Një 47-vjeçar nga Velesi dyshohet se u ka shitur pacientëve me kancer vaksina të pretenduara kubaneze, duke u premtuar shërim kundrejt pagesës prej 3.200 eurosh.

Familjarët e disa pacientëve, të cilët ndërkohë kanë ndërruar jetë, dyshojnë se në vend të vaksinës u është injektuar tretësirë fiziologjike. Sipas pretendimeve të tyre, një mostër është dërguar për analiza laboratorike në Serbi, ku thuhet se është identifikuar si tretësirë fiziologjike. Megjithatë, përbërja e injeksioneve nuk është konfirmuar zyrtarisht.

Policia konfirmoi se më 31 korrik 2026, me urdhër gjykate, ka kontrolluar shtëpinë e të dyshuarit dhe ka sekuestruar një telefon celular. Ndërkohë, një 37-vjeçar nga Kavadari ka raportuar se ishte mashtruar për 3.200 euro me premtimin për të ndihmuar në trajtimin e një familjari.

Hetimet për rastin vazhdojnë. Ministri i Shëndetësisë, Sasho Klekovski, ka paralajmëruar për tregun e zi të barnave dhe vaksinave, duke u bërë thirrje qytetarëve që terapitë t’i kërkojnë vetëm në institucione shëndetësore të autorizuara.

Shtatë persona janë përfshirë në kallëzim penal për mashtrime me kredi të shpejta konsumatore në Kumanovë, me të cilat, sipas policisë, është realizuar dobi pasurore e kundërligjshme prej mbi 12,2 milionë denarësh (rreth 198.700 euro).

Pas miratimit dhe pagimit të kredive, paratë janë përvetësuar kundërligjshëm nga dy të dyshuarat, bën të ditur policia.

Në këtë rast janë përfshirë edhe pesë persona të moshës nga 27 deri në 48 vjeç, të punësuar si zyrtarë bankarë në një degë të një banke. Ata dyshohen se me keqpërdorim të pozitës dhe autorizimit zyrtar kanë mundësuar realizimin e mashtrimit dhe disponimin me mjetet e miratuara.

Në këtë mënyrë, sipas kallëzimit, dy grave u është mundësuar dobi pasurore e kundërligjshme në shumë totale prej 12.221.500 denarësh (rreth 198.723 euro).(INA)

Në kuadër të aksionit të NPK-Tetova për pastrimin dhe mirëmbajtjen e hapsirave të gjelbërta, kjo ndërmarrjen nën menaxhimin e drejtorit Samet Bislimi ka vazhduar me planin aksional për zëvendësimin e drunjëve të dëmtuar në bulevarde nga aksidentet dhe nga persona të pandërgjegjshëm.

“Është pjesë e planit aksional për mirëmbajtjen, pastrimin dhe rregullimin e qytetit, hapsirave të gjelbërta, rrugëve, bulevardet dhe rrugicat. Janë drunjë të cilët janë thyer nga aksidentet ose janë dëmtuar nga persona të pandërgjegjshëm. Si ndërmarrje nuk po bëjmë asgjë më shumë se ajo që ju takon qytetarëve dhe ate që e meritojnë, një Tetovë të pastër dhe të rregulluar” tha drejtori i NPK-Tetova Samet Bislimi