Lajme nga vendi
Kasami: Çdo ditë punohet për transformimin e Tetovës
Kandidati i koalicionit VLEN për kryetar të Komunës së Tetovës, Bilall Kasami, ka paraqitur para mediave projektet infrastrukturore që, siç tha, po e transformojnë qytetin në një qendër moderne dhe të lidhur.
Në një paraqitje nga terreni, Kasami theksoi se pushteti i mëparshëm e kishte shndërruar Tetovën në “katrahurë urbane”, me rrugë të dëmtuara, infrastrukturë të shkatërruar dhe mungesë të plotë vizioni urbanistik.
“Nuk ishin në gjendje një rrugicë ta bëjnë si duhet. Ju i dhatë fund asaj katrahure me votën tuaj për ndryshim, ndërsa ne ua kthyem me punë dhe përkushtim. Për çdo ditë po punohet intensivisht për transformimin e Tetovës”, deklaroi Kasami.
Ai tha se aktualisht po zhvillohen punimet për vazhdimin e bulevardit “VS Bato”, i cili do të lidhet me rrugën e Porojit te pompa e benzinës në fshat. Sipas tij, ky është një nga projektet më të rëndësishme infrastrukturore për rajonin.
“Gjatësia e këtij segmenti të bulevardit është 1.5 kilometra, me gjerësi prej 7 metrash, trotuar prej 2 metrash dhe ndriçim publik përgjatë gjithë trasesë. Në fillim dhe në fund të segmentit do të ndërtohen edhe dy rrethrrotullime. Ky mega-projekt lidh Poroji dhe Xhepçishtin me autostradën, duke e transformuar tërësisht këtë zonë”, u shpreh Kasami.
Kreu i Komunës dhe kandidati për një mandat të dytë theksoi se prioritet i tij mbetet infrastruktura moderne dhe lidhjet urbane që e bëjnë Tetovën një qytet funksional e të zhvilluar.
“Aty ku nuk ka as rrugë për këmbësorë, ne depërtojmë bulevarde. Në mandatin e parë, këtë e bëmë me depërtimin e një aksi të bulevardit Bllagoja Toska, një aksi të Boris Kidriçit dhe një aks tjetër të VS Batos. Në mandatin e ardhshëm, përveç që përfundojmë këtë aks drejt Porojit, do të ndërtojmë edhe një aks tjetër të këtij bulevardi drejt Qarkores së Treboshit”, tha Kasami.
Në vijim, ai paralajmëroi edhe katër mega-projekte të reja për zgjatjen e bulevardeve ekzistuese në qytet:
• Përfundimi i Bulevardit “Ilinden”, nga Posta deri te rrethrrotullimi te Stadiumi i Qytetit – projekt që, sipas Kasamit, “do të hapë zemrën e qytetit dhe do të lehtësojë qasjen drejt Drenovecit, Çentishtës dhe fshatrave të rrugës rajonale Tetovë-Jazhincë”.
• Zgjatja e Bulevardit “Bllagoja Toska”, nga Stadiumi i Vjetër deri te rruga rajonale Tetovë-Jazhincë, si dhe nga Shkolla Tekstile deri te rrethrrotullimi me “Ilindenin”.
• Vazhdimi i Bulevardit “Boris Kidriç”, nga kryqëzimi me “Bllagoja Toska” deri te Stacioni i Autobusëve.
• Vazhdimi i Bulevardit “Ilinden”, nga rrethrrotullimi i UEJL-së deri te mbikalimi për në Gostivar.
“Kështu Tetova bëhet qytet modern, i lidhur dhe me rrugë bashkëkohore si asnjëherë më parë. Koha e rrugicave me gropa ka përfunduar. Tetova nuk kthehet më në atë kohë të zymtë. Tetova vazhdon përpara drejt zhvillimit – edhe më shumë, edhe më mirë, edhe më fuqishëm në katërvjeçarin e ardhshëm”, përfundoi Kasami.
