Mbi 1.700 kandidatë kanë shprehur interes për t’u bërë pjesë e Armatës së Maqedonisë së Veriut, por vetëm 300 prej tyre do të fitojnë statusin e ushtarit profesionist. Procesi i përzgjedhjes është në fazën përfundimtare dhe do të bazohet në rezultatet e testimeve fizike, kontrolleve shëndetësore dhe intervistave. Ndërkohë, një konkurs i ri për pranimin e ushtarëve profesionistë paralajmërohet edhe për vitin 2027.

Mbi 1.700 aplikantë të interesuar për t’u punësuar në Armatë si ushtarë profesionistë do të konkurrojnë mes tyre për një nga 300 vendet e punës që pritet të plotësohen në bazë të konkursit të hapur nga Ministria e Mbrojtjes për vitin 2026.

Zëvendësministri i Mbrojtjes, Admir Shabani, në një prononcim për TV Koha, tha se përzgjedhja do të bëhet në bazë të rezultateve të kandidatëve që do t’i përfundojnë me sukses të gjitha fazat e nevojshme, përfshirë testimet fizike dhe ato shëndetësore.

Ai bëri të ditur se procedura është në fazën finale dhe se përzgjedhja pritet të bëhet së shpejti.

Të gjithë kandidatët të cilët në ditën e përfundimit të konkursit nuk i kanë mbushur 25 vjet, kanë pasur të drejtë të kalojnë në selektimin administrativ dhe të vazhdojnë më tej edhe me fazat e tjera. Faza e dytë është faza e kontrollit të përgatitjes fizike të kandidatëve. Vijon faza e tretë, kontrollet mjekësore, pastaj intervista dhe në fund do të krijohet ranglista e personave që i kanë kaluar të gjitha fazat. Ata do të përzgjidhen në bazë të sistemit të meritokracisë dhe rezultateve të arritura. Do të selektohen 300 anëtarë të rinj të Armatës, në fakt, 300 ushtarë profesionistë.

Advertisement

Shabani foli edhe për një konkurs tjetër, i cili pritet të hapet gjatë vitit 2027, duke theksuar se numri i ushtarëve që do të pranohen do të përcaktohet në bazë të analizave dhe nevojave të Armatës.

Në bazë të të gjitha parashikimeve tona, duke pasur parasysh edhe pensionimin e anëtarëve të Armatës, pensionimin e ushtarëve profesionistë, këto numra do të duhet të zëvendësohen me numra të rinj dhe, kuptohet, që do të kemi edhe konkurs të ri për pranimin e ushtarëve profesionistë. Cili do të jetë numri, do të shohim në momentin e shpalljes së konkursit, duke i pasur parasysh të gjitha analizat dhe të gjithë numrat të cilët na çojnë te numri final i shpalljes së konkursit.

Ndërkohë, ditë më parë u bë e ditur se të gjithë të punësuarit në Armatë dhe në Ministrinë e Mbrojtjes do të përfitojnë rritje të pagave prej 10 për qind, duke filluar nga janari i vitit 2027.

/Tv Koha – Shkup/

Advertisement

Vakti i subvencionuar studentor mund të shndërrohet edhe në mundësi për zbritje shtesë në markete. Qeveria po shqyrton një model që studentëve t’ua mundësojë shfrytëzimin e mjeteve mujore edhe për blerje në rrjetet tregtare. Por, paralelisht me këtë paralajmërim, vazhdojnë kritikat për mosrritjen e shumës së subvencionit në përputhje me inflacionin.

Më shumë përfitime nga i njëjti subvencion! Ky është synimi i Qeverisë, e cila po punon për një mundësi të re që studentët, përveç vaktit të subvencionuar, të përfitojnë edhe zbritje në markete.

Kryeministri Hristijan Mickoski njoftoi se po shqyrtohet mundësia që shuma mujore e miratuar për studentët të shfrytëzohet edhe në rrjetet tregtare, përmes privilegjeve dhe zbritjeve shtesë.

Megjithatë, për momentin nuk janë bërë të ditura marketet ku do të vlejë kjo masë, përqindja e zbritjeve dhe koha kur pritet të fillojë zbatimi.

HRISTIJAN MICKOSKI – “Ne tashmë jemi duke punuar në Qeveri për këtë çështje, në kuadër të asaj që përmenda, që studentët t’i shfrytëzojnë këto privilegje jo vetëm për vaktin studentor, por edhe shumën, përkatësisht vlerën që do t’u miratohet në nivel mujor, ta përdorin edhe në rrjetet tregtare për zbritje dhe privilegje shtesë. Qëllimi është që studentët të përfitojnë më shumë nga mbështetja financiare ekzistuese”

Advertisement

Paralajmërimi vjen në kohën kur subvencionimi i vaktit studentor është bërë objekt përplasjesh mes organizatave studentore dhe Ministrisë së Arsimit.

Përfaqësuesi i Forumit për Ndryshime në Arsim, Blendi Hodai, javën e kaluar njoftoi se organizata ka ngritur padi kundër Ministrisë, me pohimin se gjatë tre viteve të fundit shuma e subvencionit nuk është harmonizuar me inflacionin vjetor, siç parashihet me ligj.

Mickoski porositi se do të vazhdojë t’i mbështesë studentët dhe se pas përfundimit të karrierës politike planifikon të rikthehet në universitet.

Klientët e “Alta Bankës” që nuk kanë kartela pagesore, nga e hëna, 9 nëntor 2026, do të mund të tërheqin para nga llogaritë e tyre edhe në ekspoziturat në Tetovë dhe Strumicë.

Nga java e ardhshme, limiti javor për tërheqjen e parave të gatshme dhe pagesat në pikat e shitjes me kartelat pagesore të “Alta Bankës” SHA Manastir do të rritet nga 10.000 në 15.000 denarë për një javë, njoftoi guvernatori i Bankës Popullore, Trajko Sllaveski.

Ndër lehtësimet e paralajmëruara është edhe mundësia që klientët të tërheqin në tërësi mjetet e reja të deponuara nga pagat, pensionet dhe transferet sociale, nëse pagesat vijnë nga institucione ose kompani që kanë llogari në banka të tjera.

Kjo masë ka të bëjë vetëm me të hyrat e reja dhe jo me të gjitha mjetet që klientët tashmë i kanë në llogaritë e tyre.

Banka Popullore më 1 nëntor vendosi administrim të përkohshëm në “Alta Bankën” në vend, me kohëzgjatje prej tre muajsh, pas falimentimit të bankës amë në Beograd.

Advertisement

Me këtë masë u kufizua disponimi i mjeteve të klientëve, duke u përcaktuar shuma maksimale prej 20.000 denarësh për tërheqje.

Problemet nisën në Serbi, pas zgjedhjeve, kur më 30 tetor Banka Popullore e Serbisë ia hoqi licencën e punës “Alta Bankës” në Beograd, për shkak të përkeqësimit të gjendjes financiare.

Pasojat u reflektuan edhe në funksionimin e “Alta Bankës” në vendin tonë.