Lajme nga vendi
OSE NË VLEN, OSE NË BDI! Mexhiti i vendos vijë të kuqe Taravarit
Arben Taravari nuk mundet edhe të jetë pjesë e VLEN-it, edhe të bisedojë me BDI-në. Kështu u shpreh zëvendëskryeministri, njëherësh kryetari i Lëvizjes Demokratike, Izet Mexhiti. Ai i bëri thirrje Taravarit se është koha e fundit që të reflektojë dhe të tërhiqet nga bisedimet me BDI-në. Sipas Mexhitit, është e pakuptimtë që Taravari përderisa është pjesë e qeverisë, nga ana tjetër të negociojë me BDI-në.
“Ne mbrëmë e ftuam Taravarin që të reflektojë, sepse flitet dhe ka informata dhe vet e ka vërtetuar se ka bisedime me Ali Ahmetin, me BDI-në. Pra, brenda VLEN-it gjithçka është e lejueshme, është legjitime edhe për ndërtim pozicionesh edhe për ndërtim idesh, projekte politike, por demokracia ka një rregull: debatohet ‘pro et kontra’, hidhen argumentet në tavolinë dhe në fund – nëse mbivotohesh, shkon propozimi i shumicës në atë rast. Por kjo nuk do të thotë se nuk merresh vesh te shpija, duhesh të shkosh me qëndrime te BDI”, tha Mexhiti.
Ai tha se VLEN-i është formuar si antipod i BDI-së dhe se votat janë fituar për ta sjell ndryshimin. “Asnjëri prej neve nuk i kemi fituar këto vota vetë, as Lëvizja Demokratike, as ajo gjysma e Aleancës për Shqiptarët, as BESA, as Alternativa, as Vetëvendosja, por të gjithë bashkë dhe kemi një numër të madh votash, të cilët nuk janë të përcaktuar partiakisht, pro kanë votuar për ndryshim, për rotacion politik, për konkurrencë politike dhe nëse kemi parasysh këtë, kur në kohë të vështira jemi bërë bashkë, nuk është mirë tash në kohë stabile dhe të relaksuar të ndahemi. Edhe publikisht e ftojmë Taravarin të mbetet pjesë e VLEN-it dhe e duam brenda VLEN-it”.
Mexhiti nuk u prononcua nëse kryetar i VLEN-it pritet të bëhet Bilall Kasami, ashtu siç po aludohet në opinion, duke thënë se çështja e bajraktarizmit nuk është temë prioritare në VLEN.
“Është proces, nuk është me rëndësi se kush do të jetë kryetari, ka vend aty për një udhëheqësi, dikush do të jetë kryetar, dikush sekretarë, dikush nënkryetarë. Pra kjo nuk është koncept i bajraktarizmit, por është thirrje nga qytetarët, thirrje nga votuesit që qytetarët duan që të ketë dy taborë si në Shqipëri apo Kosovë ose si te pala maqedonase siç janë dy tabore dhe tabori i të ardhmes, tabori i ndryshimit, tabori i perspektivës është koncepti VLEN”, theksoi Mexhiti, ndërsa refuzoi të japë përgjigje në pyetjen se a është e pranueshme për partitë e VLEN-it që nëse Taravari del prej koalicioni, ai të mbetet në Qeveri.
Mexhiti theksoi se fillimisht Taravari është ai që duhet të prononcohet nëse do të mbetet pjesë e VLEN-it apo do të bashkëpunojë me BDI-në, e cila nuk është në një vijë me politikat e kësaj qeverie.
“Taravari duhet të prononcohet a është pjesë e VLEN-it apo është në negociata me Ahmetin? Le të përgjigjet fillimisht. Negociata me BDI-në do të thotë që nesër, pasnesër do të porositen faktorë prej atje, për shkak se do të kenë ndonjë kërkesë”, tha Mexhiti. I pyetur për deklaratën e Arben Taravarit se Mexhiti vazhdon të ketë komunikim me Musa Xhaferin dhe Fatmir Deharin e BDI-së, tha se dallon komunikimi me bërje të marrëveshjeve. Mexhiti tha se ai ka komunikim me të gjithë për shkak se “nuk jemi në luftë”, por nuk jep hapësirë për marrëveshje politike.
