Gjendja e sigurisë në Tetovë është stabile dhe nuk bëhet fjalë për kurrfarë tensionesh ndëretnike, por për konflikte të izoluara mes tifozëve. Kjo është një dukuri me të cilën përballen edhe qytete të tjera në vend dhe në rajon, por në Tetovë merr më shumë vëmendje për shkak të mjedisit multietnik.

Ky është konkluzioni i përbashkët i takimit ndërinstitucional të punës, kushtuar parandalimit dhe trajtimit të delikuencës së të miturve.

Takimi u organizua pas zhvillimeve dhe incidenteve të fundit, në të cilat ishin përfshirë tifozë të mitur të dy klubeve të futbollit nga Tetova.

Në takim morën pjesë kryetari i Komunës së Tetovës, Bilall Kasami, përfaqësues të Sektorit për Punë të Brendshme Tetovë, të Këshillit për Parandalimin e Delikuencës së të Miturve, të Qendrës për Punë Sociale në Tetovë, si dhe drejtorët e të gjitha shkollave fillore dhe të mesme në territorin e komunës.

“Gjendja e sigurisë në Tetovë është stabile dhe se nuk bëhet fjalë për kurrfarë tensionesh ndëretnike, por për konflikte të izoluara mes tifozëve – dukuri me të cilën ballafaqohen edhe qytete të tjera anembanë vendit dhe rajonit, por që në Tetovë reflektohet më shumë për shkak të mjedisit multietnik. Në këtë drejtim, institucionet dërguan një apel të përbashkët drejtuar opinionit, mediave dhe faktorëve politikë që të përmbahen nga përhapja e dezinformatave, keqpërdorimi politik i ngjarjeve të tilla dhe nxitja artificiale e tensioneve që realisht nuk ekzistojnë në këtë rajon”
Kjo çështje u aktualizua pas një serie videosh me përmbajtje të dhunshme, të publikuara në grupe të specializuara në platformën TikTok. Në to shihen të mitur duke ndjekur dhe keqtrajtuar bashkëmoshatarët e tyre, ndërsa incidentet i incizojnë dhe më pas i publikojnë në rrjetet sociale.

Advertisement

Në takim u dakorduan edhe disa hapa konkretë për periudhën në vijim. Ndër to janë shkëmbimi i vazhdueshëm i informacioneve mes SPB-së Tetovë, Qendrës për Punë Sociale dhe institucioneve arsimore, me qëllim identifikimin e hershëm të sjelljeve me rrezik te të rinjtë.

Gjithashtu, parashihen ligjërata dhe fushata të përbashkëta në shkollat fillore dhe të mesme për tifozërinë me frymë të fair-play-it, tolerancën dhe pasojat ligjore të cenimit të rendit dhe qetësisë publike. Do të organizohen edhe takime me këshillat e prindërve dhe drejtuesit e klubeve sportive lokale, për të ngritur vetëdijen dhe përgjegjësinë e përbashkët për sigurinë e të rinjve.

Për sulmet ndaj fëmijëve në Tetovë kishte reaguar edhe kryeministri Hristijan Mickoski, i cili theksoi se për këto raste duhet të mbajnë përgjegjësi si sulmuesit, ashtu edhe prindërit e tyre.

Ministria e Punëve të Brendshme ka paralajmëruar qytetarët për shtimin e mesazheve mashtruese përmes SMS-ve, postës elektronike dhe rrjeteve sociale, përmes të cilave kërkohet pagesa e kundërvajtjeve të supozuara rrugore të regjistruara nga sistemi “Qyteti i Sigurt”.

Sipas MPB-së, bëhet fjalë për mashtrime të llojit “phishing”, ku qytetarëve u dërgohen mesazhe me linqe të rreme, përmes të cilave kërkohet që të fusin të dhënat e tyre personale dhe bankare. Qëllimi i këtyre veprimeve është keqpërdorimi i informacioneve dhe mjeteve financiare të qytetarëve. MPB-ja u bën apel qytetarëve që të mos hapin linqe të dyshimta dhe të mos vendosin të dhënat e kartelave bankare, fjalëkalimet apo informacione të tjera personale në ueb-faqe të paverifikuara. Gjithashtu, qytetarët këshillohen të mos kryejnë pagesa përmes linqeve të pranuara në mesazhe të dyshimta.
Nga Ministria rikujtojnë se njoftimet zyrtare me SMS për kundërvajtjet rrugore nga sistemi “Qyteti i Sigurt” dërgohen ekskluzivisht nga dërguesi “MVR-SC“ dhe përmbajnë detyrimisht targën e automjetit me të cilin është kryer kundërvajtja. Ndërkaq, linku zyrtar për informacione dhe pagesën e kundërvajtjeve është: http://safecountry.mvr.gov.mk. Sektori për Krim Kompjuterik pranë MPB-së, ndërkohë, po ndërmerr masa dhe veprime për zbulimin dhe sanksionimin e personave të përfshirë në këto mashtrime.
MPB-ja u bën thirrje qytetarëve që të tregojnë kujdes të shtuar dhe të verifikojnë çdo njoftim para se të ndërmarrin ndonjë veprim. përcjell Zhurnal.mk .

Iskra Haxhi Vasileva ka marrë zyrtarisht detyrën e shefes së Prokurorisë për Ndjekjen e Krimit të Organizuar dhe Korrupsionit në Maqedoninë e Veriut. Në moshën 43-vjeçare, ajo bëhet drejtuesja më e re e këtij institucioni, pasi bëri betimin para anëtarëve të Këshillit të Prokurorëve.

