Zekerija Berisha nga VLEN, politikani shqiptar më i votuar në nivel nacional me 28,045 vota

Pas përfundimit të zgjedhjeve lokale dhe publikimit të rezultateve përfundimtare, subjektet politike kanë filluar analizat e tyre të brendshme lidhur me performancën zgjedhore. Në këtë kontekst, një ndër faktet më domethënëse që ka tërhequr vëmendje është rezultati i Zekerija Berishës, bartës liste në qytetin e Shkupit, i cili ka arritur të sigurojë 28,045 vota, duke u renditur kështu si politikani shqiptar më i votuar në nivel nacional.

Ky rezultat përfaqëson një shprehje të qartë të besimit qytetar, si dhe një vlerësim për punën, angazhimin dhe integritetin personal të z. Berisha. Njëkohësisht, ai dëshmon për frymën e re politike që ka krijuar koalicioni VLEN, duke promovuar kuadro të reja, profesionale dhe të dëshmuara në fushat e tyre përkatëse, të gatshëm të kontribuojnë në zhvillimin dhe përfaqësimin dinjitoz të qytetarëve.

Ky sukses është një tregues i qartë se ndryshimi i pritur nga qytetarët është i mundur, kur në skenën politike paraqiten individë me vizion, përvojë dhe përkushtim të sinqertë ndaj interesit publik.

Deri në mëngjesin e sotëm, në Komisionin Shtetëror të Zgjedhjeve (KSHZ) janë paraqitur 16 ankesa në lidhje me procedurën për përmbledhjen dhe përcaktimin e rezultateve të raundit të dytë të zgjedhjeve lokale, të cilat u zhvilluan të dielën, më 2 nëntor, përcjell Telegrafi Maqedoni.

Afati për paraqitjen e ankesave përfundon sot në orën 16:30, 48 orë pas shpalljes së rezultateve fillestare të zgjedhjeve.

Ankesat u paraqitën nga Haqim Ramadani, i mbështetur nga VLEN-i, në lidhje me procedurën për përmbledhjen dhe përcaktimin e rezultateve në qendrat e votimit 2034, 2033, 2032, 2035, në Bërvenicë. Në këtë komunë, në raundin e dytë të zgjedhjeve, Jovica Ilievski, i mbështetur nga VMRO-DPMNE dhe koalicioni, fitoi me 4.374 vota, ndërsa Ramadani fitoi 4.224 vota.
Koalicioni “Maqedonia Juaj” paraqiti dhjetë ankesa në lidhje me qendrat e votimit 2956, 2971/1, 2973, 2959/1, 2955, 2956/1, 2959, 2961/1, 2961, 2971 në Shuto Orizare.

Unioni i Romëve ka paraqitur ankesa edhe për Shuto Orizaren, për qendrat e votimit 2966, 2962 dhe 2961.
Në këtë komunë, në raundin e dytë të zgjedhjeve, Kurto Dudush nga Unioni i Romëve fitoi me 3.894 vota, ndërsa Erxhan Demir i mbështetur nga Koalicioni i udhëhequr nga OBRM-PDUKM fitoi 3,406 vota.

Koalicioni “Përvojë për Sukses”, i cili mbështeti Stevço Jakimovskin për votimin në Karposh, paraqiti ankesa në lidhje me përmbledhjen dhe përcaktimin e rezultateve për qendrat e votimit 2631 dhe 2613.

Advertisement

Në Karposh, kandidati i mbështetur nga OBRM-PDUKM dhe koalicioni, Sotir Lukrovski, fitoi me 13.512 vota, ndërsa Jakimovski fitoi 12.378 vota.

Ministria e Arsimit dhe Shkencës (MASH) dhe Byroja për Zhvillimin e Arsimit organizojnë një debat publik për listën e re të propozuar të librave letrarë për arsimin fillor dhe ftojnë të gjitha palët e interesuara – mësuesit, shërbimet profesionale dhe faktorët e tjerë në arsim – “të përfshihen aktivisht në përcaktimin e një liste bashkëkohore, gjithëpërfshirëse dhe cilësore të librave, që do t’u përgjigjet nevojave reale të nxënësve dhe procesit mësimor.”

MASH në faqen e saj zyrtare ka publikuar listën e propozuar të librave, duke theksuar se nevoja për përditësim të kësaj liste vjen “nga synimi për përputhje të vazhdueshme të përmbajtjeve mësimore me qëllimet bashkëkohore arsimore, karakteristikat zhvillimore të nxënësve dhe kontekstin e tyre social e emocional.”

– Lista e propozuar është përgatitur mbi bazën e listës që zbatohej në mësim nga viti shkollor 2019/2020. Disa tituj janë hequr për shkak të lexueshmërisë së ulët, mospërshtatshmërisë me moshën apo përmbajtjen. Për shkak të ndryshimeve në programet mësimore dhe lidhjeve ndërdisiplinore në mësim, disa vepra janë zhvendosur në klasa të tjera ose kanë marrë status të ri – nga të detyrueshme janë bërë zgjedhore dhe anasjelltas. Në propozim janë përfshirë vepra që trajtojnë tema bashkëkohore dhe të rëndësishme, si: identiteti dhe vetëbesimi, miqësitë dhe marrëdhëniet ndërnjerëzore, jeta shkollore dhe bullizmi, sfidat emocionale dhe psikologjike, shumëllojshmëria kulturore, përfshirja e fëmijëve me nevoja të veçanta arsimore – thuhet në njoftimin e Ministrisë së Arsimit dhe Shkencës.

Qëllimi është që nxënësit të lexojnë përmbajtje që janë të afërta me realitetin e tyre, por, shton MASH, “edhe mjaftueshëm të thelluara për analizë dhe interpretim simbolik, që nxisin të menduarin kritik, diskutimin dhe zhvillimin personal.”

Lista e propozuar e librave për lexim është e hapur për sugjerime për të gjitha klasat nga e dyta deri në të nëntën. Parashihet gjithashtu mundësia e përfshirjes së një vepre nga letërsitë kombëtare të të gjitha gjuhëve mësimore, me kusht që çdo vepër të përkthehet në të gjitha gjuhët zyrtare të mësimdhënies në Maqedoninë e Veriut.

Advertisement

Në njoftimin e MASH është publikuar edhe formulari për propozimin e një libri, i cili duhet të dërgohet më së voni deri në fund të këtij muaji (30 nëntor) në adresën elektronike të Byrosë për Zhvillimin e Arsimit: bro.macedonia@bro.gov.mk.