Strukturat e AKI-së në Komunën e Bërvenicës kanë nisur mobilizimin për zgjedhjet e parakohshme lokale.

Në një takim të mbajtur mbrëmë, Jusuf Shaini është zgjedhur Shef i Shtabit Komunal të AKI-së për fushatën zgjedhore.

Nga AKI thonë se ky vendim shënon fillimin e një organizimi të fuqishëm me synim fitoren në zgjedhjet e ardhshme.

Arkin Jahiji do të jetë kandidati i AKI-së për kryetar të Komunës së Bërvenicës, ndërsa Shaini do të udhëheqë shtabin që do të koordinojë aktivitetet zgjedhore në terren.

“Bërvenica ka nevojë për ndryshim, për punë dhe për një drejtim të ri. Tani është koha të bashkohemi dhe ta ndërtojmë së bashku Bërvenicën që meritojmë”, thuhet në njoftimin e AKI-së.

Advertisement

Nga partia theksojnë se në këtë garë hyjnë me përkushtim, besim, energji dhe vendosmëri, duke synuar mobilizimin e plotë të strukturave në komunë.

Zbrazja e fshatrave malore dhe rënia e lindshmërisë po çojnë drejt mbylljes së shkollave në rajonin e Pollogut. Për të përballuar këtë krizë, kryetarët e komunave janë mbledhur sot ku kanë propozuar uljen e fondit të orëve për arsimtarët dhe zvogëlimin e numrit të nxënësve për klasë, si mënyrë për të parandaluar mbylljen e mëtejshme të paraleleve.

OPTIMIZIMI NË ARSIM: SHKOLLAT PERIFERIKE NË POLLOG DREJT MBYLLJES

KRYETARËT E POLLOGUT KËRKOJNË ULJEN E ORËVE PËR ARSIMTARËT

Rënia e vazhdueshme e numrit të nxënësve dhe zbrazja e fshatrave malore të Tetovës ka bërë që kryetarët e komunave të Rajonit Planor të Pollogut të mblidhen sot për të diskutuar procesin e optimizimit të shkollave. Sipas kryetarit të këtij rajoni, Blerim Sejdiu, shumë shkolla periferike së shpejti pritet të mbyllen për shkak të mungesës së nxënësve, ndërsa arsimtarët do të duhet të transferohen në vatrat qendrore arsimore.

“Tani si sfidë më kryesore janë shkollat periferike apo të malësisë ku nuk ka asnjë nxënës. Tek ne konkretisht nuk ka asnjë shkollë, po do paraqiten ku nuk do të ketë asnjë nxënës dhe ajo shkollë fatkeqësisht dhe detyrimisht do duhet të mbyllë. Ka nisur optimizimi në të gjithë Maqedoninë dhe do të vazhdojë edhe në shkollat e tjera. Këtu nuk ka faj askush se një shkollë e caktuar nuk ka nxënës fare. Flasim, nëse ka një nxënës, shkolla do vazhdojë me procesin mësimor, por nëse s’ka asnjë nxënës do detyrohemi që të mbyllim atë shkollë dhe ai arsimtar apo ata arsimtarë do të duhet të transferohen në shkollat qendrore.”

Advertisement

Sejdiu theksoi se kryetarët e komunave kanë rënë dakord t’i drejtojnë një kërkesë zyrtare Ministrisë së Arsimit. Ata kërkojnë që fondi javor i orëve të arsimtarëve të uljet nga 20 në 15 orë, si dhe numri minimal i nxënësve për paralellë të jetë 15 dhe jo mbi 20 siç është aktualisht. Sipas tyre, ky hap do të ndihmonte në ruajtjen e cilësisë së arsimit dhe do të parandalonte mbylljen e mjaft klasave në zonat malore.

“Në lidhje me numrin e nxënësve që paraqesin me paralelet, duhet që fondi i orëve që sot është me 20 orë, ne do të kërkojmë që fondi i orëve i plotë të jetë me 15 orë, jo me 20 siç është tani. Me këtë konsiderohet fondi i plotë i orëve, pra duke pasur parasysh se bie numri i nxënësve. Normalisht paralelet të jenë me numër prej 15 nxënës e më lartë, dhe jo siç është tani pra mbi 20 nxënës. Kështu që duke pasur parasysh performancën dhe numrin e nxënësve, ashtu edhe kërkesat tona do t’i bëjmë. Kemi pika taksative se çfarë do t’i drejtojmë ministrisë dhe për këtë e theksojmë përsëri që të ruajmë vetëm e vetëm kualitetin arsimor tek shkollat tona.”

Këtë vit në rajonin e Pollogut u mbyll shkolla periferike në fshatin Sellcë të Keqe, ndërsa vitin e kaluar dyer t e saj i mbylli edhe shkolla në fshatin Veshallë. Përderisa vatrat arsimore në fshatrat malore po shuhen dita-ditës, në shkollat e qytetit vërehet një rritje e numrit të nxënësve.

Ministria e Punëve të Brendshme po zhvillon një aksion të koordinuar në disa lokacione, nën dyshimet për lëshim të paligjshëm dhe falsifikim të patentë-shoferëve për kategoritë C dhe D, për drejtimin e kamionëve dhe autobusëve.

Sipas informacioneve , kontrolle dhe bastisje po kryhen ndaj të paktën 25 personave, ndërsa një pjesë e tyre tashmë janë privuar nga liria.

Mes të dyshuarve dyshohet se ka edhe punonjës të MPB-së, ndërsa disa persona dyshohet se kanë drejtuar autobusë dhe automjete të rënda transportuese me patentë-shoferë të falsifikuar, brenda dhe jashtë vendit.

Sipas informacioneve paraprake, mënyra e funksionimit dyshohet se ka qenë që personat të deklaronin se e kishin humbur patentë-shoferin që posedonin për drejtimin e automjeteve, ndërsa gjatë procedurës për zëvendësimin e dokumentit, me ndihmën e një punonjësi të MPB-së, në patentë u shtoheshin kategori për të cilat nuk kishin dhënë provim dhe nuk kishin bazë ligjore për t’i marrë.

Për këto ndryshime të paligjshme dyshohet se janë dhënë para në këmbim të shërbimit.

Advertisement

Aksioni është në zhvillim e sipër, ndërsa priten më shumë detaje nga institucionet kompetente për personat e përfshirë dhe veprat për të cilat dyshohen./INA/