Pas marrjes së detyrës, Haxhi Vasileva deklaroi se e konsideron nder emërimin në këtë funksion, por theksoi se ai njëkohësisht e ngarkon me përgjegjësi të madhe.

Emri i saj është bërë i njohur në opinion kryesisht përmes disa rasteve të bujshme që lidhen me korrupsionin e nivelit të lartë.

Ajo është prokurore në rastin e 350 mijë eurove të gjetura te gjyqtari i Apelit, Gjoko Ristov, si dhe në rastin kundër ish-drejtorit të Inspektoratit Shtetëror të Bujqësisë, Vace Anakiev, i dyshuar për ryshfet. Gjithashtu, udhëheq hetimet ndaj ish-drejtorit të Drejtorisë së Doganave, Stefan Bogoev, ndërsa ka qenë e përfshirë edhe në rastin kundër ish-kryetarit të Komunës së Novo Sellës, Boro Stojçev, lidhur me çështjen e marihuanës. Ajo ishte prokurore edhe në fillimet e rastit kundër kardiologut Zhan Mitrev.

Në krye të Prokurorisë, Haxhi Vasileva nuk trashëgon vetëm një funksion drejtues, por edhe një sërë lëndësh të hapura dhe çështjesh të ndjeshme që presin përgjigje institucionale.

Advertisement

Ndër temat që kanë ngjallur debat në javët e fundit është edhe hyrja e Alta Bankës në Maqedoninë e Veriut. Kryeprokurori i Shtetit, Nenad Saveski, ka deklaruar shkurt se institucionet po e ndjekin situatën.

E pyetur nga BIRN nëse Prokuroria ka një qëndrim lidhur me këtë çështje, Haxhi Vasileva tha se për momentin nuk mund të përgjigjet pa shqyrtuar paraprakisht materialet përkatëse.

Ajo theksoi se, në rast se paraqiten indicie ose baza më serioze për dyshime, çështja do të ndiqet me vëmendje.

„Nëse kemi gjurmë ose baza më serioze, natyrisht se këto janë tema që ndiqen me kujdes“, deklaroi ajo, duke iu referuar mundësisë së hapjes së lëndëve me iniciativë të Prokurorisë.

Sa i përket bashkëpunimit me Prokurorinë për Krim të Organizuar të Serbisë, ajo tha se bashkëpunimi ndërkombëtar është pjesë e detyrimeve ligjore dhe se me Serbinë ekziston një bashkëpunim i mirë.

Advertisement

Ndërkohë, partitë opozitare kanë kërkuar hapjen e hetimeve edhe për hyrjen e Alta Bankës në vend, si dhe për destinimin dhe shpenzimin e mjeteve të Lotarisë Shtetërore për organizimin e festimeve me rastin e Ditës së Pavarësisë. Deri më tani, të paktën publikisht, nuk ka informacione për veprime konkrete të Prokurorisë lidhur me këto çështje.

Lëndët e vjetra, sfida e parë për drejtuesen e re

Në tavolinën e saj e presin edhe disa lëndë që prej vitesh nuk kanë marrë epilog.

Një ndër to është rasti „Talir“, në të cilin VMRO-DPMNE akuzohet për pastrim parash, ndërsa procesi gjyqësor zvarritet prej gati tetë vitesh pa një vendim përfundimtar.

Sipas BIRN, gjatë këtij viti të gjitha seancat gjyqësore për këtë rast janë shtyrë ose anuluar. Publikimi vë në pikëpyetje edhe angazhimin e prokurores Engellushe Kadriu, e cila e mori lëndën nga Lençe Ristoska, për t’i dhënë më shumë dinamikë procesit.

Advertisement

Një tjetër sfidë janë dy lëndët e hapura lidhur me pretendimet për përgjim të paligjshëm të kryeministrit Hristijan Mickoski. Dyshimet për përgjim u bënë publike nga vetë Mickoski, i cili u referua në informacione nga Agjencia për Siguri Kombëtare dhe Agjencia për Zbulim.

Njëra nga lëndët është hapur në dhjetor të vitit 2024, por deri më tani në asnjërën nuk është nisur hetim dhe nuk ka persona të dyshuar.

Vëmendje të veçantë kërkon edhe rasti i furnizimit me mazut, i cili shkaktoi reagime të shumta politike. Prokurorja Katerina Kolaroviq fillimisht e hodhi poshtë kallëzimin penal, por prokurori i lartë Jovan Cvetanovski e anuloi vendimin dhe e ktheu lëndën në Prokurorinë për Ndjekjen e Krimit të Organizuar dhe Korrupsionit.

Çështja mori edhe dimension politik pas deklaratave publike të kryeministrit Hristijan Mickoski dhe ministrit të Punëve të Brendshme, Pançe Toshkovski.

Këto janë vetëm disa nga rastet në të cilat drejtuesja e re do të duhet të dëshmojë nëse prioritetet e saj do të mbeten vetëm premtime programore apo do të shndërrohen në rezultate konkrete.

Advertisement

Në programin me të cilin fitoi këtë pozitë, Haxhi Vasileva ka premtuar procedura më efikase dhe më të shpejta, hetime financiare dhe konfiskim të pasurisë së përfituar në mënyrë të paligjshme, forcim të kapaciteteve institucionale, digjitalizim, si dhe rritje të transparencës dhe besimit të publikut.

Haxhi Vasileva, e cila ushtron detyrën e prokurores që nga viti 2009, në funksionin e ri do të punojë me një ekip prej 11 prokurorësh.(INA)