Ministria e Punëve të Brendshme i njofton qytetarët se, sipas informacioneve të pranuara nga organet kompetente të Republikës së Greqisë, më 27.07.2026 (e hënë) është paralajmëruar grevë e punonjësve të doganave në pikat kufitare greke Evzoni (Bogorodicë), Dojrani (Dojran) dhe Niki (Mexhitli).
“Gjatë periudhës nga ora 05:00 deri në 09:00 sipas kohës së Maqedonisë (06:00–10:00 sipas kohës së Greqisë), në këto pika kufitare, automjetet e udhëtarëve do të lejohen të kalojnë çdo 10 minuta, ndërsa qarkullimi i automjeteve të transportit të mallrave do të jetë plotësisht i ndërprerë, si për hyrje ashtu edhe për dalje nga Republika e Greqisë”.
“Ministria e Punëve të Brendshme do të ndërmarrë të gjitha masat e nevojshme dhe do të angazhojë të gjitha kapacitetet njerëzore dhe teknike për menaxhimin e situatës”, – thonë nga MPB.
Sipas të dhënave nga institucionet publike shëndetësore në Gostivar, gjatë ditës së djeshme (23.07.2026) janë regjistruar gjithsej 197 pacientë të rinj, përkatësisht persona që për herë të parë kanë kërkuar ndihmë mjekësore, çka tregon një ulje krahasuar me një ditë më parë.
Në Spitalin e Përgjithshëm “Dr. Ferid Murad” në Gostivar janë regjistruar gjithsej 117 vizita të reja, prej të cilave 82 në repartin e sëmundjeve infektive (pa shtrime të reja në spital dhe me tre pacientë të liruar), 40 në repartin e pediatrisë dhe 7 vizita në Qendrën e Urgjencës.
Në Shtëpinë e Shëndetit në Gostivar janë regjistruar 80 vizita të reja në shërbimin kujdestar, si dhe 13 thirrje në Shërbimin e Ndihmës së Shpejtë.
Lajme nga vendi
Hetime për kredinë hungareze 1 miliardë € që mori Maqedonia e Veriut, urdhëron Magyar
Qeveria në Hungari, e udhëhequr nga Péter Magyar, do të hetojë nëse ka pasur keqpërdorim të mundshëm të fondeve shtetërore në lidhje me kredinë prej një miliard eurosh që “Eximbanka” shtetërore ia dha Maqedonisë së Veriut.
Kështu njoftoi dje Magyar, i cili, siç raportuan mediat vendase, ndau se kredia e marrë nga Maqedonia e Veriut është një nga katër rastet e lidhura me “Eximbank”-un, për të cilat sot Ministria e Ekonomisë dhe Energjetikës ka dorëzuar ankesa, shkruan Fokus.
„Ministria e Ekonomisë dhe Energjetikës dorëzoi katër ankesa të enjten për mashtrim të dyshuar në vlerë totale prej një mijë miliardë forintash, në katër raste të ndryshme. Të gjitha kanë të bëjnë me aktivitetet e ‘Eximbank’-ut“ – tha Magyar.
Ai theksoi se kredia u dha në kushte shumë të favorshme me një normë interesi prej 3,25 për qind.
Kredia, tha ai, do t’i kushtojë buxhetit hungarez 90 miliardë forinta (rreth 248 milionë euro) për shkak të diferencave të interesit.
„Kjo paraqet një barrë prej 90 miliardë forintash (rreth 248 milionë euro) për buxhetin hungarez, ndërsa shteti hungarez mori përsipër garanci 100 për qind për kredinë nën udhëheqjen e qeverisë së Orbanit“, tha Magyar.
Sipas tij, norma e interesit me të cilën “Eximbanka” shtetërore i dha kredinë Maqedonisë është shumë më e favorshme se normat e interesit me të cilat kompanitë hungareze dhe qytetarët e vendit marrin hua.(INA)
MPB, të hënën në mëngjes grevë e doganierëve grekë në pikat kufitare
Spanja shpall emergjencën kombëtare për shkak të zjarreve masive, mbi 10 mijë persona evakuohen
Ulet numri i rasteve të qytetarëve që kërkojnë ndihmë mjekësore në Gostivar
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
