Lajme nga vendi
NIS MUAJI I RAMAZANIT: KREU I BFI-së BËN THIRRJE PËR UNITET E SOLIDARITET!
Me rastin e fillimit të muajit të bekuar të Ramazanit, kreu i BFI-së, Shaqir Fetahu, ua uroi besimtarëve muajin e bekuar të Ramazanit duke u dëshiruar besimtarëve paqe, mirësi dhe përkushtim shpirtëror. Theksoi rëndësinë e solidaritetit, bashkëjetesës dhe forcimit të vlerave morale gjatë këtij muaji.
“Të dashur besimtarë,
Me perëndimin e diellit dhe me hyrjen e natës së 19 shkurtit, ne fillojmë agjërimin e muajit të bekuar të Ramazanit. Ky është momenti kur ummeti hyn në një gjendje adhurimi, përulësie dhe reflektimi.
Ramazani nuk është periudhë e zakonshme kohore. Është kohë e zgjedhur. Është muaj në të cilin zemrat bëhen më të ndjeshme, ndërgjegjjja bëhet më e mprehtë dhe lidhja me Allahun bëhet më e thellë. Ramazani vjen si thirrje për qetësi të brendshme dhe për riorganizim të jetës sonë rreth asaj që është thelbësore.
Qëllimi i agjërimit është devotshmëria. Devotshmëria është vetëdije e përhershme për Allahun, që e orienton njeriun në mendim, në fjalë dhe në veprim. Ajo është ndërgjegje morale që e mban njeriun të drejtë edhe kur është vetëm dhe të përgjegjshëm edhe kur askush nuk e sheh.
Ramazani është shkollë e disiplinës dhe e karakterit. Kur përmbahemi nga ushqimi dhe pija – gjëra të lejuara – ne edukojmë vullnetin tonë dhe e forcojmë kontrollin mbi vetveten, që të përmbahemi edhe nga gjërat e ndaluara. Kjo vetëpërmbajtje duhet të shtrihet përtej aspektit fizik. Duhet të përfshijë gjuhën, sjelljen dhe marrëdhëniet tona.
I Dërguari i Allahut ﷺ ka thënë:
“Kush nuk e lë fjalën e rreme dhe veprimin me të, Allahu nuk ka nevojë për urinë dhe etjen e tij.” (Transmeton Buhariu)
Agjërimi synon transformimin e karakterit. Nuk mjafton të heshtë stomaku; duhet të heshtë edhe e keqja në ne. Nuk mjafton të largohemi nga ushqimi; duhet të largohemi nga përçarja, shpifja dhe arroganca.
Ramazani është gjithashtu muaji i Kur’anit. Ky muaj duhet të jetë rikthim serioz te Fjala e Allahut, jo vetëm në lexim, por edhe në reflektim dhe zbatim. Kur’ani e formëson mendjen, e pastron zemrën dhe e drejton veprimin.
Përmes agjërimit, ne mësojmë mirënjohjen për begatitë që shpesh i marrim si të mirëqena, ndiejmë më afër hallet e atyre që janë në nevojë dhe forcojmë përgjegjësinë ndaj njëri-tjetrit. Bujaria, mëshira dhe ndihma ndaj atyre që kanë nevojë janë shprehje konkrete e besimit dhe e agjërimit.
Një mesazh të veçantë kam për besimtarët tanë që jetojnë dhe punojnë jashtë atdheut. Ju jeni ambasadorë të fesë dhe kombit tuaj, të kulturës suaj dhe të vlerave fisnike kudo që jetoni. Përmes sjelljes suaj, integritetit dhe respektit ndaj të tjerëve, ju përfaqësoni bukurinë e Islamit. Prandaj përhapni paqe, mirësi dhe bashkëpunim në shoqëritë ku jetoni, duke forcuar bashkëjetesën dhe respektin e ndërsjellë ndërmjet njerëzve me përkatësi të ndryshme.
Të dashur besimtarë,
Le ta fillojmë këtë Ramazan me vendosmëri për ndryshim të vërtetë. Le ta përdorim këtë muaj për pajtim me Allahun përmes pendimit të sinqertë dhe për pajtim me njëri-tjetrin përmes faljes dhe mirëkuptimit. Le ta bëjmë sinqeritetin themel të çdo veprimi dhe përgjegjësinë kriter të çdo vendimi.
Lusim Allahun e Madhëruar që ky Ramazan të jetë muaj pastrimi të zemrave, forcimi të besimit dhe ngritjeje morale për secilin prej nesh:
– Që zemrat tona të pastrohen nga çdo barrë e panevojshme.
– Që familjet tona të mbushen me qetësi dhe mirëkuptim.
