Aksioni i lidhur me botokse dhe filera ilegale është zgjeruar dhe po arrestohen të dyshuar të rinj, bëjnë të ditur nga Prokuroria për Ndjekjen e Krimit të Organizuar dhe Korrupsionit.

Që nga mbrëmë e deri më tani po vazhdojnë kontrollet te të gjithë anëtarët e grupit kriminal që importonte dhe shpërndante në mënyrë të paligjshme pajisje mjekësore.

Fillimisht u arrestuan më shumë se 10 të dyshuar.

Disa prej tyre janë mjekë nga klinikat e Shkupit, të tjerë pronarë të ordinancave dermatologjike, organizatorë të transportit dhe shitjes së botokseve dhe filerave të futura ilegalisht.

“Deri në këtë moment janë siguruar disa persona, por për shkak të përmasave dhe seriozitetit të rastit, aksioni po zgjerohet me kontrolle të reja dhe ndalimin e personave të tjerë të përfshirë”, informojnë nga Prokuroria.

Advertisement

Sipas informacioneve nga MPB, me urdhër të Gjykatës Themelore Penale po kryhen bastisje në disa lokacione në Shkup, si dhe në Strumicë dhe Manastir.

Deri më tani janë sekuestruar sasi e konsiderueshme barnash dhe pajisjesh mjekësore, një automjet luksoz, para, parfume dhe telefona. Sipas informacioneve fillestare, filerët nuk kishin miratim, as udhëzime dhe etiketa, ndërsa ishin importuar nga Kina, Serbia dhe Turqia.

Dogana, para 10 muajsh, njoftoi se kishte sekuestruar 210 paketime botoksi në kufirin me Bullgarinë, në pikën kufitare “Deve Bair”.

Ato i transportonte një person që kishte ardhur nga Stambolli.”

Advertisement

Tetova është qyteti më i ri ku Wolt po lançohet zyrtarisht, si pjesë e zgjerimit më të gjerë të platformës në tregun maqedonas. Kjo u jep përdoruesve akses më të lehtë në restorantet lokale dhe produktet ,direkt përmes aplikacionit.

Wolt, platforma teknologjike e njohur për shpërndarje të shpejtë dhe të thjeshtë, vazhdon të zgjerojë rrjetin e saj në Maqedoni. Pas Shkupit dhe Bitolës shërbimi tani po bëhet i disponueshëm edhe në Tetovë, duke u ofruar banorëve të qytetit një mënyrë edhe më të thjeshtë për të porositur ushqim dhe produkte të tjera nga partnerët lokalë.

Për të shënuar lansimin në Tetovë, përdoruesit e rinj do të mund të përfitojnë 30% zbritje në dy porositë e para, si dhe 14 ditë dërgesë falas. Qëllimi është t’u jepet përdoruesve mundësia ta provojnë platformën lehtësisht që nga fillimi dhe të përjetojnë komoditetin që sjell Wolt në jetën e përditshme, me akses në restorante dhe partnerë tregtarë lokalë që tashmë janë të disponueshëm në qytet, së bashku me një sërë zbritjesh dhe promovimesh. Përfitime shtesë janë gjithashtu të disponueshme përmes Wolt+, shërbimi i abonimit të platformës, i cili ofron tarifa më të ulëta të dërgesës dhe përfitime të tjera për përdoruesit.

Lansimi do të shënohet gjithashtu me një event publik në Fratelli – Kitchen & Bar, të shtunën nga ora 12:00 deri në 16:00, ku vizitorët do të mund të shijojnë pije dhe ushqime të lehta, si dhe surpriza të tjera. Si pjesë e eventit, do të organizohet edhe një “rrotë fati”, përmes së cilës përdoruesit që shkarkojnë aplikacionin, ose që tashmë e kanë të shkarkuar, do të kenë mundësi të fitojnë dhurata nga Wolt.

Me hyrjen në Tetovë, Wolt po hap gjithashtu mundësi të reja për bizneset lokale duke u dhënë atyre qasje në një bazë më të gjerë përdoruesish dhe një kanal shtesë digjital për rritje. Në të njëjtën kohë, platforma krijon mundësi fleksibile fitimi për ata që zgjedhin të punojnë sipas kushteve të tyre, duke kontribuar edhe në komoditet më të madh në jetën e përditshme të banorëve.

Advertisement

“Jemi të entuziazmuar që po e sjellim Wolt edhe në Tetovë dhe që vazhdojmë rritjen tonë në Maqedoni,” tha Ognjen Ljumović, Sales Lead dhe Business Lead për Maqedoninë në Wolt. “Me një përzgjedhje të gjerë të restoranteve dhe tregtarëve lokalë, po e bëjmë jetën e përditshme më të thjeshtë për banorët, duke krijuar njëkohësisht mundësi të reja për bizneset lokale dhe për njerëzit që kërkojnë mënyra fleksibile për të fituar.”

Ky zgjerim është pjesë e planeve më të gjera të Wolt për rritje të vazhdueshme në treg, dhe kompania ka njoftuar se do të vazhdojë të zgjerojë rrjetin e saj në komunitete të tjera në periudhën në vijim.

Rreth Wolt

Wolt është një kompani teknologjike me seli në Helsinki, me misionin për të sjellë gëzim, thjeshtësi dhe mundësi fitimi në lagjet e botës. Wolt zhvillon një platformë të tregtisë lokale që lidh njerëzit që duan të porosisin ushqim, produkte ushqimore dhe mallra të tjera me ata që janë të interesuar t’i shesin dhe t’i dorëzojnë ato. Wolt u themelua në vitin 2014 dhe u bashkua me DoorDash (NASDAQ: DASH) në vitin 2022. Në fund të vitit 2025, DoorDash gjithashtu bleu Deliveroo. Së bashku, ne operojmë në më shumë se 30 vende sot. Mund të lexoni më shumë në faqen e internetit të Wolt.

Advertisement

Një punëtor ka humbur jetën në Kisella Vodë të Shkupit ndërsa katër tjerë janë lënduar.  Viktima, sipas informacioneve të para, është 34 vjeç. Tragjedia ndodhi në një kantier ndërtimi pasi u zunë nga një masë dheu.

Një punëtor ndërtmi humbi jetën, kurse katër janë lënduar në një kantier ndërtimi në lagjen Kisella Vodë të Shkupit.

Ministria e Brendshme njoftoi se tre punëtorë u zunë nën dhe këtë mëngjes. Të tre janë shpëtuar dhe janë dërguar në Qendrën Urgjente.

Njëri prej tyre ka pësuar fraktura, ndërsa dy të tjerët kanë lëndime më të lehta, deklaruan autoritetet shëndetësore.

Prokuroria është duke hetuar nëse janë respektuar masat për siguri, kurse ka urdhëruar autopsinë për trupin e viktimës.

Advertisement

Ngjarja tragjike në lagjen Kisella Vodë në Shkup ngriti shqetësime serioze për sigurinë gjatë punimeve ndërtimore.

Ekspertët theksojnë se për të gjitha objektet me sipërfaqe mbi 300 metra katrorë është i domosdoshëm hartimi i një elaborati gjeoteknik. Megjithatë, sipas standardeve evropiane (Eurokod), kjo nuk është e mjaftueshme – nevojiten edhe projekte të detajuara gjeoteknike, sidomos kur bëhet fjalë për objekte me disa nivele nëntokësore dhe në afërsi të ndërtesave fqinje.

Rikujtojmë se kohë më parë në fshatin Gradec të Gostivarit, gjatë kryerjes së punimeve ndërtimore në një shtëpi private, ndërroi jetë një 48-vjeçar nga Tetova.