Gjithsej 1.026 magjistra dhe 39 doktorë shkencash janë të evidentuar si të papunë në Maqedoni, tregojnë të dhënat zyrtare të Agjencisë për Punësim, deri më 31 gusht 2026.

Sipas statistikave, nga numri i përgjithshëm i magjistrave të papunë, 639 janë burra dhe 387 gra. Ndër personat me titullin doktor shkencash që figurojnë si të papunë, 26 janë burra dhe 13 gra.

Në krahasim me muajin paraprak, është regjistruar një rënie e lehtë e numrit të personave me arsim të lartë që kërkojnë punë.

Në korrik ishin evidentuar 1.068 magjistra të papunë dhe 40 doktorë shkencash.

Kjo do të thotë se në gusht numri i magjistrave është zvogëluar për 42, ndërsa i doktorëve të shkencave për një person.

Advertisement

Të dhënat tregojnë se edhe qytetarët me studime pasuniversitare dhe doktoraturë përballen me vështirësi në gjetjen e një vendi pune.

Ndërkohë, sipas Entit Shtetëror të Statistikave, shkalla e papunësisë te të rinjtë e moshës 15 deri në 29 vjeç, në tremujorin e dytë të vitit 2026, ka qenë 24 për qind, ndërsa shkalla e përgjithshme e papunësisë në vend ka qenë 11,3 për qind.

Duhet theksuar se shifrat e Agjencisë për Punësim u referohen personave të regjistruar zyrtarisht në evidencën e të papunëve dhe jo të gjithë personave me këtë nivel arsimimi që aktualisht nuk kanë një vend pune.

Qytetarët e Maqedonisë së Veriut pritet të përballen me një procedurë të re për udhëtimet drejt zonës Shengen. Me zbatimin e sistemit ETIAS, udhëtarët që aktualisht lëvizin pa viza do të duhet të sigurojnë autorizim elektronik përpara nisjes.

Regjistrimi do të bëhet në internet, ndërsa tarifa e parashikuar është 20 euro. Autorizimi do të vlejë deri në tre vjet, ose deri në skadimin e pasaportës.

ETIAS nuk është vizë dhe nuk e heq të drejtën e udhëtimit pa viza për qëndrime deri në 90 ditë brenda 180 ditëve. Ai përbën një kontroll shtesë para udhëtimit.

Sistemi pritet të zbatohet gjatë vitit 2027, por data përfundimtare e hyrjes në fuqi ende nuk është konfirmuar. Deri atëherë, qytetarët nuk kanë nevojë të aplikojnë.

Gjykata Themelore Penale në Shkup ka shqiptuar masa edukative për katër të miturat e përfshira në rastin e dhunës brutale ndaj një vajze 13-vjeçare në komunën e Gjorçe Petrovit.
Sipas vendimit, e mitura e akuzuar e para është dërguar në shtëpi edukative-korrektuese për një vit, ndërsa tri të tjerat për nga tetë muaj.
Rasti kishte tronditur opinionin publik pasi katër vajzat kishin ushtruar dhunë fizike ndaj viktimës në dy raste të ndara. Gjatë sulmit, disa nga të pranishmit e kishin filmuar ngjarjen me telefona mobilë.
Pamjet e publikuara nga mediat tregonin se 13-vjeçarja ishte goditur me shqelma dhe grushte, ishte tërhequr për flokësh dhe kishte përfunduar e gjakosur në fytyrë.
Për këtë rast, Prokuroria kishte nisur procedurë ndaj katër të miturave për veprën penale „dhunë“. Ndërkohë, ishin ngritur edhe gjashtë kallëzime penale ndaj prindërve të tyre, nën dyshimin për neglizhencë dhe keqtrajtim të fëmijëve.
Vendimi gjyqësor ende nuk është i formës së prerë./skopje1.mk