Përndryshe, kryetari i njërit krah të Aleancës për Shqiptarët, Arben Taravari duke folur në TV21 për zhvillimet e fundit në këtë koalicion dha sqarime për deklaratën e tij se të gjithë në VLEN komunikojnë me BDI-në. Taravari bëri të ditur se edhe Izet Mexhiti ka komunikim me Musa Xhaferin e BDI-së.
“Unë dua të jem i sinqertë deri në fund. T’ja sqaroj opinionit deri në fund. Për shembull zotëri Mexhiti ka komunikim me plot njerëz në BDI. Nëse jo me Ali Ahmetin? Ka me Musa Xhaferin. Ose ka me Fatmir Deharin. Ose ka me një eksponent. Edhe deputetët tanë në Kuvend kanë komunikim. Besoj edhe të Besës, jo që janë të izoluar. Unë nuk them se unë insistoj dhe se se kryetarët janë takuar bashkë, por komunikime në një shtet ku janë 1.5 milionë e ku në Parlament janë 120 deputetë, është normale se do të komunikojnë”, tha Taravari. Ndërkohë Tarvari ka bërë të ditur se do të insistojë në marrëveshje brenda koalicionit VLEN, por nëse veçmë nuk ekziston hapësirë për marrëveshje paralajmëroi se Aleanca për Shqiptarët do të vazhdojë të funksionojë e vetme, me grup parlamentar prej pesë deputetësh.
“Jemi të gatshëm të bisedojmë, po të na thuhet për një javë, për javën e ardhshme, kemi vendosur të bashkohemi, a unë nuk e di këtë! Ky koordinim është moti që të bëhet bashkimi. Atëherë unë vetëm mund t’i inkurajoj dhe t’u them nëse bashkoheni këtu jemi si Aleancë për Shqiptarët për të bashkëpunuar me ju për zgjedhjet lokale. Nëse mendoni se nuk duhet Aleanca për Shqiptarët për zgjedhjet lokale ne dalim edhe vetë. Më mirë ndershmërisht e provojmë kërkojmë përkrahje aty ku mendojmë dhe kujt mendojmë t’i kërkojmë përkrahje. Qëllimi ynë do të jetë që si parti politike të dalim fitues në disa komuna”, u shpreh Taravari. Ai më tej ka thënë se nuk i dëshiron ultimatumet dhe ato krijojnë ndjesi të keqe.
Ndërkohë të gjitha partitë tjera si Lëvizja Besa, Alternativa dhe përfaqësuesi i Vetëvendosjes, Bekim Qoku janë deklaruar se nuk kanë komunikim me BDI-në dhe se opsioni i vetëm për ta do të jetë që VLEN të shkojë së bashku në zgjedhje me kandidatë, lista dhe shtabe të përbashkëta. (koha.mk)
Lajme nga vendi
Dimitrieska-Koçoska: Takim koordinues me drejtorët e DAP-it dhe Doganës – Ndjekim me kujdes lëvizjen e realizimit të Buxhetit
Ministrja e Financave Gordana Dimitrieska-Koçoska sot pati takim pune me drejtoreshën e Drejtorisë së të Ardhurave Publike Elena Petrova dhe drejtorin e Drejtorisë Doganore Boban Nikollovski, ku u shqyrtua realizimi rrjedhës i Buxhetit, me fokus të veçantë në arkëtimin e të ardhurave dhe lëvizjet në kategoritë individuale të tatimeve.
Gjatë takimit u konstatua se realizimi i Buxhetit lëviz në kuadër të dinamikës së planifikuar dhe se në këtë moment nuk ka devijime të theksuara as në anën e të ardhurave as në anën shpenzimeve.
