Kryeministri Hristijan Mickoski deklaroi se rezultatet e zgjedhjeve në Komunën e Brvenicës nuk ndikojnë në marrëveshjen me koalicionin VLEN për ndarjen e pozitave në pushtetin ekzekutiv.

Rikonstruimi i niveleve të dyta dhe të treta të pushtetit pritet të përfundojë deri në fund të nëntorit, ndërsa në dhjetor është dakorduar një takim i liderëve të koalicionit qeverisës.

I pyetur nëse VLEN-i do të marrë më pak pozita gjatë rikonstruimit pas zgjedhjeve në Brvenicë, Mickoski iu referua marrëveshjes së arritur dhe fjalës së dhënë, duke theksuar se ajo vlen deri në vitin 2028, kur janë paraparë zgjedhjet e rregullta parlamentare.

„Kjo nuk është çështje matematike, por çështje e thelbit të marrëveshjes së arritur gjatë formimit të koalicionit në qershor të vitit 2024. Nuk kam ndërmend të bëhem viktimë e politikës ditore, sepse fjala është fjalë. Marrëveshja vlen deri në vitin 2028, kur mbahen zgjedhjet e rregullta parlamentare. Kemi biseduar me udhëheqësinë e VLEN-it dhe kemi vendosur që, pasi të përcaktojmë çështjet e tjera të rëndësishme shtetërore, në nivel pune, përmes komisioneve partiake për kuadro, t’i konkretizojmë propozimet“

Nga VLEN për Tv Koha thanë se bëhet fjalë për një takim të rregullt, ku janë diskutuar çështjet aktuale politike dhe janë definuar disa procese të rëndësishme
Sipas tyre, për çështjen e Zv/Ministrave dhe Drejtorëve do të ketë një takim shtesë ditëve në vijim, kurse në dhjetor mbahet takim i rregullt i gjithë koalicionit qeveritar.

Advertisement

Kryeministri komentoi edhe deklaratën e liderit të ZNAM-it, Maksim Dimitrievski, se mund të largohet nga Qeveria nëse provimi i jurisprudencës mbahet edhe në gjuhën shqipe.  Mickoski tha se vendimi i takon Dimitrievskit, duke përsëritur qëndrimin e tij se Qeveria është stabile./Tv Koha/

Mbi 50 gra nga rajoni i Pollogut do të përfitojnë nga programi i trajnimeve “Leading Change with Meaningful Voice” i cili synon fuqizimin e rolit të grave dhe rritjen e pjesëmarrjes së tyre në proceset e vendimmarrjes lokale. Programi organizohet nga Instituti për Lidership dhe Politika Publike, me mbështetjen e Ambasadës së Gjermanisë. Moduli i parë i trajnimit, me temë “Lidershipi dhe Pjesëmarrja e Grave”, u zhvillua sot, me pjesëmarrjen e grave nga këshillat komunalë, partitë politike dhe administratat komunale. Gjatë trajnimit, pjesëmarrëset patën mundësi të zhvillojnë aftësitë e tyre në lidership, komunikim publik dhe pjesëmarrje aktive në jetën publike. Hapjen e trajnimit e bëri drejtoresha ILPP-së, Pranvera Kasami, ndërsa pjesëmarrëset u përshëndetën edhe nga ambasadorja e Gjermanisë në Maqedoninë e Veriut, Petra Drexler.

Trajnerja Adelina Marku theksoi rëndësinë e të mësuarit gjatë gjithë jetës dhe shkëmbimit të përvojave, veçanërisht për gratë e reja në pozita udhëheqëse. Ajo vlerësoi se ndryshimet e shpejta teknologjike, inteligjenca artificiale dhe zhvillimet në politikë kërkojnë qasje të reja në lidership, ndërsa gratë kanë një rol të rëndësishëm në afrimin e elitave politike me qytetarët dhe në zbatimin e reformave që synojnë integrimin evropian.

Adelina Marku – Trajnere
“Kam një bindje të plotë se trajnimet e tilla që kanë të bëjnë me të mësuarit gjatë gjithë jetës janë shumë të rëndësishme dhe ne që e mbajmë veten si trajnere, si eksperte të një lëmie, jemi gjithmonë të gatshëm që të ofrojmë dijeninë tonë, përvojën tonë dhe të dëgjohemi për mënyrat e reja me të cilat ballafaqohen gratë e sidomos femrat e reja në pozitat udhëheqëse. Le të mos harrojmë se bota ndryshon shumë, konteksti i teknologjisë ka ndryshuar shumë dhe këta koncepte po marrin forma të reja. Ne jetojmë në kohën e AI dhe në kohën e rritjes së populizmit në politikë, dhe një zhvendosje të elitave politike nga votuesi, dhe këtu e shoh rolin e grave, si bashkues i elitave politike me votuesin dhe implementimin strategjik të atyre postulatave që ne i kërkojmë drejt BE-së”.

