Autoritetet në të gjithë Egjiptin po kërkojnë një byzylyk 3.000-vjeçar, i cili është raportuar i zhdukur nga Muzeu i Kajros.

Byzylyku i rrallë prej ari, daton që nga mbretërimi i mbretit Amenemope, një faraon i Dinastisë së 21-të të Egjiptit të lashtë, i cili sundoi nga viti 993 deri në vitin 984 para Krishtit.

Ministria e antikiteteve tha se kishte marrë masa të menjëhershme pasi byzylyku ​​u zhduk nga laboratori i restaurimit të Muzeut Egjiptian dhe se rasti i ishte referuar policisë.

Një imazh i byzylykut është shpërndarë në të gjitha aeroportet, portet detare dhe pikat kufitare tokësore egjiptiane si një “hap paraprak për të parandaluar përpjekjet e kontrabandës”, shtoi ministria.

Ministria tha se kishte vonuar qëllimisht njoftimin e zhdukjes së byzylykut “për të siguruar një mjedis të përshtatshëm për përparimin e hetimeve”, por nuk përmendi se kur është parë bizhuteria për herë të fundit.

Advertisement

Gazeta egjiptiane, Al-Misri al-Yawm, raportoi se zhdukja u zbulua ditët e fundit, ndërsa stafi i muzeut po përgatitej të transportonte dhjetëra objekte në Romë për një ekspozitë që do të hapet muajin e ardhshëm.

Muzeu Egjiptian në Kajro është muzeu arkeologjik më i vjetër në Lindjen e Mesme. Ai mban më shumë se 170,000 objekte, përfshirë maskën funerale prej druri të praruar të Amenemopes.

Zhdukja e byzylykut vjen gjashtë javë para hapjes së Muzeut të Madh Egjiptian, ku janë transferuar dhe do të ekspozohen thesaret e famshme botërore të varrit të mbretit Tutankhamun.

Numri i të vdekurve nga shirat e rrëmbyeshëm dhe përmbytjet në Pakistan që nga 26 qershori ka tejkaluar shifrën 1.000, ndërsa mbi 1.000 persona të tjerë janë lënduar, thanë autoritetet, transmeton Anadolu.

Sipas Autoritetit Kombëtar të Menaxhimit të Fatkeqësive (NDMA), të paktën 504 persona kanë vdekur në provincën veriperëndimore Khyber Pakhtunkhwa, 300 në provincën verilindore Punjab, 80 në Sindh në jug, 30 në provincën jugperëndimore Balochistan, 41 në Gilgit-Baltistan, 39 në Kashmirin e administruar nga Pakistani, i njohur gjithashtu si Azad Jammu dhe Kashmir, dhe nëntë në Islamabad.

Nga 1.002 të vdekurit, 274 kanë qenë fëmijë, 163 gra dhe 565 burra.

Përmbytjet dhe reshjet e dendura kanë shkaktuar gjithashtu dëme të konsiderueshme në infrastrukturë, me mbi 12.000 shtëpi të dëmtuara, përfshirë 4.128 të shkatërruara plotësisht, dhe 6.509 kafshë shtëpiake të ngordhura në gjithë vendin.

Sezoni i musoneve ka shkaktuar shkatërrime të gjera në gjithë vendin, me mijëra të zhvendosur në provincat Punjab, Sindh dhe Khyber Pakhtunkhwa.

Advertisement

Përmbytja që vazhdon në Punjab ka prekur mbi 2,4 milionë njerëz, ndërsa 2,6 milionë janë shpëtuar tashmë nga zonat e prekura nga përmbytjet.

Përmbytjet shkatërruese, më të këqijat në historinë e vendit, kanë zhvendosur po ashtu dhjetëra mijëra banorë në pjesët e poshtme të provincës jugore Sindh.

Lumi i fuqishëm Indus po përjeton përmbytje me nivele nga të larta në mesatare, sipas Divizionit të Parashikimit të Përmbytjeve (FFD).

Për herë të parë në historinë 78-vjeçare të Pakistanit, tre lumenjtë lindorë – Sutlej, Jhelum dhe Chenab – po përballen në të njëjtën kohë nivele përmbytjeje “jashtëzakonisht” të larta, sipas autoriteteve lokale.

Zyrtarët paralajmërojnë se përmbytjet aktuale janë më të këqijat që nga përmbytjet katastrofike të vitit 2022, që u morën jetën më shumë se 1.700 njerëzve, përmbytën një të tretën e vendit dhe shkaktuan rreth 32 miliardë dollarë dëme në infrastrukturë.

Advertisement

Katari u zotua të martën se shkeljet e ligjit ndërkombëtar nga kryeministri izraelit Benjamin Netanyahu “nuk do të mbeten pa u ndëshkuar”, transmeton Anadolu.

Të martën, Netanyahu tha se sulmi izraelit i javës së kaluar që vrau pesë anëtarë të Hamasit në Doha ishte një “mesazh”, duke pretenduar se sulmi nuk ka dështuar.

“Jemi mësuar që kryeministri izraelit të përpiqet të shmangë dhe të justifikojë dështimet e tij pas çdo pengese që pëson për shkak të politikave të tij të pamatura”, tha zëdhënësi i Ministrisë së Jashtme të Katarit, Majed al-Ansari, në një konferencë për media në Doha.

“Gjithashtu duam t’i dërgojmë një mesazh: Shkeljet e ligjit ndërkombëtar nuk do të mbeten pa u ndëshkuar”, tha ai.

Lidhur me përpjekjet e ndërmjetësimit të Katarit për të arritur një marrëveshje armëpushimi në Gaza, Al-Ansari tha se kjo “nuk duket realiste pasi kryeministri izraelit dëshiron të vrasë të gjithë ata që negociojnë me të dhe të bombardojë shtetin ndërmjetës”.

Advertisement

“Katari aktualisht është plotësisht i përqendruar në mbrojtjen e sovranitetit të tij kombëtar, duke iu përgjigjur sulmit të pabesë izraelit kundër tij, duke marrë të gjitha masat e nevojshme për të siguruar që ai të mos përsëritet dhe duke i kërkuar llogari nga ata që janë përgjegjës”, theksoi Al-Ansari.

“Të gjitha konsideratat e tjera politike tani janë dytësore në dritën e situatës me të cilën po përballemi sot”, shtoi ai.

Katari, së bashku me Egjiptin dhe SHBA-në, ka ndërmjetësuar përpjekjet për t’i dhënë fund luftës së Izraelit kundër Rripit të Gazës, e cila ka vrarë pothuajse 65 mijë palestinezë që nga tetori i vitit 2023.