Numri i personave që kanë humbur jetën në aksidente trafiku është ulur për rreth 29 për qind, krahasuar me dy vitet paraprake, njoftoi sot ministri i Punëve të Brendshme, Pançe Toshkovski.

Një numër i madh funksionarësh, ministrash, drejtorësh dhe personash nga institucionet fetare kanë qenë në listën e të ndëshkuarve për kundërvajtje në trafik, pasi janë regjistruar nga sistemi “Qytet i Sigurt”.

Ministri i Punëve të Brendshme, Pançe Toshkovski, tha se kishte pasur ndërhyrje për anulimin e gjobave, por ato kanë pushuar pas reagimit të tij të ashpër.

Kundërvajtjet në trafik, sipas tij, janë bërë si me automjete zyrtare, ashtu edhe me ato private, por të gjitha gjobat janë paguar.

Sipas tij, “Safe City” ka ulur ndjeshëm aksidentet me epilog fatal në trafik.

Advertisement

PANÇE TOSHKOVSKI – Ministër i Brendshëm

“Në 15 vitet e fundit në rrugët e Maqedonisë kanë humbur jetën 2.131 persona mesatarisht 142 persona në vit. Gjatë periudhës janar-tetor të këtij viti, në aksidente trafiku kanë humbur jetën 85 persona, kundrejt 117 viktimave në të njëjtën periudhë të vitit të kaluar dhe 119 në vitin 2024.Bëhet fjalë për një ulje prej rreth 29 për qind”

Ministria e Punëve të Brendshme, me projektin “Qytet i Sigurt”, ka fituar vendin e parë në kategorinë “Përsosmëri në Sigurinë e Trafikut” në Samitin Botëror të Policisë, të mbajtur në Dubai, në Emiratet e Bashkuara Arabe, tha Ministri Toshkovski.

Projekti i Maqedonisë së Veriut u përzgjodh si më i miri në konkurrencë me Policinë e Singaporit, Policinë e Abu Dhabit, Drejtorinë e Rrugëve dhe Transportit të Dubait dhe shërbimin policor të shtetit indian Maharashtra.

Advertisement

Institucioni Publik Parku Kombëtar „Mali Sharr“ nënshkroi marrëveshje donacioni me Shoqërinë për agrikulturë Pure Promise SHPK Tetovë, me të cilën do të pyllëzohen 12 hektarë në lokacione të ndryshme brenda parkut. Do të mbillen 30.000 fidanë nga lloje autoktone pyjore, ndër të cilët: bredh, pishë e bardhë, ah dhe panjë. Pyllëzimi do të realizohet gjatë periudhës së qetësisë së vegjetacionit – nga vjeshta deri në pranverë.

Bashkëpunimi ndërmjet Parkut Kombëtar “Mali Sharr” dhe Shoqata për Agrikulturë PURE PROMISE vazhdon me një aktivitet të ri dhe të rëndësishëm për rigjenerimin e ekosistemeve pyjore të Malit Sharr.

Është nënshkruar një marrëveshje e re donacioni, e cila parasheh pyllëzimin e 12 hektarëve me gjithsej 30.000 fidanë, përkatësisht 2.500 fidanë për hektar.

EVZAL ELMAZI – Drejtor i Parkut Kombëtar “Mali Sharr”

Veçanërisht e rëndësishme është se bashkëpunimi nuk përfundon me mbjelljen. Është paraparë edhe mirëmbajtja dyvjeçare e sipërfaqeve të pyllëzuara, me qëllim që të sigurohet pranimi sa më i mirë i fidanëve, zhvillimi i tyre dhe suksesi afatgjatë i pyllëzimit.

Advertisement

Parku Kombëtar “Mali Sharr” ka falënderuar PURE PROMISE për vazhdimin e mbështetjes dhe për investimin.

SASKIA BONTJE – Pure Promise – Holandë

“Ne punojmë për një të ardhme më të gjelbër. Ideja është shumë e thjeshtë. Do ta bëjmë skip pastrimin rutinor të dhomës, dhe me paratë që do të kursejmë do të mbjellim drunjë këtu, në malin e bukur Sharr, në Maqedoni të Veriut . Ne kemi punuar në këtë projekt për 3 vjet dhe tani më kemi mbjellur 30 hektar të vegjetacioneve të reja dhe kjo është diçka për të cilën ne jemi shumë shumë krenar. Çka e bën këtë projekt me të vërtetë speical, është partnershipi unik i zinxhirit të hotelit, dhe parkut nacional, ne kemi një marrëdhënie shumë të mirë, dhe shpresojmë që ky bashkëpunim do të vazhdojë edhe shumë vite në të ardhmen. Një njeri shumë i rëndësishëm në këtë projekt është Leonora, ajo  i ka rrënjët këtu në Maqedoni ndërsa jeton në Hollandë”

LEONORA EMËRLLAHU – Pure Promise – Tetovë

Aktivitetet janë pjesë e sanimit të sipërfaqeve që kanë pësuar dëmtime nga ndikimet biotike dhe abiotike, në përputhje me dokumentacionin planor të Parkut Kombëtar, përmes rigjenerimit të pyjeve me lloje autoktone drurësh.

Advertisement

Për sipërfaqet e mbjella Parku “Mali Sharr” do të kujdeset gjatë viteve në vijim, me ndjekje të rregullt dhe mbushje të vendeve ku fidanët nuk janë pranuar.