– Që Bashkësia jonë të forcohet në unitet dhe përgjegjësi institucionale.
– Që vendi ynë të begatohet me paqe, drejtësi dhe stabilitet.
Andaj, në prag të fillimit të muajit të bekuar të Ramazanit, kam kënaqësinë dhe nderin që, në emër të Bashkësisë Fetare Islame të Republikës së Maqedonisë së Veriut dhe të gjitha institucioneve të saj, si dhe në emrin tim personal, t’ju uroj nga zemra besimtarëve tanë në vendlindje dhe në mërgim një Ramazan të begatë, agjërim të lehtë dhe të pranuar, si dhe një muaj që do të lërë gjurmë të thella në shpirtin, karakterin dhe jetën tonë, duke na afruar më shumë me Allahun dhe duke na bashkuar më fort në mirësi, drejtësi dhe përgjegjësi.
Për hajr na qoftë ardhja e muajit të Ramazanit.
Allahu ju bekoftë.” thuhet në urrimin e krehut të BFI-së, Shaqir Fetahu.
Lajme nga vendi
Durmishi: Me masa sistemore dhe partneritet reduktojmë ekonominë informale dhe forcojmë sektorin formal
Ministri i Ekonomisë dhe Punës Besar Durmishi, sot mbajti fjalim në konferencën “Formalizimi i ekonomisë informale: Përmes bashkëpunimit drejt suksesit”, kushtuar masave sistemore dhe politikave të përbashkëta për reduktimin e ekonomisë informale dhe forcimin e sektorit formal.
Ministri Durmishi theksoi se ekonomia informale është sfidë komplekse dhe afatgjatë që shtrembëron konkurrencën, dëmton punëtorët dhe zvogëlon kapacitetin fiskal të shtetit. Ai theksoi se për disa qytetarë puna e paralajmëruar nuk është zgjedhje, por domosdoshmëri, e cila kërkon përgjigje përmes krijimit të vendeve dinjitoze dhe të qëndrueshme të punës.
“Çdo kompromis me ekonominë gri do të thotë rritje më e ulët ekonomike, më pak shërbime publike dhe cilësi më e ulët e jetës. Prandaj kemi nevojë për zgjidhje sistemore, konsistente dhe të qëndrueshme”, theksoi ministri.
Nga kabineti i Durmishit, thonë se Ministria e Ekonomisë dhe Punës sivjet siguroi 40 milionë euro për Planin e ri operativ të punësimit, me masa që synonin formalizimin e punës dhe hapjen e vendeve të reja të punës. Gjithashtu, është miratuar Ligji për angazhim me punë të personave, qëllimi i të cilit është formalizimi i formave të caktuara të punës dhe përshtatja e kornizës ligjore me nevojat reale të tregut të punës.
Nga 1 janari i vitit 2026, fillon edhe zbatimi i Ligjit për Mbështetje Financiare të Investimeve, me të cilin stimulohen kompanitë që investojnë, hapin vende të reja pune dhe realizojnë rritje. Sipas ministrit, kombinimi i masave aktive dhe zgjidhjeve ligjore njëkohësisht nënkupton luftimin e ekonomisë gri dhe mbështetje të fortë të sektorit formal.
Në fjalën e tij, ministri Durmishi theksoi gjithashtu rëndësinë e agjendës së gjelbër, digjitalizimin dhe vendosjen e teknologjive bashkëkohore, që do të mundësojnë evidencë më të mirë dhe rregullim më të mirë të formave të reja dhe jo standarde të punësimit.
Në Konferencën u nënshkrua edhe “Deklaratën e partneritetit dhe veprimit: Përkushtim i përbashkët për formalizimin e ekonomisë informale në Maqedoninë e Veriut”, me çka institucionet, komuniteti i biznesit, sindikatat dhe komuniteti akademik konfirmuan angazhimin e tyre të përbashkët për veprim të koordinuar.
“Lufta kundër ekonomisë gri është luftë për një të ardhme më të mirë. Ndoshta nuk mund ta çrrënjosim plotësisht, por mund ta zvogëlojmë vazhdimisht. Me përpjekje të përbashkëta mund të ndërtojmë shtet më të drejtë, më të qëndrueshëm dhe më prosperues”, u shpreh ministri i Ekonomisë dhe Punës, Besar Durmishi.
Politika jonë është e qartë – financa publike të qëndrueshme dhe standard jetese i mbrojtur. Do të vazhdojmë me disiplinë në të ardhurat, me përgjegjësi në shpenzime dhe me ndjeshmëri ndaj nevojave reale të qytetarëve, porositi sot kryeministri Hristian Mickoski në fjalimin e tij në konferencën vjetore “Formalizimi i ekonomisë joformale: Përmes bashkëpunimit drejt suksesit”.