Nga ana tjetër, ambasadorja gjermane Petra Drexler nënvizoi se pjesëmarrja e grave në pozita udhëheqëse është një tregues i rëndësishëm i legjitimitetit demokratik. Ajo theksoi se zhvillimi i plotë i potencialit të një shoqërie është i mundur vetëm kur të gjitha talentet përfaqësohen dhe marrin pjesë në proceset e vendimmarrjes, duke riafirmuar mbështetjen e Gjermanisë për këtë iniciativë.

Petra Drexler – Ambasadore e Gjermanisë në Shkup
“Është kënaqësi të jesh këtu në Tetovë, në këtë mëngjes, me Institutin për Lidership dhe Politika Publike. Çështja e grave në pozita udhëheqëse është tregues i legjitimitetit demokratik sepse shoqëritë mund të zhvillojnë potencialin e plotë vetëm nëse të gjithë talentët participojnë në vendimmarrje. Është një sfidë që të gjithë ne e ndajmë, në Gjermani, në Maqedoni të Veriut dhe në shtetet e tjera, çfarëdo që statistikat për përfaqësimin e grave në vendimmarrje na thonë. Prandaj ne jemi shumë krenarë që të bashkëpunojmë me institutin dhe do të doja ta falënderoj institutin për këtë iniciativë. Ne jemi partnerë të tyre”!

Advertisement

Përmes këtij programi, ILPP synon të mbështesë gratë që mbajnë role publike, duke i inkurajuar të marrin pjesë më aktive në vendimmarrje dhe të ndërmarrin iniciativa që adresojnë nevojat e komuniteteve. Programi pritet të kontribuojë në rritjen e përfaqësimit të barabartë dhe fuqizimin e grave në nivel lokal./Tv Koha/ 

Tri kryeqytete, një skenë dhe një gjuhë e përbashkët artistike. Tirana, Prishtina dhe Shkupi bashkohen javën e ardhshme përmes magjisë së teatrit.

Nga 16 deri më 22 nëntor, Shkupi do të shndërrohet në kryeqendrën e artit skenik shqiptar, duke mirëpritur edicionin e katërt të Festivalit Mbarëkombëtar të Teatrit “Moisiu”.

Dhjetë shfaqje nga Shqipëria, Kosova, Maqedonia e Veriut dhe Presheva do të sjellin në një skenë histori, emocione dhe interpretime që kapërcejnë kufijtë.

Një festë e teatrit që këtë vit përkon edhe me atmosferën e festave të nëntorit.

ISMET RAMADANI, Drejtor i Teatrit Shqiptar – Shkup

Advertisement

“Festivali Moisiu është një nga ngjarjet, lirisht mund të them, më të mëdha kulturore që ndodh këtë vit për neve shqiptarët. Dhe ashtu edhe duhet ta trajtojmë, duhet të jetë festë pasi që ka filluar edhe tani në nëntor gjatë festave të nëntorit.”

Nga “Drejtësi në Nuremberg”, që do të hapë festivalin, te “Hamleti”, “Duke pritur Godonë” e “Romeo dhe Xhulieta”, skena e Shkupit do të flasë përmes veprave shqiptare dhe kryeveprave të dramaturgjisë botërore.

Por “Moisiu” nuk synon të bashkojë vetëm aktorët para publikut.

Festivali është edhe një mundësi për të ndërtuar ura të reja bashkëpunimi mes teatrove shqiptare, për të shkëmbyer përvoja dhe për të diskutuar të ardhmen e artit skenik.

“Qëllimi ynë thelbësor në këtë festival është nxitja dhe forcimi i bashkëpunimit mes artistëve shqiptarë, si dhe krijimi i një ure të fortë njohjeje mes njerëzve të skenës dhe artit tonë.”

Advertisement

Festivali që nisi rrugëtimin në Shkup në vitin 2022, për të vazhduar në Tiranë dhe Prishtinë, rikthehet aty ku gjithçka filloi.

Më 22 nëntor, “Përtej hekurave” e Teatrit Shqiptar të Shkupit do të ulë perden e edicionit të katërt, ndërsa do të ndahen edhe çmimet për arritjet artistike.

Tri kryeqytete që i ndajnë kufijtë, por i bashkon skena.

Për shtatë ditë, Shkupi do të jetë shtëpia e përbashkët e teatrit shqiptar./Tv Koha – Shkup/

Advertisement