Ministria e Ekonomisë dhe Punës, në bashkëpunim me Inspektoratin Shtetëror të Tregut, përpiloi analizë krahasuese të lëvizjes së çmimeve të produkteve bazë ushqimore dhe joushqimore, në përputhje me konkluzionin e miratuar në seancën e 162-të të Qeverisë së Republikës së Maqedonisë së Veriut.

Analiza përfshin çmimet e 55 produkteve më të shitura, të përcjella në katër zinxhirë tregtar me pozicionim të ndryshëm të çmimeve, në periudhën nga 1 shkurti deri më 1 prill të vitit 2026.

Rezultatet tregojnë se në periudhën e analizuar është regjistruar rritje minimale e çmimeve të shitjes prej 0,43%, derisa çmimet e blerjeve shënojnë rritje diçka më të lartë prej 1,01%. Në të njëjtën kohë, marzhi mesatar i fitimit bruto te tregtarët është ulur nga 16,28% në 15,80%, gjë që tregon se një pjesë e presionit nga rritja e çmimeve blerëse është absorbuar nga tregtarët, me qëllim që të ruhet stabiliteti i çmimeve për qytetarët.

Në lidhje me kategoritë individuale:

– Тe produktet ushqimore bazë ka rritje të lehtë prej 0,45%, me ç’rast rritje më të madhe ka te kosi, djathi, vezët dhe vaji;

Advertisement

– në rastin e pijeve joalkoolike është regjistruar ulje prej 1,01%;

– te frutat dhe perimet ka rënie prej 0,86%, përkundër rritjes së domateve dhe qepëve;

– te produktet bazë të higjienës është shënuar rritje prej 1,42%.

Ministria vlerëson se lëvizjet e çmimeve në periudhën e analizuar janë mesatare dhe nën kontroll, falë edhe uljes së marzheve tregtare.

Ministria e Ekonomisë dhe Punës do të vazhdojë të monitorojë në mënyrë aktive kushtet e tregut dhe, nëse është e nevojshme, të propozojë masat e duhura për stabilizimin e çmimeve.

Advertisement

Vazhdon kaosi në trafik si pasojë e parkimit paralel në Tetovë. Këto pamje që po shihni vazhdojnë të jenë përditshmëri, ndërsa situata pritet të përkeqësohet me ardhjen e mërgimtarëve gjatë sezonit të verës. Nga data 1 janar deri më 13 prill të këtij viti, në Sektorin për Punë të Brendshme të Tetovës janë regjistruar 1300 gjoba për parkim paralel dhe parkim në vend të gabuar, por megjithatë kjo, si duket, nuk e ka zgjidhur problemin. Përveç gjobave, shërbimi komunal i merimangës ka ngritur mbi 1 mijë vetura vetëm për këto 3 muaj.

FATMIR REXHEPI – ZËDHËNËS I SPB TETOVË
“Sa u përket keqparkimeve në qytetin e Tetovës, pjesëtarët e policisë të Stacionit për Siguri në Trafikun Rrugor, gjatë këtyre tre muajve e gjysmë të vitit 2026, kanë shqiptuar diku 1300 gjoba sa i përket keqparkimit, kurse shërbimi komunal i merimangës ka ngritur mbi 1 mijë automjete, për të cilat janë përgatitur parashtresat përkatëse dhe shoferët do të ballafaqohen me gjoba. Sa i përket gjobave, numri më i madh i tyre janë për parkim në rend të dyfishtë, në zonë të udhëkryqeve, rreth rrotullimeve, vijave të bardha dhe trotuareve.”

Por qendra e qytetit nuk është i vetmi vend ku shoferët e pandërgjegjshëm bllokojnë rrugën. Edhe në pjesët e tjera të qytetit na përsëritet i njëjti problem. Përveç ngadalësimit dhe ngulfatjes së trafikut, sfidë në vete është kalimi i ndihmës së shpejtë, kalimi i zjarrfikësve dhe i policisë nëpër lagjet me rrugë më të ngushta në periferi të Tetovës.

Ekipi i Televizionit Koha para disa ditësh qëndroi edhe në transportin publik, ku pamë nga afër se si shoferët e autobusëve përballen me vështirësi dhe bllokim në trafik, pikërisht për shkak të parkimit paralel si dhe parkimit të veturave në vendet e parapara për ndalim të autobusëve.

Ndërkohë, edhe Kryetari i Komunës së Tetovës, Bilall Kasami, para disa ditësh i tha TV-Kohës se është i vetëdijshëm për problemin me parkimin paralel, nga ku paralajmëroi se komisioni i formuar nga ana e Komunës së Tetovës pritet që së shpejti të japë zgjidhje, duke trefishuar numrin e parkingjeve për vetura dhe duke intervenuar për ndryshimin e regjimit të komunikacionit në disa rrugë që paraqiten si problematike. Deri në zgjidhjen e këtij problemi, Kasami u bëri apel qytetarëve që të kenë kujdes dhe të mos pengojnë qarkullimin e lirë në Tetovë duke u parkuar në vende jo adekuate.

Advertisement

Qeveria tha sot se e ka miratuar planin për energji dhe klimë për periudhën 2025-2030 me të cilin ajo synon që të ndërmarrë gjithsejtë 61 masa, në të cilan përfshihen edhe projekte për prodhim rryme elektrike nga burimet e ripërtrishme.

“Qeveria miratoi Planin Kombëtar të Integruar për Energjinë dhe Klimën 2025–2030 – një dokument strategjik që e vendos vendin në një rrugë të qartë drejt transformimit të energjisë, zhvillimit të qëndrueshëm dhe përafrimit të plotë me politikat evropiane,” tha ministria e energjisë sot.

Sipas ministries, plani mbulon: 26 masa dekarbonizimi; 20 për efikasitetin e energjisë; 3 për sigurinë energjetike; 11 mbi tregun e brendshëm të energjisë dhe 1 për kërkim, inovacion dhe konkurrueshmëri.
“Fokusi është i qartë – ulja e emetimeve të gazrave serrë, rritja e burimeve të energjisë së rinovueshme dhe përmirësimi i ndjeshëm i efikasitetit të energjisë,” tha kjo ministri në një komunikatë.

Sipas ministrisë, qeveria do të ndërmarrë “hapa konkretë për të rritur investimet në energjinë diellore, të erës dhe hidroenergjinë; për të futur një sistem çmimesh të karbonit në përputhje me standardet evropiane; për të zhvilluar ruajtjen e energjisë dhe infrastrukturën moderne të energjisë; si dhe për të braktisur gradualisht qymyrin si burim energjie.”

Me zbatimin e planit të miratuar sot, ministria thotë se synohet për një „përmirësim të ndjeshëm të cilësisë së mjedisit; stabilitet dhe pavarësi më të madhe energjetike; një cikël të ri investimesh në sektorin e energjisë; një tranzicion të përshpejtuar të gjelbër dhe zhvillim ekonomik.“

Advertisement