Çmimet e naftës u rritën përsëri mbi 102 dollarë për fuçi, pasi sulmet e reja ndaj anijeve në rajonin e Gjirit Persik ngritën frikën për ndërprerje të mëtejshme të furnizimit. Kontratat e ardhshme të naftës Brent ishin rreth 101.80 dollarë për fuçi të mërkurën, ndërsa nafta WTI amerikane tregtohej rreth 89.90 dollarë. Tregu mbetet jashtëzakonisht i ndjeshëm ndaj zhvillimeve në Lindjen e Mesme.

Ngushtica e Hormuzit, nëpër të cilën kalon normalisht një pjesë e konsiderueshme e naftës botërore, po tërheq vëmendje të veçantë. Sulmet në rritje ndaj anijeve cisternë po rrisin gjithashtu kostot e transportit, duke mbështetur më tej rritjen e çmimeve.Megjithatë, ka edhe faktorë në treg që kufizojnë rritjen. Arabia Saudite ka raportuar mundësi në rritje për eksport përmes rrugëve alternative, dhe tubacioni i saj Lindje-Perëndim mund të devijojë deri në 5.8 milionë fuçi në ditë në Detin e Kuq. Presion shtesë në treg krijohet edhe nga rezervat e ulëta globale . Sipas Reuters, inventarët komercialë të naftës janë në nivele kritikisht të ulëta, duke e bërë tregun shumë më të ndjeshëm ndaj çdo ndërprerjeje të re në prodhim ose transport.

Ndërkohë, rezervat e naftës bruto në SHBA ranë me rreth 3.2 milionë fuçi, një faktor tjetër që mbështet çmimet.

Një ndërtesë shtatëkatëshe u shemb pjesërisht mëngjesin e sotëm në lagjen Maltepe të Stambollit, ndërsa nga rrënojat u shpëtuan pesë persona, mes tyre dy fëmijë.

Ngjarja ndodhi rreth orës 05:40. Tre katet e para të ndërtesës u shembën, ndërsa banorët e kateve të sipërme u evakuuan. Ekipet e AFAD-it, zjarrfikësit, policia dhe ekipet mjekësore nisën menjëherë operacionin e kërkim-shpëtimit.

Pesë personat e nxjerrë nga rrënojat u dërguan në spital. Gjatë ndërhyrjes, një zjarrfikës gjithashtu u transportua në spital pasi iu përkeqësua gjendja.

Shkaku i shembjes ende nuk dihet. Sipas autoriteteve, ndërtesa ishte ndërtuar në vitin 1987 dhe kishte 12 njësi banimi. Hetimet për përcaktimin e shkaqeve kanë nisur.

Çmimet në pikat e karburantit në Gjermani po njohin vetëm një drejtim, rritje rekord. Tani kancelari federal Friedrich Merz (CDU) vlerëson se është arritur kufiri i përballueshmërisë për shumë qytetarë. “Mendoj se duhet të veprojmë”, deklaroi ai të martën në Berlin. Sipas Merzit, qeveria ende nuk ka vendosur për instrumentet konkrete, por po shqyrton mundësinë e ndërhyrjeve përmes taksave dhe tarifave. Ndërkohë, industria e naftës parashikon që normalizimi i çmimeve të ndodhë vetëm gjatë vitit të ardhshëm.

“Për shumë njerëz që varen çdo ditë nga makina, kufiri i përballueshmërisë është arritur”, tha kancelari. Ai theksoi se qeveria federale po zhvillon konsultime intensive me landet për masat e mundshme lehtësuese dhe premtoi se një propozim konkret do të paraqitet shumë shpejt. Edhe pse në mbledhjen e kabinetit të së mërkurës nuk priten vendime zyrtare për këtë çështje, sipas burimeve qeveritare tema e lehtësimit të barrës së çmimeve të karburanteve do të diskutohet të paktën në mënyrë joformale.

Dy propozime të ndryshme

Ndërsa SPD-ja kërkon kufizimin e çmimeve dhe vendosjen e një takse për fitimet e tepërta të gjigantëve të naftës, Ministria e Ekonomisë favorizon një zgjidhje tjetër. Nga Ministria e Ekonomisë pati skepticizëm ndaj propozimeve të SPD-së për frenimin e çmimeve të karburanteve. Sipas burimeve të ministrisë, si kufizimi administrativ i çmimeve, ashtu edhe vendosja e një takse mbi fitimet e tepërta të koncerneve të naftës, mbartin probleme dhe rreziqe të konsiderueshme.

Ministria e Ekonomisë argumenton se modeli luksemburgas nuk është i përshtatshëm për Gjermaninë. Madhësia e tregut dhe kushtet e ndryshme ekonomike e bëjnë të vështirë transferimin e kësaj skeme. Për më tepër, një tavan për çmimet e karburanteve do të mund të krijonte probleme ligjore dhe kosto të konsiderueshme për shtetin. Si shembuj përmenden Polonia dhe Austria, të cilat eksperimentuan me masa të ngjashme, por i hoqën ato vetëm pak muaj më vonë.SPD-ja sheh si model Belgjikën. Atje, shteti cakton çdo ditë çmimin maksimal të karburanteve, bazuar në ecurinë e çmimit të naftës dhe kostot e tregut. Pikat e karburantit mund të ofrojnë çmime më të ulëta, por jo më të larta se kufiri i përcaktuar. Sipas socialdemokratit Armand Zorn, kjo skemë mbron konsumatorët nga rritjet e pakontrolluara, pa krijuar kosto shtesë për buxhetin e shtetit.

Advertisement

Kurse Ministrja e Ekonomisë, Katharia Reiche, mbështet një zgjidhje tjetër. Ajo favorizon pagesa të drejtpërdrejta për familjet me të ardhura të ulëta. Këto do të duhej të zbatoheshin nga Ministria Federale e Financave. “Një instrument i tillë tashmë ekziston”, tha politikania e CDU-së. “Kjo do të ishte një mënyrë për të lehtësuar shpejt barrën financiare, por në mënyrë të targetuar, pikërisht për ato grupe të ardhurash” që paguajnë pak ose aspak taksa./DW