Dega e BDI-së në Kumanovë ka reaguar ashpër ndaj punësimeve të fundit në Spitalin e Kumanovës, duke akuzuar pushtetin për diskriminim etnik dhe VLEN-in për heshtje përballë përjashtimit të shqiptarëve.

“90 punësime dhe asnjë shqiptar! Një diskriminim i tillë nuk mbahet mend as në ish-Jugosllavi”, thuhet në reagimin e BDI-së, e cila kërkon hetim institucional për kriteret dhe procedurat e punësimit.

Kritikat më të ashpra i janë drejtuar VLEN-it, përfaqësuesit e të cilit, sipas BDI-së, vazhdimisht kanë deklaruar se cilësia duhet të ketë përparësi ndaj përkatësisë etnike.

“A thua vallë, në gjithë Kumanovën nuk paska pasur as edhe një motër medicinale shqiptare të kualifikuar?”, pyet BDI-ja, duke ngritur dyshime nëse heshtja e VLEN-it është çmimi politik për qëndrimin në koalicion me VMRO-DPMNE-në.

Nga BDI theksojnë se rreth 70 mijë shqiptarë gravitojnë drejt Spitalit të Kumanovës dhe kanë të drejtë të përfaqësohen në mënyrë të barabartë në këtë institucion.

Advertisement

“Nuk kërkojmë privilegje, kërkojmë barazi! Nuk kërkojmë lëmoshë, kërkojmë të drejtën që na takon!”, përfundon reagimi.

Një ngjarje tragjike ka ndodhur në një pikë karburanti në rrugën “Metodija Andonov Çento” në Shkup, ku një 67-vjeçar ka humbur jetën pasi është shtypur nga traktori i tij.

Sipas njoftimit të policisë, ngjarja është raportuar dje në orën 12:30. Viktima, R.K. nga lagjja Hasanbeg (Singeliq), pasi kishte mbushur me karburant traktorin e tipit IMT, me një makineri pune të bashkëngjitur, e kishte parkuar dhe kishte qëndruar pranë tij.

Në një moment, traktori është vënë vetvetiu në lëvizje dhe e ka shtypur 67-vjeçarin me rrotën e pasme, duke i shkaktuar lëndime të rënda trupore.

I plagosuri është transportuar me urgjencë në Qendrën Emergjente të kompleksit të klinikave “Nënë Tereza” në Shkup, ku, pavarësisht përpjekjeve për trajtim, ka ndërruar jetë në orën 20:30.

Vdekja është konstatuar nga mjeku, ndërsa ekipi hetimor i SPB Shkup ka kryer këqyrjen e vendit të ngjarjes.

Advertisement

Mexhiti: BDI po tenton ta keqpërdorë Badinterin për ta bllokuar Ligjin për provimin e jurisprudencës në shqip

Njëri nga kryetarët e VLEN-it, Izet Mexhiti sot ka kritikuar BDI-në në lidhje me keqpërdorimin e Badenterit. Mexhiti në profilin e tij në Facebook shkruan se BDI po tenton që nëpërmes Badenterit të bllokojë ligjin për gjuhën shqipe.

“BDI sot me krekosje po kërcënon se do ta bllokojë Ligjin për provimin e jurisprudencës në Parlament duke keqpërdorur Badinterin – parimin kushtetues i cili është ndërtuar si mekanizëm që duhet të mbrojë shqiptarët nga majorizimi.

Por, parimi i Badinterit është rezultat i negociatave për Marrëveshjen e Ohrit. Palë negociuese në atë proces nuk kanë qenë partitë politike, por kanë qenë shqiptarët dhe maqedonasit.

Prandaj: Parimi i Badinterit nuk është mekanizëm i ndërtuar që shqiptari ta bllokojë shqiptarin; Badinteri nuk është instrument për gara partiake mes partive shqiptare; Votimi i dyfishtë u bë mekanizëm kushtetues që t’i mbrojë shqiptarët nga majorizimi, jo të majorizojë disa shqiptarë nga shqiptarë të tjerë.

Keqpërdorimi i Badinterit sot për interesa partiake rrezikon të prodhojë domino efekt nesër, kur secili subjekt partiak mund të kujtohet që të gjejë forma për ta manipuluar votimin e dyfishtë dhe për të mbivotuar shqiptarët.

Advertisement

Pra, Badinteri nuk guxon të keqpërdoret nga opozita shqiptare si instrument bllokues kundër një ligji që avancon të drejtat e shqiptarëve dhe që, për herë të parë në historinë e vendit, u mundëson studentëve shqiptarë ta japin provimin e jurisprudencës në gjuhën e tyre amtare”, shkruan Mexhit.