Në aksionet e intensifikuara të Policisë Pyjore, të kryera gjatë tetorit, kundër prerjes së paligjshme të drurëve, transportit dhe tregtisë së drurit me origjinë të paligjshme, u sekuestruan 734 metra kub dru dhe u ngritën 147 kallëzime për kundërvajtje dhe penale, njoftojnë nga Ministria e Bujqësisë.

Në kuadër të aksioneve kundër hajdutëve të drurit, Policia Pyjore sekuestroi përkohësisht 11 automjete mallrash dhe 15 automjete pasagjerësh, tetë traktorë, 13 rimorkio dhe 18 sharrë elektrike. Përveç kësaj, janë paraqitur 122 kallëzime për kundërvajtje në gjykatat kompetente dhe 25 kallëzime penale në Prokurorinë Themelore Publike.

“Individët fitojnë para nga vjedhja e drurit, ndërsa të gjithë qytetarët vuajnë dëmin. Prandaj, vazhdojmë me kontrolle të intensifikuara dhe do të veprojmë me vendosmëri kundër çdo aktiviteti të paligjshëm që shkatërron pyjet. Do të kërkojmë përgjegjësi si nga ata që presin ilegalisht ashtu edhe nga ata që e rishesin drurin. Pyjet janë një thesar i përbashkët dhe është detyrimi ynë t’i mbrojmë ato”, tha Ministri i Bujqësisë, Pylltarisë dhe Ekonomisë së Ujërave, Borçe Serafimovski.

Kryeministri Hristijan Mickoski drejtoi kritika të ashpra ndaj Bashkimit Demokratik për Integrim, duke e akuzuar këtë parti se po e politizon çështjen e provimit të Jurisprudencës. Ai tha se BDI, ndonëse ka qenë pjesë e pushtetit për rreth dy dekada dhe ka drejtuar disa herë institucione përgjegjëse për këtë fushë, nuk ka ndërmarrë hapa për zgjidhjen e problemit.

“Ndjej keqardhje që pas 20 viteve dhe disa ministrave të BDI-së, ata nuk kanë bërë asnjë hap në zgjidhjen e këtij problemi dhe tani me arrogancë mundohen të sulmojnë dikë që mundohet të ketë një përparim”, deklaroi Mickoski. Kryeministri shkoi edhe më tej, duke vlerësuar se retorika e BDI-së lidhur me këtë çështje mund të ndikojë negativisht në marrëdhëniet ndëretnike.

“Kjo është sjellje arrogante dhe shërben vetëm për ndezjen e tensioneve ndëretnike, diçka që më së paku na nevojitet si shtet. Kjo nuk është çështje etnike apo politike, kjo është çështje e sundimit të së drejtës”, theksoi ai.

Çështja e provimit të jurisprudencës në gjuhën shqipe vazhdon të mbetet e hapur, ndërsa propozimi i dërguar në Komisionin e Venecias nuk ofron mundësinë e zhvillimit të të gjithë provimit në shqip. Përndryshe, studentët shqiptarë kanë deklaruar se janë kundër propozimit të Qeverisë dhe kanë paralajmëruar protesta të tjera. (koha.mk)

Transparencë, llogaridhënie dhe përfshirje e ekspertizës publike në reformën e drejtësisë. Ministri Shasivari hap dy projektligjet më të rëndësishme penale për debat dhe konsultim publik.

Ministri i Drejtësisë, Jeton Shasivari, po e vendos transparencën dhe konsultimin publik në qendër të reformës së legjislacionit penal.
Projekt Kodi i ri Penal dhe Projektligji i ri për Procedurën Penale janë publikuar në platformën elektronike ENER, duke u hapur rrugë ekspertëve juridikë, institucioneve, organizatave të shoqërisë civile dhe qytetarëve që të japin mendimet, komentet dhe propozimet e tyre.
Me këtë hap, Ministria e Drejtësisë nën drejtimin e Shasivarit dëshmon se reformat e mëdha nuk duhet të hartohen pas dyerve të mbyllura, por përmes transparencës, debatit profesional dhe pjesëmarrjes së publikut.

Ministri Shasivari u ka bërë thirrje gjyqtarëve, prokurorëve, avokatëve, profesorëve universitarë dhe të gjithë qytetarëve të interesuar që t’i shqyrtojnë projekttekstet dhe të kontribuojnë në përmirësimin e tyre.

Në kuadër të këtij procesi, Ministria do të organizojë edhe debate publike profesionale, ndërsa të dy projektligjet tashmë i janë dorëzuar Komisionit Evropian për mendim.
Kjo qasje synon të sigurojë që legjislacioni i ri penal të ndërtohet mbi bazën e ekspertizës vendore, standardeve evropiane dhe praktikave më të mira ndërkombëtare.

Mesazhi i ministrit Shasivari është i qartë: drejtësia nuk ndërtohet me vendime të mbyllura, por me transparencë, përgjegjësi dhe dialog. Publiku nuk është vetëm vëzhgues i reformës, por pjesë e saj.(INA)

Advertisement