Iskra Haxhi Vasileva ka marrë zyrtarisht detyrën e shefes së Prokurorisë për Ndjekjen e Krimit të Organizuar dhe Korrupsionit në Maqedoninë e Veriut. Në moshën 43-vjeçare, ajo bëhet drejtuesja më e re e këtij institucioni, pasi bëri betimin para anëtarëve të Këshillit të Prokurorëve.

Pas marrjes së detyrës, Haxhi Vasileva deklaroi se e konsideron nder emërimin në këtë funksion, por theksoi se ai njëkohësisht e ngarkon me përgjegjësi të madhe.

Emri i saj është bërë i njohur në opinion kryesisht përmes disa rasteve të bujshme që lidhen me korrupsionin e nivelit të lartë.

Ajo është prokurore në rastin e 350 mijë eurove të gjetura te gjyqtari i Apelit, Gjoko Ristov, si dhe në rastin kundër ish-drejtorit të Inspektoratit Shtetëror të Bujqësisë, Vace Anakiev, i dyshuar për ryshfet. Gjithashtu, udhëheq hetimet ndaj ish-drejtorit të Drejtorisë së Doganave, Stefan Bogoev, ndërsa ka qenë e përfshirë edhe në rastin kundër ish-kryetarit të Komunës së Novo Sellës, Boro Stojçev, lidhur me çështjen e marihuanës. Ajo ishte prokurore edhe në fillimet e rastit kundër kardiologut Zhan Mitrev.

Në krye të Prokurorisë, Haxhi Vasileva nuk trashëgon vetëm një funksion drejtues, por edhe një sërë lëndësh të hapura dhe çështjesh të ndjeshme që presin përgjigje institucionale.

Advertisement

Ndër temat që kanë ngjallur debat në javët e fundit është edhe hyrja e Alta Bankës në Maqedoninë e Veriut. Kryeprokurori i Shtetit, Nenad Saveski, ka deklaruar shkurt se institucionet po e ndjekin situatën.

E pyetur nga BIRN nëse Prokuroria ka një qëndrim lidhur me këtë çështje, Haxhi Vasileva tha se për momentin nuk mund të përgjigjet pa shqyrtuar paraprakisht materialet përkatëse.

Ajo theksoi se, në rast se paraqiten indicie ose baza më serioze për dyshime, çështja do të ndiqet me vëmendje.

„Nëse kemi gjurmë ose baza më serioze, natyrisht se këto janë tema që ndiqen me kujdes“, deklaroi ajo, duke iu referuar mundësisë së hapjes së lëndëve me iniciativë të Prokurorisë.

Sa i përket bashkëpunimit me Prokurorinë për Krim të Organizuar të Serbisë, ajo tha se bashkëpunimi ndërkombëtar është pjesë e detyrimeve ligjore dhe se me Serbinë ekziston një bashkëpunim i mirë.

Advertisement

Ndërkohë, partitë opozitare kanë kërkuar hapjen e hetimeve edhe për hyrjen e Alta Bankës në vend, si dhe për destinimin dhe shpenzimin e mjeteve të Lotarisë Shtetërore për organizimin e festimeve me rastin e Ditës së Pavarësisë. Deri më tani, të paktën publikisht, nuk ka informacione për veprime konkrete të Prokurorisë lidhur me këto çështje.

Lëndët e vjetra, sfida e parë për drejtuesen e re

Në tavolinën e saj e presin edhe disa lëndë që prej vitesh nuk kanë marrë epilog.

Një ndër to është rasti „Talir“, në të cilin VMRO-DPMNE akuzohet për pastrim parash, ndërsa procesi gjyqësor zvarritet prej gati tetë vitesh pa një vendim përfundimtar.

Sipas BIRN, gjatë këtij viti të gjitha seancat gjyqësore për këtë rast janë shtyrë ose anuluar. Publikimi vë në pikëpyetje edhe angazhimin e prokurores Engellushe Kadriu, e cila e mori lëndën nga Lençe Ristoska, për t’i dhënë më shumë dinamikë procesit.

Advertisement

Një tjetër sfidë janë dy lëndët e hapura lidhur me pretendimet për përgjim të paligjshëm të kryeministrit Hristijan Mickoski. Dyshimet për përgjim u bënë publike nga vetë Mickoski, i cili u referua në informacione nga Agjencia për Siguri Kombëtare dhe Agjencia për Zbulim.

Njëra nga lëndët është hapur në dhjetor të vitit 2024, por deri më tani në asnjërën nuk është nisur hetim dhe nuk ka persona të dyshuar.

Vëmendje të veçantë kërkon edhe rasti i furnizimit me mazut, i cili shkaktoi reagime të shumta politike. Prokurorja Katerina Kolaroviq fillimisht e hodhi poshtë kallëzimin penal, por prokurori i lartë Jovan Cvetanovski e anuloi vendimin dhe e ktheu lëndën në Prokurorinë për Ndjekjen e Krimit të Organizuar dhe Korrupsionit.

Çështja mori edhe dimension politik pas deklaratave publike të kryeministrit Hristijan Mickoski dhe ministrit të Punëve të Brendshme, Pançe Toshkovski.

