Trafiku hekurudhor në vend është normalizuar, pasi Sindikata e Makinistëve të Maqedonisë ndërpreu bojkotin pas negociatave që u zhvilluan mbrëmë me drejtuesit e Transportit Hekurudhor të Maqedonisë dhe përfaqësues të Ministrisë së Transportit.

“Ne zhvilluam negociata që dhanë rezultat, disa nga kërkesat u përmbushën dhe kolegët vendosën që, për të mos shkaktuar shpenzime shtesë, të ndërpritet bojkotimi për momentin. Trafiku u normalizua në orën 01:30 të natës. Treni i parë për Kumanovë nise në 04:57,” deklaroi Toni Dimovski, kryetar i Sindikatës së Makinistëve të Maqedonisë dhe përfaqësues i personelit teknik dhe ekzekutiv në Hekurudha e Maqedonisë së Veriut Transport SHA Shkup

Dimovski njoftoi se dialogu do të vazhdojë. Sipas Dimovskit, gjatë bojkotit që filloi dje në orën 13:30, u ndaluan pesë trena pasagjerësh – dy për Manastir dhe nga një për Kumanovë, Gjevgjeli dhe Veles – ndërsa te trenat mallrash nuk pati ndërprerje, përveç vonesave të shkaktuara nga punimet në hekurudhë.

Deri tek drejtuesit e ndërmarrjes hekurudhore më 2 tetor janë dorëzuar 15 kërkesa, dhe pasi nuk pati përgjigje, u mor vendimi për bojkot. Disa nga kërkesat përfshinin pagesën e orëve shtesë, bonus për më shumë se 150 orë shtesë, rritjen e koeficientit me 0.80 për shkak të rritjes së shpenzimeve të jetesës, dhe pagesën e një shtese prej 10% të pagës për thirrje jashtë orarit të punës.

Ministria e Punëve të Brendshme është furnizuar me një gjeneratë të re automjetesh të specializuara për matjen mobile të shpejtësisë. Modelet moderne “Ford” janë të pajisura me radarë të integruar, kamera me rezolucion të lartë dhe softuer të avancuar për lokalizimin dhe dokumentimin e menjëhershëm të kundërvajtjeve në trafik.
Automjetet do të patrullojnë në të gjithë territorin e vendit, duke regjistruar tejkalimin e shpejtësisë në zona urbane, rrugë rajonale dhe në autostrada.
Nga MPB-ja ende nuk zbulojnë se kur sistemi do të vihet plotësisht në funksion, si dhe nëse shkelësit e rregullave do të ndalen në vendngjarje apo gjobat do t’u dërgohen përmes postës, siç funksionon aktualisht sistemi “Safe City”.
Mjete të këtij lloji tashmë përdoren gjerësisht në disa shtete evropiane, ku janë dëshmuar si mjete shumë efikase për uljen e kundërvajtjeve në komunikacion.
Fotografitë nga brendësia e automjeteve të reja u publikuan dje nga ministri i Punëve të Brendshme, Pançe Toshkovski, gjatë vizitës në objektin ku është i vendosur sistemi qendror “Safe City”, me rastin e fillimit të periudhës testuese, gjatë së cilës shkelësit do të marrin njoftime për kundërvajtjet e regjistruara.
Me ndryshimet e fundit të Ligjit për sigurinë në komunikacion, të gjitha kundërvajtjet e dokumentuara përmes pajisjeve teknike – kamera, sensorë dhe mjete regjistrimi – konsiderohen prova të vlefshme. Në fazën e parë, sistemi do të regjistrojë tejkalimin e shpejtësisë, kalimin në të kuqe, patentën e skaduar dhe parkimin e parregullt, ndërsa në fazën e ardhshme pritet zgjerim i listës së kundërvajtjeve.

Ministri i Punëve të Brendshme, Pançe Toshkovski, vizitoi dje pasdite objektin ku është vendosur sistemi qendror “Qyteti i Sigurt” (Safe City), pas fillimit të periudhës testuese për regjistrimin automatik të kundërvajtjeve në komunikacion, njoftoi MPB.

Vetëm në 12 orët e para të testimit janë regjistruar plot 65.000 shkelje, mes tyre 2.800 raste të kalimit në semafor të kuq. Përveç kësaj, sistemi ka zbuluar rreth 1.000 automjete të paregjistruara, përcjell INA.

“Nuk ka tolerancë për drejtim të pakujdesshëm, qoftë në zonat urbane apo në rrugët e hapura. ‘Qyteti i Sigurt’ është një projekt që mbron jetë dhe rikthen disiplinën në komunikacion,” deklaroi ministri Toshkovski.

Nga MPB shtojnë se shifrat janë alarmante dhe edhe një herë tregojnë domosdoshmërinë e sistemit, i cili pritet të përmirësojë kulturën rrugore dhe të ulë numrin e viktimave dhe dëmeve në rrugë.

Periudha testuese do të zgjasë deri më 31 dhjetor, ndërsa deri atëherë kundërvajtësit do të marrin vetëm paralajmërime. Nga janari sistemi do të funksionojë plotësisht, me opsion për marrjen dhe pagesën elektronike të gjobave.(INA)

Advertisement