Partitë politike ende nuk po arrijnë të gjejnë konsensus për Kodin e ri Zgjedhor, ndërsa dallimet më të mëdha vazhdojnë të jenë rreth mënyrës së votimit të diasporës. Kryetari i Kuvendit, Afrim Gashi, e mbështeti mundësinë e votimit elektronik, me kusht që të sigurohen identifikimi i besueshëm i votuesve dhe fshehtësia e votës. Ndërkohë, LSDM paralajmëron për keqpërdorime të mundshme, ndërsa VMRO-DPMNE e akuzon opozitën për bllokimin e reformave që lidhen me Kodin Zgjedhor.

Kryetari i Kuvendit, Afrim Gashi, u bëri thirrje koordinatorëve të grupeve parlamentare që të tejkalojnë dallimet dhe të arrijnë kompromis për Kodin Zgjedhor.

Në një takim informues me gazetarët, Gashi theksoi se votimi elektronik ka qenë pjesë edhe e programit të partisë së tij politike, Alternativa.

Duke iu përgjigjur një pyetjeje të gazetarëve, ai theksoi se ky model do të kontribuonte në barazi më të madhe të qytetarëve gjatë votimit.

Ai shtoi se synimi është të sigurohet një Kod Zgjedhor që u mundëson qytetarëve të votojnë lirshëm dhe ta shprehin vullnetin e tyre në mënyrë demokratike përmes zgjedhjeve.

Advertisement

Nga LSDM njoftuan se VMRO-DPMNE, me ndryshimet e propozuara për votimin e diasporës, hap hapësirë për keqpërdorime të mundshme. Nga LSDM-ja thonw se ideja fillestare për votim elektronik të diasporës është zëvendësuar me propozimin për votim me postë, i cili, sipas partisë, nuk garanton mekanizma të mjaftueshëm kontrolli dhe mbrojtjeje të vullnetit zgjedhor.

Kryeministri Hristijan Mickoski ditëve të fundit ka ftuar vazhdimisht opozitën në bisedime për të gjetur një zgjidhje për votimin e diasporës, duke theksuar se ai nuk duhet domosdoshmërisht të jetë elektronik, por mund të realizohet edhe përmes postës. Ai shpreson se pas 15 korrikut partitë do të arrijnë të tejkalojnë mosmarrëveshjet lidhur me Kodin Zgjedhor.

Hulumtimi i Qendrës për Komunikime Qytetare nga viti 2024 tregoi se Komisioni Shtetëror i Zgjedhjeve (KSHZ), për organizimin e zgjedhjeve të fundit presidenciale dhe parlamentare, ka lidhur 22 kontrata për prokurime publike me vlerë të përgjithshme prej rreth 3,47 milionë euro, deri më 20 maj 2024.

Analiza tregon se shpenzimet për organizimin e votimit të diasporës kanë qenë më të larta se mjetet e shpenzuara për shtypjen e fletëvotimeve për të gjithë votuesit në vend, duke hapur edhe më shumë diskutimin për efikasitetin dhe qëndrueshmërinë e modelit aktual të votimit jashtë shtetit.

Advertisement

Shoferët që tranzitojnë nëpër Maqedoninë e Veriut do të përfshihen në sistemin “Qytet i Sigurt”, por derisa sistemi të përditësohet, gjobat nuk do të dërgohen.

Derisa të bëhet përmirësimi i sistemit, ata shoferë që lëvizin me shpejtësi të lartë në autostradat maqedonase me automjete me targa të huaja, do të gjobiten vetëm nga policët “presretues” apo policia e trafikut, të cilët sipas MPB‑së janë vazhdimisht të pranishëm në korridoret 8 dhe 10.

“Në lidhje me automjetet për të cilat pyetni, të ashtuquajturit ‘presretues’, ju informojmë se ata janë vazhdimisht të pranishëm në korridoret 8 dhe 10 me qëllim sanksionimin e shoferëve që shkelin rregullat dhe dispozitat e trafikut”, thonë nga MPB.

Më herët, ministri Toshkovski u bëri apel të gjithëve që tranzitojnë nëpër korridoret 8 dhe 10 në Maqedoni, duke theksuar se kamerat e “Qytetit të Sigurt” funksionojnë, punojnë dhe evidentojnë kundërvajtje rrugore.

