të helmuar nga deponi e qe besa edhe nga materiale të rrezikshme kancerogjene.
E premtuan ujësjellësin, e premtuan kanalizimin, premtuan pastrimin e deponive e fabrikë për mbeturinat. Asnjërën nuk e bënë.
Likova nuk ua pati borxh këtë nënçmim. Likova ua dha djemtë më të mirë, ua dha edhe votat, por mori vetëm përbuzje, nënçmim e neglizhencë.
Prandaj, të nderuar,
Kemi dalë para jush që ta kërkojmë besimin tuaj për ta ndalur këtë nënçmim që po i bëhet vendit tonë. Vetëm për një vit në Qeveri, ne e dëshmuam se Likovën nuk e lëmë pas dore siç bënin ata. Qeveria VLEN ndau 250 milionë euro në vit për komunat, ndërsa 1/3 e këtyre fondeve u investuan në komunat shqiptare.
Qeveria financoi me 1,8 milion euro rrugën Orizare – Sllupçan, të cilën kryetari aktual ka kohë që po e premton, por nuk e realizoi kurrë.
Gjithashtu ndamë 30 milionë denarë për rikonstruimin e rrugës Gllazhnje-Gushincë.
Financuam me 5 milionë denarë fushën e hapur sportive pranë Shkollës Fillore në Ropalcë.
Financuam rregullimin e shtratit të rrjedhës ujore në Orizarë, dhe
Mbi 110 milionë denarë për rrugë lokale në Likovë, Nikushtak, Vaksincë dhe Sllupçan.
Të gjitha këto në vetëm 1 vit qeverisje.
Ne kërkojmë besimin tuaj edhe në nivel lokal, ta rrumbullakësojmë Ndryshimin e filluar në maj të vitit 2024 dhe t’i vazhdojmë punët e mira për Likovën.
Me mbështetjen e Qeverisë, të sigurojmë UJË TË PIJSHËM për çdo familje të fshatrave të Likovës brenda vitit të parë të mandatit tim. Secili qytetar i Likovës meriton dinjitet, e jo të përballet me mungesë elementare të ujit, edhe atë në Likovën e dy pendave.
Kërkojmë besimin tuaj për ta përmbyllur ndërtimin e rrjetit të kanalizimit për të gjithë Likovën.
T’i heqim deponitë nga vendbanimet tona, ta pastrojmë tokën nga arseni dhe ta ndalim katastrofën ekologjike dhe shëndetësore që po na rrezikon çdo ditë.
Të sjellim investime dhe zhvillim, ta përkrahim bujkun, blegtorin, arsimtarin dhe për çdo qytetar të Likovës të krijojmë kushte jete NË LIKOVË. Ta ndalim migrimin masiv në Perëndim dhe ta mbajmë rininë në vendin tonë.
Bashkëqytetarë të mi të dashur,
19 tetori është dita kur mund ta ndalim këtë nënçmim. Ju i keni pa këta që ishin 20 vjet, na keni pa edhe neve. Ju dini të bëni dallimin mes të mirës dhe të keqes. Dhe këtë do ta dëshmojmë bashkë më 19 tetor. Do të zgjedhim dinjitetin, krenarinë, zhvillimin dhe para se gjithash, respektin për Likovën. Respektin për fjalën e dhënë, respektin për të mirën e përbashkët, respektin për taksat tuaja. Ju më njihni mua dhe unë ju njoh juve. E dini siç e di unë se ky është kombinimi me të cilin LIKOVA FITON!
Ju faleminderit.
Lajme nga vendi
Arben Fetai godet politikën e vjetër: ‘Dy dekada makiavelizëm për pushtet, koha e VLEN ka ardhur’
Zëvendëskryeministri dhe një nga Lideret e VLEN, Arben Fetai ka reaguar me një postim të fortë ndaj politikës së vjetër shqiptare në Maqedoninë e Veriut, duke theksuar se për dy dekada të njëjtët njerëz kanë justifikuar çdo padrejtësi ndaj shqiptarëve dhe kanë mbjellë politikë makiaveliste me synim të vetëm pushtetin.
“Për 20 vite, të njëjtët njerëz që çdo keqbërje ndaj shqiptarëve e justifikonin me ‘ku të shkojmë’, vazhdojnë të mbjellin politikë makiaveliste. Me çdo formë, me çdo mjet propagandistik, synojnë vetëm një gjë – pushtetin. Sepse vetëm ashtu dinë të jetojnë”, shkruan Fetai.
Ai kujtoi edhe periudhën e negociatave të paszgjedhjeve të kaluara, duke përmendur emra konkretë nga BDI-ja.
“E kujtojmë mirë kohën kur kryenegociatori i BDI-së, Fatmir Besimi, pas 150 mijë votave shkonte të bënte koalicione. E ato negociata zgjatnin 10 minuta – mjaftonte fjala e Sasho Mijallkovit për ndarjen e posteve!”, theksoi ai.