Ripërtëritja e pyjeve nuk nënkupton vetëm mbjelljen e pemëve. Ajo është një proces afatgjatë i rigjenerimit të habitateve, përmirësimit të gjendjes së ekosistemeve pyjore dhe rritjes së qëndrueshmërisë së tyre, thonë nga Parku Kombëtar “Mali Sharr”./Tv Koha/

Dje në ora 11:45 në SPB Tetovë është raportuar se në bulevardin “Ilinden” në Tetovë, një trotinet elektrik (monopatinë elektrike) ka goditur një 17-vjeçare nga Kosova dhe është larguar nga vendi i ngjarjes. Në aksident, e mitura ka pësuar lëndime të rënda trupore, të cilat janë konfirmuar në Qendrën Urgjente të Tetovës. Është kryer inspektim nga ekipi hetimor i SPB Tetovë dhe po merren masa për gjetjen e personit dhe zbardhjen e plotë të rastit.

……Dje në ora 14:00 në Tetovë, punonjësit e policisë nga SPB Tetovë kanë privuar nga liria një 40-vjeçar nga një fshat i Tetovës, duke vepruar sipas një denoncimi paraprak se gjatë muajit të fundit e ka përgjuar vazhdimisht dhe e ka ngacmuar ish-partneren e tij 40-vjeçare nga një fshat i Tetovës. Pas dokumentimit të plotë të rastit, ndaj tij do të bëhet kallëzim përkatës.

…….Dje në ora 18:10, punonjësit e policisë nga Stacioni Policor Grupçin kanë privuar nga liria një 51-vjeçar nga f. Trebosh. Sipas denoncimit, rreth orës 09:00, gjatë pushimit të madh, ai ka hyrë në ambientet e shkollës fillore në fshatin Trebosh, ka sulmuar fizikisht dy nxënës të mitur dhe u ka drejtuar kërcënime verbale. Ai është ndaluar në stacionin policor dhe pas dokumentimit të rastit do të pasojë kallëzimi përkatës.

……Dje në ora 10:30 në Stacionin Policor Jegunovcë, një 43-vjeçar nga f. Prelubisht ka denoncuar se rreth orës 07:15 në një furgon për transportin e nxënësve të shkollës fillore në f. Shemshovë, një i mitur tjetër nga f. Kopanicë i ka kërkuar para djalit të tij të mitur dhe e ka sulmuar fizikisht. Po merren masa për zbardhjen e ngjarjes.

……Dje në ora 21:30 në rrugën “107” në Tetovë, punonjësit e policisë nga SPB Tetovë kanë privuar nga liria një 27 dhe një 19-vjeçar, të dy nga Tetova, sepse gjatë një kontrolli tek ata është gjetur dhe konfiskuar marihuanë. Ndërkohë, gjatë ndërmarrjes së veprimeve zyrtare, njëri ka sulmuar fizikisht punonjësit e policisë. Të dy janë ndaluar në stacionin policor dhe pas dokumentimit të rastit ndaj tyre do të ngrihen kallëzimet përkatëse.

Advertisement

……Dje në ora 23:00 në f. Bërvenicë, punonjësit e policisë nga SPB Tetovë i kanë marrë një 38-vjeçari nga f. Radiovcë një automjet pasagjerësh “Volksvagen Golf”, një rimorkio të ngarkuar me dru zjarri pa dokumente dhe dy sharrë motorike. Personi është privuar nga liria, kurse sendet i janë dorëzuar Stacionit Policor Zherovjan për procedurë të mëtejshme.

……Më 5 Nëntor, në SPB Tetovë, një 74-vjeçar nga një fshat i Tetovës ka denoncuar se është mashtruar nga një person nga f. Dobrosht. Sipas denoncimit, gjatë muajit shkurt 2026, personi i ka ofruar ndërmjetësim për të realizuar të drejtën e kompensimit monetar për ndihmë dhe kujdes nga një person tjetër përmes Qendrës për Punë Sociale Tetovë, me ç’rast për shërbimin i ka marrë 400 euro. Meqenëse i dëmtuari prej muajsh nuk ka marrë asnjë përgjigje, e as i janë kthyer mjetet, ai e ka kuptuar se është mashtruar. Po merren masa për zbardhjen e plotë të rastit.

……Dje në ora 15:20 në DPB Gostivar, një punonjëse e Prokurorisë Themelore Publike Gostivar ka denoncuar se në dy raste, në orën 09:00 dhe në orën 14:00, në vendin e saj të punës kishte shkuar një person nga Gostivari dhe gjatë dorëzimit të dokumenteve është sjellë në mënyrë agresive ndaj saj dhe ka drejtuar fyerje ndaj saj dhe institucioneve shtetërore. Po merren masa për zbardhjen e rastit.

……Dje në ora 23:00 në Stacionin Policor Gallatë, një 28-vjeçare nga f. Gradec ka denoncuar se rreth orës 17:25 në oborrin e shkollës fillore në f. Gradec, pas një fjalosjeje dhe përleshjeje fizike paraprake midis djalit të saj të mitur dhe një të mituri tjetër, gjyshi i të miturit të dytë, nga i njëjti fshat, ka sulmuar fizikisht djalin e saj. Po merren masa për zbardhjen e rastit

Advertisement