Ministri i Punëve të Brendshëm, Pançe Toshkovski, ka deklaruar se në 24 orët e fundit janë regjistruar 110 mijë shkelje të rregullave në trafik nga sistemi “Safe City”, raporton SHENJA.

Ministri tha se ky është një numër katastrofal  ndërsa ka të bëj vetëm me qytetin e Shkupit.

“Nëse më kujtohet mirë  rreth 1000 shkelje kanë të bëjnë me mos regjistrimin e makinave, numër katastrofal. Diku 5000 mijë shkelje mendojë se ishin për kalim në të kuqe-numër katastrofal… por më e tmerrshmja është se mbi 90% nga numri i shkeljeve është tejkalimi i shpejtësisë”, tha ministri Toshkovski.

Kryeministri Hristijan Mickoski ka deklaruar sot se ende nuk është vendosur se cili do të jetë funksioni i ri i Orhan Murtezanit, i cili pritet të shkarkohet dhe në vend të tij të emërohet Bekim Sali, i cili, përpos ministër për Cështje Evropiane do të jetë edhe zv/kryeministër.
Mickoski tha se ai është jashtëzakonisht i kënaqur me punën të cilën e ka kryer Murtezani.
“Pres që edhe më tej të vazhdojë bashkëpunimi ynë në vend tjetër, por tani kemi prioritete të tjera në këtë periudhë. E dini, diku mes 17-18 të këtij muaji është Samiti Ballkani Perëndimor-BE, kështu që kemi prioritete të tjera në rend të ditës, jemi të fokusuar në këtë. Cilat janë pritjet nga ministrat e rinj? Të punojnë, të punojnë të përkushtuar me ndershmëri dhe për interesin e qytetarëve”, tha Mickoski.

Trafiku hekurudhor në vend është normalizuar, pasi Sindikata e Makinistëve të Maqedonisë ndërpreu bojkotin pas negociatave që u zhvilluan mbrëmë me drejtuesit e Transportit Hekurudhor të Maqedonisë dhe përfaqësues të Ministrisë së Transportit.

“Ne zhvilluam negociata që dhanë rezultat, disa nga kërkesat u përmbushën dhe kolegët vendosën që, për të mos shkaktuar shpenzime shtesë, të ndërpritet bojkotimi për momentin. Trafiku u normalizua në orën 01:30 të natës. Treni i parë për Kumanovë nise në 04:57,” deklaroi Toni Dimovski, kryetar i Sindikatës së Makinistëve të Maqedonisë dhe përfaqësues i personelit teknik dhe ekzekutiv në Hekurudha e Maqedonisë së Veriut Transport SHA Shkup

Dimovski njoftoi se dialogu do të vazhdojë. Sipas Dimovskit, gjatë bojkotit që filloi dje në orën 13:30, u ndaluan pesë trena pasagjerësh – dy për Manastir dhe nga një për Kumanovë, Gjevgjeli dhe Veles – ndërsa te trenat mallrash nuk pati ndërprerje, përveç vonesave të shkaktuara nga punimet në hekurudhë.

Deri tek drejtuesit e ndërmarrjes hekurudhore më 2 tetor janë dorëzuar 15 kërkesa, dhe pasi nuk pati përgjigje, u mor vendimi për bojkot. Disa nga kërkesat përfshinin pagesën e orëve shtesë, bonus për më shumë se 150 orë shtesë, rritjen e koeficientit me 0.80 për shkak të rritjes së shpenzimeve të jetesës, dhe pagesën e një shtese prej 10% të pagës për thirrje jashtë orarit të punës.