Toshkovski tha se përveç qytetarëve maqedonas, së shpejti edhe qytetarët që tranzitojnë në vend do të marrin gjoba për kundërvajtjet e kryera, prandaj u bëri thirrje të gjithë udhëtarëve të respektojnë rregullat, duke theksuar se çdo jetë e shpëtuar është një akt i madh human.

Advertisement

Ministri apeloi që të gjithë ata që tranzitojnë nëpër korridoret 8 dhe 10 të jenë të përgjegjshëm, sepse sistemi “Qytet i Sigurt” funksionon dhe do të zbatohet për të gjithë, pa dallim nëse automjeti ka targa maqedonase apo të huaja.

“Shumë shpejt do të jeni dëshmitarë të zbatimit të plotë të hapit të dytë, që ka të bëjë me dërgimin e gjobave për ata që drejtojnë automjete me targa të huaja. Kjo do të bëhet pikërisht këtu, në këtë pikë kufitare, prandaj apeloj tek qytetarët që drejtojnë automjete me targa të huaja t’i informojnë se kundërvajtjet po evidentohen dhe shumë shpejt do t’u dërgohen atyre që nuk i respektojnë rregullat”, tha Toshkovski.

Ndryshe, në periudhën shkurt–qershor të këtij viti, numri i personave të vdekur në aksidente trafiku është ulur me 40% – nga 55 viktima në të njëjtën periudhë të vitit të kaluar, në 34 këtë vit, theksuan nga MPB.

“Që nga fillimi i zbatimit të sistemit janë evidentuar mbi 130.000 kundërvajtje trafiku, dhe më shumë se 95% prej tyre lidhen me tejkalimin e shpejtësisë së lejuar. Kjo tregon qartë se rreziku më i madh në rrugët tona nuk janë kamerat – por drejtimi i papërgjegjshëm i automjeteve.

“Vazhdojmë me zbatimin e sistemit në të gjithë vendin, sepse qëllimi ynë nuk është të shqiptojmë më shumë gjoba, por të kemi më pak aksidente, më pak jetë të humbura dhe rrugë më të sigurta për të gjithë”, thuhet në njoftim.

Advertisement

“Një jetë me zërin e artit, një trashëgimi që jeton me këngë”! ishte motoja e promovimit të Librit “Qamili i Vogël – Këngëtari i madh” të autorëve Sylejman Salihu dhe Salih Berisha që u promovua sot në Tetovë në organizim të SHKA “Xheladin Zeqiri”

Libri i kushtohet figurës ikonike të muzikës qytetare shqiptare, Qamilit të Vogël, dhe vjen si një homazh për 100-vjetorin e lindjes së tij. Me këtë botim, autorët synojnë të ruajnë dhe promovojnë trashëgiminë muzikore të njërit prej emrave më të dashur dhe më të respektuar të muzikës shqiptare.

Doajeni dhe ikona e këngës shqipe këndej Drinit, Qamili i Vogël, është shumë i njohur për publikun gjithshqiptar dhe kjo i kishte nxitur autorët që të shkruajnë këtë libër, si një borxh ndaj Qamilit të Vogël për të gjithë vlerat muzikore-artstike që rrezatonte arti i tij specifik i këndimit.

SALIH BERISHA – Autor i Librit

Gjatë promovimit, autorët theksuan rëndësinë e dokumentimit të figurave të mëdha kulturore si Qamili i Vogël dhe ndanë rrëfime mbi procesin krijues të librit.

Advertisement

SYELJMAN SALIHU – Autor i Librit

Në ngjarje morën pjesë studiues, artistë, përfaqësues të institucioneve kulturore dhe dashamirë të muzikës, të cilët e konsideruan këtë libër si një akt të rëndësishëm mirënjohjeje ndaj trashëgimisë muzikore shqiptare dhe një pasuri për gjeneratat e reja.

 Libri është një përmbledhje e poetikës së teksteve dhe këngëve të Qamilit të Vogël, ku lexuesi mundet më detajisht të njoftohet me motivet, temat dhe preokupimet e këngëve të këtij doajeni të këngës shqipe./Tv Koha/