Mbi 50 gra nga rajoni i Pollogut do të përfitojnë nga programi i trajnimeve “Leading Change with Meaningful Voice” i cili synon fuqizimin e rolit të grave dhe rritjen e pjesëmarrjes së tyre në proceset e vendimmarrjes lokale. Programi organizohet nga Instituti për Lidership dhe Politika Publike, me mbështetjen e Ambasadës së Gjermanisë. Moduli i parë i trajnimit, me temë “Lidershipi dhe Pjesëmarrja e Grave”, u zhvillua sot, me pjesëmarrjen e grave nga këshillat komunalë, partitë politike dhe administratat komunale. Gjatë trajnimit, pjesëmarrëset patën mundësi të zhvillojnë aftësitë e tyre në lidership, komunikim publik dhe pjesëmarrje aktive në jetën publike. Hapjen e trajnimit e bëri drejtoresha ILPP-së, Pranvera Kasami, ndërsa pjesëmarrëset u përshëndetën edhe nga ambasadorja e Gjermanisë në Maqedoninë e Veriut, Petra Drexler.

Trajnerja Adelina Marku theksoi rëndësinë e të mësuarit gjatë gjithë jetës dhe shkëmbimit të përvojave, veçanërisht për gratë e reja në pozita udhëheqëse. Ajo vlerësoi se ndryshimet e shpejta teknologjike, inteligjenca artificiale dhe zhvillimet në politikë kërkojnë qasje të reja në lidership, ndërsa gratë kanë një rol të rëndësishëm në afrimin e elitave politike me qytetarët dhe në zbatimin e reformave që synojnë integrimin evropian.

Adelina Marku – Trajnere
“Kam një bindje të plotë se trajnimet e tilla që kanë të bëjnë me të mësuarit gjatë gjithë jetës janë shumë të rëndësishme dhe ne që e mbajmë veten si trajnere, si eksperte të një lëmie, jemi gjithmonë të gatshëm që të ofrojmë dijeninë tonë, përvojën tonë dhe të dëgjohemi për mënyrat e reja me të cilat ballafaqohen gratë e sidomos femrat e reja në pozitat udhëheqëse. Le të mos harrojmë se bota ndryshon shumë, konteksti i teknologjisë ka ndryshuar shumë dhe këta koncepte po marrin forma të reja. Ne jetojmë në kohën e AI dhe në kohën e rritjes së populizmit në politikë, dhe një zhvendosje të elitave politike nga votuesi, dhe këtu e shoh rolin e grave, si bashkues i elitave politike me votuesin dhe implementimin strategjik të atyre postulatave që ne i kërkojmë drejt BE-së”.

Nga ana tjetër, ambasadorja gjermane Petra Drexler nënvizoi se pjesëmarrja e grave në pozita udhëheqëse është një tregues i rëndësishëm i legjitimitetit demokratik. Ajo theksoi se zhvillimi i plotë i potencialit të një shoqërie është i mundur vetëm kur të gjitha talentet përfaqësohen dhe marrin pjesë në proceset e vendimmarrjes, duke riafirmuar mbështetjen e Gjermanisë për këtë iniciativë.

Petra Drexler – Ambasadore e Gjermanisë në Shkup
“Është kënaqësi të jesh këtu në Tetovë, në këtë mëngjes, me Institutin për Lidership dhe Politika Publike. Çështja e grave në pozita udhëheqëse është tregues i legjitimitetit demokratik sepse shoqëritë mund të zhvillojnë potencialin e plotë vetëm nëse të gjithë talentët participojnë në vendimmarrje. Është një sfidë që të gjithë ne e ndajmë, në Gjermani, në Maqedoni të Veriut dhe në shtetet e tjera, çfarëdo që statistikat për përfaqësimin e grave në vendimmarrje na thonë. Prandaj ne jemi shumë krenarë që të bashkëpunojmë me institutin dhe do të doja ta falënderoj institutin për këtë iniciativë. Ne jemi partnerë të tyre”!

Advertisement

Përmes këtij programi, ILPP synon të mbështesë gratë që mbajnë role publike, duke i inkurajuar të marrin pjesë më aktive në vendimmarrje dhe të ndërmarrin iniciativa që adresojnë nevojat e komuniteteve. Programi pritet të kontribuojë në rritjen e përfaqësimit të barabartë dhe fuqizimin e grave në nivel lokal./Tv Koha/ 

Tri kryeqytete, një skenë dhe një gjuhë e përbashkët artistike. Tirana, Prishtina dhe Shkupi bashkohen javën e ardhshme përmes magjisë së teatrit.

