Ministri i Punëve të Brendshme, Pançe Toshkovski, vizitoi dje pasdite objektin ku është vendosur sistemi qendror “Qyteti i Sigurt” (Safe City), pas fillimit të periudhës testuese për regjistrimin automatik të kundërvajtjeve në komunikacion, njoftoi MPB.

Vetëm në 12 orët e para të testimit janë regjistruar plot 65.000 shkelje, mes tyre 2.800 raste të kalimit në semafor të kuq. Përveç kësaj, sistemi ka zbuluar rreth 1.000 automjete të paregjistruara, përcjell INA.

“Nuk ka tolerancë për drejtim të pakujdesshëm, qoftë në zonat urbane apo në rrugët e hapura. ‘Qyteti i Sigurt’ është një projekt që mbron jetë dhe rikthen disiplinën në komunikacion,” deklaroi ministri Toshkovski.

Nga MPB shtojnë se shifrat janë alarmante dhe edhe një herë tregojnë domosdoshmërinë e sistemit, i cili pritet të përmirësojë kulturën rrugore dhe të ulë numrin e viktimave dhe dëmeve në rrugë.

Periudha testuese do të zgjasë deri më 31 dhjetor, ndërsa deri atëherë kundërvajtësit do të marrin vetëm paralajmërime. Nga janari sistemi do të funksionojë plotësisht, me opsion për marrjen dhe pagesën elektronike të gjobave.(INA)

Advertisement

Hristijan Mickoski, kryetari aktual i VMRO-DPMNE-së, në një intervistë për “360 gradë”, deklaroi qartë se nuk ka ndërmend të kërkojë ndryshime në statutin e partisë që do t’i mundësonin një mandat të katërt në krye të partisë.

Ai theksoi se me shembull personal duhet treguar se çdo funksion ka fundin e vet. Kjo do të thotë se mandati i tij i ardhshëm, nëse rizgjidhet në kongresin në Kavadar, do të jetë i fundit si lider i VMRO-DPMNE-së.

Përveç vendimit për drejtimin e partisë, Mickoski gjithashtu konfirmoi se nuk do të kandidojë për president të shtetit në zgjedhjet e vitit 2029. Ai tha se nuk ka një ambicie të tillë dhe e përjashton këtë skenar nga angazhimi i tij politik në të ardhmen.

“Kam dy djem dhe për mua VMRO-DPMNE-ja është, fjalë për fjalë, si fëmija im i tretë. Por po, ky do të jetë mandati im i fundit si kryetar i VMRO-DPMNE-së, nëse marr mbështetjen e delegatëve. Dhe për sa kohë që unë jam kryetar, sa i përket kufizimit të numrit maksimal të mandateve që mund të ketë një kryetar i VMRO-DPMNE-së, nuk kam ndërmend të mbështes çfarëdo iniciative për ndryshimin e atij neni të Statutit,” tha Mickoski.

Në Kongresin e rregullt zgjedhor të VMRO-DPMNE-së, i cili do të mbahet më 6 dhjetor në Kavadar, pritet miratimi i disa dokumenteve strategjike. Mickoski është kandidati i vetëm për kryetar të partisë në këtë kongres.

Advertisement

Ditën e dytë radhazi kamerat e MPB-së për projektin “Qytet i Sigurt” po trazojnë opinionin në Maqedoninë e Veriut, shekuan portali Faktor.

Një numër i madh shoferësh që dje e përjetuan sistemin nga afër panë saktësisht se si do të funksionojë projekti i cili synon të sjellë rregull dhe qetësi në kaosin rrugor në vend.

Me këtë projekt, qytetarët pritet të disiplinohen dhe të ngasin sipas rregullave të trafikut, në mënyrë që të mos paguajnë gjoba apo të përballen me pasoja më të mëdha, siç është marrja e patentës së shoferit.

Përveç në kryqëzimet e mëdha, askush nuk e di saktësisht dhe nuk mund të parashikojë ku ka kamera. Pikërisht për këtë arsye, në aplikacionet e dedikuara për trafikun, një pjesë e madhe e kamerave të këtij projekti tashmë janë të shënuara, kështu që shoferët duke përdorur aplikacionin mund të shohin me saktësi se ku ndodhen kamerat.

Një nga këto aplikacione është Waze, në të cilin gjenden pothuajse të gjitha kamerat e vendosura. Aplikacioni ofron paralajmërime për trafik të dendur, punime në rrugë, kamera apo polici në segmentin ku po udhëtoni./Faktor.mk

Advertisement