Adil Ademi është zgjedhur komandant i Stacionit Policor në Gostivar, me mbështetjen unanime të Këshillit Komunal. Vendimi është marrë në seancën e sotme, ku para këshilltarëve ishte paraqitur lista me tre kandidatë për këtë pozitë.
Ademi ishte emëruar në këtë detyrë nga Ministria e Punëve të Brendshme më 28 maj 2025, ndërsa me votimin e sotëm merr edhe mbështetjen zyrtare të Këshillit Komunal, në përputhje me procedurën e paraparë në Ligjin për Policinë.
Sipas nenit 24 të këtij ligji, zgjedhja e komandantit të stacionit policor bëhet nga Këshilli Komunal, i cili përzgjedh një nga kandidatët e propozuar nga ministri i Punëve të Brendshme.
Me këtë vendim, Adil Ademi vazhdon drejtimin e Stacionit Policor në Gostivar, tashmë me përkrahjen edhe të përfaqësuesve të zgjedhur të qytetarëve në Këshillin Komunal.
Komandanti i policisë kujdeset për sigurinë e qytetarëve, andaj me rëndësi të madhe është të zgjidhet një profesionist i dëshmuar i cili do të angazhohet për ruajtjen e rendit dhe qetësisë.

Premtimi ynë po bëhet realitet. Sot bëmë një hap konkret: përcaktuam detajet teknike që transporti falas për studentët të hyjë në funksion.

Kështu ka shkruar në Facebook, Zv/Kryetari i Tetovës, Albi Qamili, teksa ka njoftuar se bashkë me drejtorin operativ të NP “Tetova Transport”, Arbër Ajdini, dhe drejtorin e “Te Klik”, Endrit Hasani, janë ulur në tryezë, siç thotë, me ata që i njohin më mirë nevojat e studentëve: kryetarin e Parlamentit Studentor të Universitetit të Tetovës, Gent Kurtishi, përfaqësuesin e Rektoratit të UT, Ibrahim Neziri; sekretarin e Unionit Studentor të UEJL, Blin Memeti; dhe anëtarin e Unionit, Egzon Ziberi.

Sot gjatë një deklarate për Tv Koha, Zv/Kryetari, Albi Qamili, u zotua se viti 2027 do t`i gjejë studentët me transport publik falas.

Me këtë hap, Komuna e Tetovës synon të lehtësojë shpenzimet e studentëve dhe të nxisë përdorimin e transportit publik. Sipas paralajmërimit të zëvendëskryetarit Albi Qamili, viti 2027 pritet t’i gjejë studentët me transport publik falas, ndërsa mbetet të përcaktohen detajet për zbatimin e kësaj mase.

Kryeministri i Shqipërisë, Edi Rama, pritet të qëndrojë në Shkup më 22 nëntor, me rastin e Ditës së Alfabetit të Gjuhës Shqipe, ndërsa gjatë vizitës parashikohet të zhvillojë takime me liderët e partive politike shqiptare në Maqedoninë e Veriut, raporton KDP duke u thirrur në burime të besueshme partiake.

Vizita e kryeministrit shqiptar përkon me 118-vjetorin e Kongresit të Manastirit, ngjarjes historike të vitit 1908 që vendosi themelet e alfabetit të përbashkët të gjuhës shqipe.

Kjo do të jetë hera e parë që Kryeministri Shqiptar Edi Rama do të vizitojë Qytetin e Alfabetit Shqip – Manastirin.

Por, këtë datë, Edi Rama e ka përkujtuar gjithmonë përmes rrjeve sociale, kurse në Samitin e Diasporës në Tiranë, propozoi që 22 Nëntori të jetë festë kombëtare edhe në Shqipëri.

Vitin e kaluar, historia e lindjes së alfabetit shqip dhe Kongresi i Manastirit ishin sjellë në një video të realizuar përmes AI dhe të postuar në Facebook nga kryeministri Edi Rama. Në të tregohet rëndësia e alfabetit në formësimin e gjuhës dhe identitetit shqiptar dhe njerëzit që e krijuan atë.

Advertisement

Përveç karakterit përkujtimor, vizita e Kryeministrit Rama në Manastir, pritet të ketë edhe dimension politik, për shkak të takimeve të paralajmëruara me përfaqësuesit e partive shqiptare.

Ardhja e Ramës vjen në një periudhë debatesh politike për përdorimin e gjuhës shqipe, pozitën institucionale të shqiptarëve dhe marrëdhëniet ndërmjet subjekteve politike shqiptare në Maqedoninë e Veriut.

Megjithatë, ende nuk është bërë e ditur nëse këto çështje do të jenë pjesë e diskutimeve të Ramës me liderët shqiptarë.

Më 22 nëntor shënohet përvjetori i përfundimit të Kongresit të Manastirit, i cili u mbajt nga 14 deri më 22 nëntor 1908 dhe bashkoi përfaqësues të trevave të ndryshme shqiptare për të njësuar alfabetin e gjuhës shqipe.

Kongresi konsiderohet një nga ngjarjet më të rëndësishme në historinë e arsimit, kulturës dhe identitetit kombëtar shqiptar.

Advertisement

Në Maqedoninë e Veriut, Dita e Alfabetit është festë zyrtare për pjesëtarët e komunitetit shqiptar./Tv Koha/