Nga 16 deri më 22 nëntor, Shkupi do të shndërrohet në kryeqendrën e artit skenik shqiptar, duke mirëpritur edicionin e katërt të Festivalit Mbarëkombëtar të Teatrit “Moisiu”.

Dhjetë shfaqje nga Shqipëria, Kosova, Maqedonia e Veriut dhe Presheva do të sjellin në një skenë histori, emocione dhe interpretime që kapërcejnë kufijtë.

Një festë e teatrit që këtë vit përkon edhe me atmosferën e festave të nëntorit.

ISMET RAMADANI, Drejtor i Teatrit Shqiptar – Shkup

Advertisement

“Festivali Moisiu është një nga ngjarjet, lirisht mund të them, më të mëdha kulturore që ndodh këtë vit për neve shqiptarët. Dhe ashtu edhe duhet ta trajtojmë, duhet të jetë festë pasi që ka filluar edhe tani në nëntor gjatë festave të nëntorit.”

Nga “Drejtësi në Nuremberg”, që do të hapë festivalin, te “Hamleti”, “Duke pritur Godonë” e “Romeo dhe Xhulieta”, skena e Shkupit do të flasë përmes veprave shqiptare dhe kryeveprave të dramaturgjisë botërore.

Por “Moisiu” nuk synon të bashkojë vetëm aktorët para publikut.

Festivali është edhe një mundësi për të ndërtuar ura të reja bashkëpunimi mes teatrove shqiptare, për të shkëmbyer përvoja dhe për të diskutuar të ardhmen e artit skenik.

“Qëllimi ynë thelbësor në këtë festival është nxitja dhe forcimi i bashkëpunimit mes artistëve shqiptarë, si dhe krijimi i një ure të fortë njohjeje mes njerëzve të skenës dhe artit tonë.”

Advertisement

Festivali që nisi rrugëtimin në Shkup në vitin 2022, për të vazhduar në Tiranë dhe Prishtinë, rikthehet aty ku gjithçka filloi.

Më 22 nëntor, “Përtej hekurave” e Teatrit Shqiptar të Shkupit do të ulë perden e edicionit të katërt, ndërsa do të ndahen edhe çmimet për arritjet artistike.

Tri kryeqytete që i ndajnë kufijtë, por i bashkon skena.

Për shtatë ditë, Shkupi do të jetë shtëpia e përbashkët e teatrit shqiptar./Tv Koha – Shkup/

Advertisement

Maqedonia sot është përfshirë nga moti i ngrohtë dhe erërat e fuqishme, nën ndikimin e një cikloni nga Atlantiku.

Temperaturat kanë arritur deri në 25 gradë Celsius, madje 8 deri në 10 gradë mbi mesataren për muajin nëntor.

Pamjet që  po I shihni i realizoi Tv Koha gjatë paradites ku shihet atmosfera që mbretëron rrugëve të Tetovës, nisja e erës, rëniet e gjetheve por edhe “qetësia para furtunës”.

Sipas parashikimeve meteorologjike, do të fryjë erë e fuqishme nga jugu dhe jugperëndimi, e cila lokalisht mund të tejkalojë shpejtësinë prej 80 kilometrash në orë. Për këtë arsye, territori i vendit është përfshirë në fazën e verdhë dhe portokalli të paralajmërimit meteorologjik.

Për shkak të erërave të forta, Komuna e Tetovës u ka bërë thirrje qytetarëve të tregojnë kujdes, të shmangin qëndrimin pranë pemëve, shtyllave elektrike dhe objekteve të pasigurta, të cilat mund të paraqesin rrezik për sigurinë e tyre.

Advertisement

Ndërkohë, nga dita e shtunë pritet ndryshim i motit, me ulje të temperaturave, veçanërisht në pjesët veriore të vendit.

 Parashikimet paralajmërojnë reshje shiu, ndërsa mundësia për borë në zonat malore të rajonit lidhet kryesisht me pjesët perëndimore, jugperëndimore dhe jugore të Serbisë.

Meteorologët nuk paralajmërojnë borë në qytetet dhe vendbanimet e ulëta të Maqedonisë.

Edhe  Komuna e Tetovës  apelon për kujdes!

/Tv Koha/ 

Advertisement