Ministria e Financave, në koordinim me Drejtorinë e të Ardhurave Publike dhe Drejtorinë Doganore, vazhdon të ndjekë me kujdes lëvizjen dhe realizimin e të ardhurave buxhetore.
“Buxheti po realizohet në përputhje me dinamikën e planifikuar. Së bashku me DAP-in dhe Drejtorinë Doganore, i kemi ndjekur në detaje të ardhurat dhe të gjitha lëvizjet që mund të kenë ndikim në realizimin e tyre. Në këtë moment nuk ka devijime domethënëse nga ajo që ishte planifikuar, por mbetemi të kujdesshëm dhe do të reagojmë në kohë nëse situata do të na imponojnë”, tha ministrja Dimitrieska-Koçoska.
Të dhënat për realizimin e Buxhetit deri në muajin gusht tregojnë se të ardhurat e përgjithshme arrijnë në 230.6 miliardë denarë, përkatësisht 60.77% e të ardhurave të planifikuara, ku bazuar në këto të dhëna shënohet rritje prej 8%, krahasuar me periudhën e njëjtë të vitit të kaluar.
Të ardhurat tatimore në tetë muajt e parë të vitit janë realizuar në vlerë prej 131.5 miliardë denarësh, që paraqet rritje prej 8.2% në bazë vjetore. Rritje është shënuar në të gjitha kategoritë kryesore tatimore – të ardhurat nga tatimi mbi fitimin janë më të larta për 19.9%, të ardhurat nga tatimi mbi të ardhurat personale për 10.9%, të ardhurat ga TVSH-ja për 10.6%, ndërsa të ardhurat nga detyrimet e importit shënojnë rritje prej 9.7%.
Te akcizat është evidentuar devijim i caktuar, i cili lidhet edhe me masat e ndërmarra nga Qeveria për zbutjen e ndikimit të krizës së shkaktuar nga derivatet e naftës. Ecuria e të ardhurave në këtë kategori do të vazhdojë të ndjekjet me vëmendje.
Në anën e shpenzimeve, në periudhën janar–gusht janë realizuar 268.9 miliardë denarë, përkatësisht 63.15% e shpenzimeve të planifikuara.
Në takim u theksua rëndësia e koordinimit të vazhdueshëm ndërmjet Ministrisë së Financave, DAP-it dhe Drejtorisë së Doganave, si institucione me rol kyç në realizimin e të ardhurave buxhetore. Në periudhën e ardhshme do të vazhdojë ndjekja e rregullt e realizimit të Buxhetit dhe i zhvillimeve ekonomike mbi bazën e të cilave do të merren vendime për përshtatje eventuale të shpenzimeve buxhetore.
Ministria e Financave mbetet e përkushtuar ndaj menaxhimit të përgjegjshëm të financave publike, servisimit në kohë të detyrimeve dhe sigurimit të qëndrueshmërisë së Buxhetit, duke i dhënë përparësi mbrojtjes së qytetarëve dhe sektorit të ekonomisë.
Kryetari i Komunës së Çairit, Izet Mexhiti, sot ishte në terren për të parë nga afër punimet infrastrukturore që po zhvillohen në disa pjesë të komunës. Në rrugën “Emin Duraku” po vazhdon rikonstruimi, ndërsa punime po realizohen edhe në rrugët “Dervish Hima” dhe “Parashqevi Qiriazi”.
Në këto rrugë po bëhet asfaltimi, rregullimi i trotuareve me kubëza dhe hyrjeve të banesave. Paralelisht, në të njëjtat lagje është investuar edhe në hapësirat për fëmijë, përmes rregullimit dhe vendosjes së këndeve të reja të lojërave.
