Këshilli Gjyqësor e ka propozuar Meri Dika-Georgievska, gjyqtare në Gjykatën e Apelit, për gjyqtare në Gjykatën Kushtetuese,

Në mbledhjen e sotme, 10 anëtarë votuan “pro”, një ishte kundër, ndërsa gjyqtarja Antoaneta Dimovska u përjashtua nga votimi për këtë pikë të rendit të ditës.

Gjyqtarja Elizabeta Dukovska, u propozua gjithashtu për gjyqtare kushtetuese, por ajo nuk mori mbështetjen e Këshillit Gjyqësor.

Gjykata Kushtetuese përbëhet nga nëntë gjyqtarë.

Kryetari zgjidhet nga radhët e gjyqtarëve për një mandat trevjeçar, pa të drejtë rizgjedhjeje.

Advertisement

Gjyqtarët zgjidhen nga Kuvendi për një mandat nëntëvjeçar, gjithashtu pa të drejtë rizgjedhjeje, dhe duhet të jenë juristë të shquar.

Funksioni i gjyqtarit kushtetues është i papajtueshëm me ushtrimin e një funksioni tjetër publik, profesioni apo anëtarësimi në parti politike.

Gjyqtarët gëzojnë imunitet si deputetët, ndërsa për imunitetin vendos vetë gjykata sipas procedurave të saj.

Sipas Kushtetutës, dy gjyqtarë të Gjykatës Kushtetuese i propozon Presidenti i Republikës, ndërsa dy të tjerë i propozon Këshilli Gjyqësor nga radhët e gjyqtarëve. Kuvendi zgjedh tre gjyqtarë me shumicë votash nga numri i përgjithshëm i deputetëve, duke përfshirë edhe shumicën e votave nga deputetët që përfaqësojnë komunitetet jo-shumicë në shtet. (Portalb)

Advertisement

Ka ndërruar jetë në moshën 72-vjeçare Rauf Ramadani, një personalitet i shquar në jetën publike, politike dhe ekonomike të qytetit të Tetovës.

Përmes rrjeteve sociale lajmin e kanë bërë publike familjarët dhe miqtë e tij.

I lindur në vitin 1954, Rauf Ramadani njihej si një aktivist i palodhur politik, veçanërisht gjatë angazhimit të tij në radhët e Partisë Demokratike Shqiptare (PDSH).

Për një periudhë kohore, ai shërbeu me përkushtim në krye të Ndërmarrjes Publike Komunale (NPK) të Tetovës, si Kryeshef i Policisë së Tetovës dhe Drejtor i Postave, duke dhënë kontributin e tij në menaxhimin e sfidave të qytetit.

Përveç angazhimit publik, Ramadani ishte një figurë qendrore në botën e biznesit lokal. Ai ishte themelues dhe pronar i rrjetit të njohur të marketeve “Erzana”, ndërsa së fundmi ishte fokusuar në drejtimin e kompanisë “Swiss Bakery”, duke gjeneruar vende pune dhe duke ndikuar drejtpërdrejt në ekonominë e rajonit të Pollogut.

Advertisement

Rauf Ramadani ishte një figurë e rëndësishme edhe në historinë e KF Shkëndija. Njihet si futbollist i gjeneratës së parë të “kuqezinjve” por edhe si Kryetar i këtij klubi.

Lajmi për vdekjen e tij ka tronditur qytetin e Tetovës dhe jo vetëm, por edhe miqtë, të afërmit dhe kolegët e tij.

Çmimi i lartë i naftës dhe benzinës në Shqipëri po shtyn gjithnjë e më shumë qytetarët e zonave të juglindjes që t’i drejtohen pikave të furnizimit në Maqedoninë e Veriut, me qëllim uljen e kostove financiare për blerjen e karburanteve.

Ditët e fundit, në pikën kufitare të Qafë Thanës është vërejtur një rritje e ndjeshme e fluksit të automjeteve që udhëtojnë drejt Strugës dhe Ohrit.

Në pikat e karburantit në Maqedoninë e Veriut, nafta tregtohet deri në 1.4 euro për litër, çka e bën dukshëm më të leverdishme, rreth 60 lekë më pak për litër në krahasim me atë që tregtohet në Shqipëri.

“Po ta llogarisësh, kursen më shumë në krahasim me Shqipërinë”, tha një qytetar.

“Njëherë në muaj vij. Më ulët është këtej, ia vlen”, u shpreh një tjetër.

Advertisement

Ndërkohë, interesi i shtuar i qytetarëve shqiptarë për t’u furnizuar përtej kufirit konfirmohet edhe nga banorët e Maqedonisë së Veriut.

“Vijnë furnizohen në Strugë me naftë”, shprehet një qytetar nga Maqedonia e Veriut.

“Çdo ditë shohim makina me targa të Shqipërisë që vijnë te ne dhe furnizohen”, shton një tjetër.

Në kushtet e diferencave të ndjeshme të çmimeve, ky trend pritet të vijojë, duke përfshirë jo vetëm blerjen e karburanteve, por edhe produkteve ushqimore në Maqedoninë e Veriut.

Advertisement