Sipas Fetait, kjo mënyrë e vjetër e të bërit politikë ka marrë fund me ardhjen e forcës së re politike VLEN.
“Kjo politikë mori fund më 19 tetor. VLEN është forca që mendon, vepron dhe mbron. Asnjëherë kundër kombit, asnjëherë kundër askujt”, përfundon ai.
Lajme nga vendi
Studentët e Fakultetit të Arteve të UT-së e vizituan ekspozitën e profesorit Miftar Memeti në Galerinë “Bezisten” në Shtip
Pas hapjes zyrtare të ekspozitës së profesorit dhe piktorit të njohur Miftar Memeti, studentët e Fakultetit të Arteve të Universitetit të Tetovës, drejtimi Art Figurativ, më 29 tetor 2025, realizuan
një vizitë studimore në ambientet e Galerisë së Arteve “Bezisten” në Shtip.
Në këtë vizitë ishte i pranishëm edhe vetë profesori Miftar Memeti, i cili zhvilloi një bashkëbisedim të hapur me studentët, duke ndarë përvoja të vlefshme nga karriera e tij artistike dhe akademike. Ai foli mbi procesin krijues, rëndësinë e origjinalitetit, kërkimit dhe pasionit në artin bashkëkohor.
Studentët ishin të shoqëruar nga prodekania për arsim, profesoresha e Historisë së Artit Jëlldëz Asani, dhe profesoresha e vizatimit Drenusha Palloshi. Ata u pritën ngrohtësisht nga drejtoresha e
galerisë dhe kuratori i ekspozitës, të cilët e prezantuan konceptin dhe mënyrën e organizimit të kësaj ekspozite.
Në hapësirat e galerisë ishin ekspozuar vepra nga cikle dhe teknika të ndryshme artistike, vizatime me goditje të sakta e karakteristike, si dhe piktura në vaj mbi pëlhurë, të realizuara me një paletë të gjerë ngjyrash, që dëshmojnë mjeshtërinë dhe vizionin e veçantë të autorit.
Në veçanti spikatnin dy piktura monumentale të portretit të Nënë Terezës, të cilat ruajnë dorëshkrimin e njohur të artistit përmes formave konceptuale dhe frymës postmoderne që e
karakterizon krijimtarinë e tij.
Në tërësi, veprat e profesor Miftar Memetit reflektojnë freskinë e impresionizmit, lëvizjen e lirë të ngjyrave dhe ndjesinë e hapësirës, duke i dhënë artit të tij një dimension komunikues ku edhe
publiku bëhet pjesë e procesit krijues.
Studentët shprehën mirënjohjen e tyre për mundësinë e këtij takimi me një artist të kalibrit akademik e kombëtar, i cili përmes shembullit dhe përvojës së tij frymëzon brezat e rinj të ecin me
përkushtim në rrugën e artit.
Kjo vizitë u vlerësua si një përvojë e vlefshme praktike dhe frymëzuese, që forcon lidhjen midis edukimit universitar dhe jetës artistike në vendin tonë.
Lajme nga vendi
Kandidati i VLEN-it për Dollnenit, Islami kërkon mbështetje për të drejtuar komunën në mandatin e ardhshëm
Kandidati i VLEN-it për Komunën e Dollnenit, Blerim Islami, para banorëve dhe përfaqësuesve politik të koalicionit, shpalosi vizionin e tij për komunën dhe kërkoi mbështetje për të drejtuar komunën në mandatin e ardhshëm. Nga VLEN kërkuan unitet etnik dhe fetar kurse thanë se Islami personifikon karakterin e komunës. Islami ka premtuar investime në arsim, furnizim me ujë të pijshëm, ndërtimin e një poliklinike, përmirësim të infrastrukturës duke përfshirë rrugët kryesore dhe rrugicat në të gjithë komunën, hapjen e një zone teknologjike industriale, rrjet të zgjeruar kanalizimi, dhe menaxhim efikas me mbeturinat.
“Ndodhemi në fshatin Debresh. Kemi vizitë nga përfaqësues qeveritar. Me ne sot është Afrim Gashi, kryetar i Parlamentit, e kemi zv.kryeministrin e parë, z. Izet Mexhiti dhe kryetarin e Alternativës z. Zeqirija Ibrahimi. Vizita e tyre këtu është ndihmë e madhe për ne. Kudo që shkojmë, çdo shtab që vizitojmë ndihet atmosfera e fitores dhe shpresojmë që më 2 nëntor të festojmë së bashku këtu në Dollnen”, deklaroi Blerim Islami, Kandidat i VLEN-it për Dollnenin. /Alsat.mk
Arben Fetai godet politikën e vjetër: ‘Dy dekada makiavelizëm për pushtet, koha e VLEN ka ardhur’
Studentët e Fakultetit të Arteve të UT-së e vizituan ekspozitën e profesorit Miftar Memeti në Galerinë “Bezisten” në Shtip
Kandidati i VLEN-it për Dollnenit, Islami kërkon mbështetje për të drejtuar komunën në mandatin e ardhshëm
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