“Çdo rrugë e Çairit ka rëndësinë e vet dhe çdo lagje meriton kushte më të mira. Prandaj po investojmë gjithandej. Një lagje e mirë nuk ka vetëm rrugë të rregulluara, por edhe trotuare, hapësira për fëmijë dhe kushte më të mira për jetën e përditshme. Çairi sot është një kantier ndërtimi dhe kërkojmë mirëkuptimin e qytetarëve, sepse po punohet dhe po investohet për komunën tonë, për lagjet tona dhe për të ardhmen,” deklaroi Mexhiti.
Punimet do të vazhdojnë në pjesë të ndryshme të Çairit, me investime që synojnë përmirësimin e infrastrukturës dhe kushteve të jetesës në çdo lagje.
Lajme nga vendi
Hoxha: Agjenda e Gjelbër duhet të kalojë nga zotimet në rezultate konkrete për qytetarët e Ballkanit Perëndimor
Ministri i Mjedisit Jetësor dhe Planifikimit Hapësinor, Muamet Hoxha, merr pjesë në Takimin e Tretë Ministror për Agjendën e Gjelbër për Ballkanin Perëndimor (GAWB), i cili mbahet më 18 dhe 19 shtator në Zhabljak, Mali i Zi, në kuadër të kryesimit të Malit të Zi me Procesin e Berlinit për vitin 2026.
Në fjalimin e tij në sesionin kryesor „Agjenda e Gjelbër për Ballkanin Perëndimor – nga zotimet drejt zbatimit“, ministri Hoxha konfirmoi përkushtimin e Maqedonisë së Veriut ndaj Agjendës së Gjelbër dhe integrimit evropian, duke theksuar se në fazën e ardhshme fokusi duhet të jetë te zbatimi, investimet dhe bashkëpunimi rajonal.
„Agjenda e Gjelbër duhet gjithnjë e më shumë të bëhet një platformë për zbatim rajonal dhe jo vetëm për dialog rajonal. Ndotja nuk ndalet në kufij, ndërsa rreziqet klimatike janë të përbashkëta“, theksoi Hoxha, duke nënvizuar nevojën për zgjidhje të përbashkëta, shkëmbim të njohurive dhe të dhënave, harmonizim të standardeve dhe zhvillim të infrastrukturës rajonale aty ku kjo është e arsyeshme.
„Suksesi nuk do të matet me numrin e dokumenteve të miratuara. Ai do të matet përmes ndryshimeve konkrete që sjellin përfitime për qytetarët në të gjithë rajonin“, theksoi Hoxha.
Duke folur për prioritetet kryesore të Maqedonisë së Veriut në periudhën e ardhshme, ministri u ndal te përshpejtimi i investimeve në burimet e ripërtëritshme të energjisë dhe efikasitetin energjetik, forcimi i qeverisjes klimatike dhe përgatitja për kornizën evropiane për klimën, tranzicioni i drejtë për rajonet e varura nga qymyri, përshpejtimi i reformave në menaxhimin e mbetjeve dhe ekonominë qarkore, si dhe forcimi i përshtatjes ndaj ndryshimeve klimatike, mbrojtjes së natyrës dhe biodiversitetit.
Takimi i Tretë Ministror për Agjendën e Gjelbër për Ballkanin Perëndimor është një forum për të shqyrtuar përparimin e arritur deri më tani dhe për të përcaktuar drejtimet politike për fazën e ardhshme të zbatimit të Agjendës së Gjelbër. Në kuadër të takimit në Mal të Zi është paraparë miratimi i Deklaratës Ministrore për Agjendën e Gjelbër për vitin 2026, si dhe mbështetja politike për hapa kyç në nivel rajonal.
Dimitrieska-Koçoska: Takim koordinues me drejtorët e DAP-it dhe Doganës – Ndjekim me kujdes lëvizjen e realizimit të Buxhetit
Mexhiti: Çdo rrugë ka rëndësi, çdo lagje meriton investime
Hoxha: Agjenda e Gjelbër duhet të kalojë nga zotimet në rezultate konkrete për qytetarët e Ballkanit Perëndimor
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
