Komuna e Tetovës ka konfirmuar edhe një herë se mbetet ndër komunat më transparente në vend. Sipas renditjes së fundit të Indeksit të Transparencës Aktive, të realizuar nga Qendra për Komunikime Qytetare, Tetova ka arritur përqindjen prej 81.4%, duke u pozicionuar në krye të listës në rajon.

Ky rezultat dëshmon përkushtimin e pushtetit lokal ndaj hapjes institucionale dhe informimit të qytetarëve. Nga Komuna theksojnë se llogaridhënia dhe transparenca do të mbeten prioritete kryesore në vazhdimësi, me qëllim forcimin e besimit mes qytetarëve dhe institucioneve.

Ministri i Ekonomisë dhe Punës, Besar Durmishi, ka bërë të ditur se dyqanet e para të zinxhirit gjerman LIDL në vend do të hapen shumë shpejt. Përmes një postimi në rrjetet sociale, ai njoftoi se vizitoi punimet e kësaj kompanie në Kumanovë duke u njohur nga afër me ecurinë e projektit.
“Shumë shpejt dyqanet e para të LIDL do të hapen për qytetarët tanë, duke kontribuar në ngritjen e standardeve tregtare dhe duke krijuar qindra vende të reja pune.

Ky është një hap i rëndësishëm për zhvillimin ekonomik dhe për përmirësimin e kushteve të punësimit në vend!”, shkroi Durmishi.
Ai shtoi se prania e Lidl-it në tregun vendas do të thotë konkurrencë më e madhe, çmime më të favorshme për qytetarët dhe zhvillim i ri ekonomik në nivel lokal dhe kombëtar.

Komisioni i posaçëm që është formuar për zbardhjen e dyshimeve rreth ndërhyrjeve kirurgjikale të zemrës të kryera për përfitime financiare tashmë është mbledhur tre herë dhe ka analizuar tetë rastet e para të raportuara, deklaroi ministri Azir Aliu.

“Në takimin e parë u krijua metodologjia e punës, ndërsa në takimet pasuese u analizuan tetë rastet që kishim. Nuk do të deklarohem derisa të përfundojmë me analizën e çdo rasti.”, tha ministri Aliu.

Ai shtoi se raporti përfundimtar do të publikohet në faqen zyrtare të Ministrisë së Shëndetësisë, dhe përveç komisionit vendor, në këtë proces janë përfshirë edhe tre ekspertë ndërkombëtarë nga Sllovenia, Italia dhe Austria, të cilët pritet të marrin pjesë edhe fizikisht në takimet e ardhshme.

“Raporti i komisionit vendor dhe ai i ekspertëve të jashtëm do të shërbejnë si bazë për krijimin e politikave të reja në fushën e kardiologjisë dhe kardiokirurgjisë. Detyra e komisionit është të paraqesë realitetin – më tej, institucionet përkatëse do të veprojnë sipas ligjit”, theksoi Aliu.