Lufta kundër ekonomisë gri, theksoi kryeministri, nuk është fushatë, por proces, kontrolli i çmimeve nuk është populizëm, por mbrojtje e qytetarëve.
Do të jemi të fortë dhe të drejtë. Si ndaj atyre që shmangin detyrimet, ashtu edhe ndaj atyre që përpiqen të përfitojnë nga krizat, sepse detyrimi ynë është i qartë – ekonomi me rregulla, treg me ligje, shtet me dinjitet”, tha Mickoski.
Ai vuri në dukje se ekonomia gri është e ardhur e humbur për shtetin, mundësi e humbur për paga më të larta, spitale më të mira, shkolla moderne, pensione më të sigurta… “Ajo krijon konkurrencë jo të ndershme, shkatërron besimin në institucionet dhe demotivon çdo person që punon në mënyrë të ndershme. Qëllimi ynë është i qartë – ekonomia formale të bëhet më e rëndësishme se ajo joformale, të jetë më e lehtë, më fitimprurëse dhe më e sigurt të punohet ligjërisht, tha Mickoski, duke theksuar se lufta kundër ekonomisë gri nuk mund të jetë vetëm inspektuese, por sistematike.
Ministrja e Financave, Gordana Dimitrieska Koçoska, theksoi se me Planin e rishkikuar të veprimit 2026-2027 do të vendosë një qëllim të qartë dhe të matshëm për uljen e ekonomisë joformale nga 28,9% të BPV-së deri në fund të vitit 2027.
“Në zbatimin e saj, veçanërisht e rëndësishme është përfshirja aktive e të gjitha institucioneve relevante në zbatimin e Strategjisë dhe masave të saj. Një mesazh i qartë për bashkëpunim dhe përfshirje aktive në zbatim e dërgojmë edhe përmes nënshkrimit sot të Deklaratës për partneritet dhe veprim, me të cilën shprehim angazhimin e përbashkët për formalizimin e ekonomisë joformale. Ajo përbën një hap të rëndësishëm drejt trajtimit sistematik dhe të koordinuar të ekonomisë joformale dhe tregon përkushtimin e përbashkët të institucioneve, komunitetit të biznesit, organizatave sindikale dhe komunitetit akademik”, tha Dimitrieska Koçoska.
Dy ushtarë nga kazerma “Jane Sandanski” në Shtip njëri 40 vjeçar dhe tjetri 28 vjeçar kanë përfunduar në spital me lëndime të rënda trupore. Burime të Alsat bëjnë të ditur se 40 vjeçari nga Kratova, epror në kazermë ka sulmuar fizikisht një ushtar profesionist shqiptar nga Shkupi, përcjell Alsat.mk.
Nga MPB thonë se gjatë kryerjes së detyrave zyrtare ka ndodhur incident.
“Më 17.02.2026 në ora 01:00 në SPB Shtip nga Klinika e Shtipit është denoncuar se tek ta me lëndime trupore janë sjellë E.H (28) nga fshati Studeniçan i Shkupit dhe D.A (40) nga Kratova, dy ushtarë profesionistë të punësuar në ARMV në kazermën “Jane Sandanski” në Shtip. Pas ndërmarrjes së masave është konstatuar se lëndimet i kanë marrë gjatë kryerjes së detyrave në poligonin ushtarak “Penush” në Shtip, gjatë kryerjes së realizimit të ushtrimeve”, njoftojnë nga MPB.
Lëndimet i konfirmojnë edhe nga Armata e RMV-së. Nga atje nuk zbardhin detaje se në çfarë rrethanash ka ndodhur incidenti por vetëm njoftojnë se që të dy pjesëtarët janë në gjendje të mirë shëndetësore.
“Ju informojmë se për dy personat tanimë janë ndërmarrë masa në përputhje me rregullat ekzistuese. Ju informojmë se dy personat janë në gjendje të mirë shëndetësore. Armata ngelet e përkushtuar në respektimin e procedurave dhe standardeve gjatë kryerjes së aktiviteteve”, thonë nga ARM.
Sulmi fizik ndaj një ushtari profesionist nuk është i vetmi në kazermën e Shtipit pasi më herët atje ka pasur edhe disa incidente të tjera. Muaj më parë një ushtar me iniciale F.J pati përfunduar në Spitalin Psikiatrik pas disa sjelljeve të çuditshme në kazermë. /Alsat.mk
Durmishi: Me masa sistemore dhe partneritet reduktojmë ekonominë informale dhe forcojmë sektorin formal
Mickoski: Lufta sistematike kundër ekonomisë gri
Dy pjesëtarë të ARM-së sulmohen fizikisht nga eprori, përfundojnë në spital
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