Këto janë vetëm disa nga rastet në të cilat drejtuesja e re do të duhet të dëshmojë nëse prioritetet e saj do të mbeten vetëm premtime programore apo do të shndërrohen në rezultate konkrete.

Advertisement

Në programin me të cilin fitoi këtë pozitë, Haxhi Vasileva ka premtuar procedura më efikase dhe më të shpejta, hetime financiare dhe konfiskim të pasurisë së përfituar në mënyrë të paligjshme, forcim të kapaciteteve institucionale, digjitalizim, si dhe rritje të transparencës dhe besimit të publikut.

Haxhi Vasileva, e cila ushtron detyrën e prokurores që nga viti 2009, në funksionin e ri do të punojë me një ekip prej 11 prokurorësh.(INA)

Me një aksion gueril urban të titulluar “Kontrastet shoqërore”, organizatat joqeveritare u dolën në mbështetje studentëve dhe luftës së tyre për një standard më të mirë jetese.

Me dy tavolina të ndryshme dhe dy meny të ndryshme, njëra për deputetët dhe tjetra për studentët, në sheshin e vogël pranë Qendrës Tregtare “Bunjakovec” në Shkup, grupi “Aksionet artistike urbane” synon të paraqesë edhe vizualisht pabarazinë në shoqërinë e Maqedonisë.

Siç shihet në aksion, aktivistët e këtij grupi duan të tregojnë se tryeza studentore, me bukë, një konservë ton dhe qepë, pasqyron kufizimet e shumës prej 140 denarësh që studentët marrin nga shteti si subvencion për ushqim.

Në anën tjetër, menyja dhe ushqimi i shtruar në tryezën e deputetëve hapin çështjen e çmimeve të privilegjuara në bufenë e Kuvendit dhe pyetjen se përse pikërisht ata që kanë më shumë, në këtë shtet, gjithmonë paguajnë më pak.

Sipas aktivistëve, kontrasti bardhezi mes dy tavolinave tregon më së miri se me 140 denarë nuk mund të sigurohet një vakt studentor i denjë dhe i balancuar nga ana ushqyese.

Advertisement

“Deri kur për disa luks në kurriz të shtetit, e për të tjerët luftë për mbijetesë?” – ka shkruar në Facebook, Blendi Hodai nga Forumi për Reforma në Arsim.

Pikërisht vlera e shujtës studentore ishte bërë shkas i një përplasjeje mes tij dhe Kryeministrit Mickoski, pasi ky i fundit kishte deklaruar se nuk është sjellje e mirë të ofendohen profesorët.

Blendi Hodai kishte publikuar në profiling e tij në Facebook, menynë e restorantit të Kuvendit, ku deputetët mund të ushqehen me çmime të privilegjuara.

“Pyetja është e thjeshtë: pse ushqimi me çmime të privilegjuara për funksionarët konsiderohet i arsyeshëm, ndërsa subvencionimi i ushqimit për studentët bëhet objekt debati?” – kishte shtruar pyetjen Blendi Hodai./Tv Koha/

Advertisement

Ministri i Ekonomisë dhe Punës, Besar Durmishi, ka vizituar kompaninë “Kiel Maqedoni”, në Zonën Zhvillimore Industriale Teknologjike në Tetovë. Durmishi u njoh nga afër me kapacitetet prodhuese të kompanisë, zgjerimin e veprimtarisë dhe investimin e ri, në vlerë prej rreth 1,5 milionë eurosh, si dhe me planet për punësime shtesë.

Ministri i Ekonomisë dhe Punës, Besar Durmishi, bashkë me deputeten Kaltrina Beqiri dhe Zv/kryetarin e Tetovës Albi Qamili, kanë vizituar kompaninë “Kiel Maqedoni” në Tetovë, ku ka theksuar rëndësinë e investimeve të huaja në zhvillimin ekonomik të vendit, modernizimin e industrisë dhe krijimin e vendeve të reja të punës.

Gjatë vizitës, ministri Durmishi u njoh nga afër me kapacitetet prodhuese të kompanisë, e cila ka realizuar investime prej mbi 11 milionë eurosh në objektin ekzistues në Zonën Ekonomike në Tetovë, ndërsa ka vendosur edhe një linjë të re të automatizuar të lyerjes me pluhur, investim ky në vlerë prej rreth 1,5 milionë eurosh.

Durmishi theksoi se “Kiel Maqedoni” është shembull konkret i një investimi të huaj që jo vetëm ka arritur të zhvillohet me sukses, por vazhdon të zgjerojë kapacitetet dhe të krijojë perspektivë për punësime të reja.

KIEL Maqedoni është pjesë e grupit prestigjioz gjerman Franz Kiel Group, një nga prodhuesit kryesorë evropianë të sistemeve të ulëseve për udhëtarë në autobusë dhe automjete hekurudhore, të destinuara për transportin urban, rajonal dhe ndërqytetës.

Advertisement

Kompania, e cila ka filluar veprimtarinë vendin tonë në vitin 2017, aktualisht numëron rreth 190 të punësuar në dy objektet e saj prodhuese në Tetovë dhe Zhelinë.

Me zgjerimin e kapaciteteve dhe funksionalizimin e linjës së re, ku tashmë janë angazhuar pesë punëtorë, pritet të krijohen mundësi për punësime shtesë./Tv Koha/